પાવર અને માઈલેજની નવી વ્યાખ્યા: 748bhp પાવર અને 1200KM રેન્જવાળી BYD Leopard 8 ભારતમાં મચાવશે ધમાલ
ભારતમાં ઇલેક્ટ્રિક વાહનોના ક્ષેત્રમાં પોતાનું નામ બનાવી ચૂકેલી BYD કંપની હવે પ્રીમિયમ સેગમેન્ટમાં મોટો ધડાકો કરવાની તૈયારીમાં છે. વર્ષ 2025 માં અંદાજે 6,000 યુનિટ્સના વેચાણ સાથે કંપનીએ ભારતમાં મજબૂત પકડ જમાવી છે. અત્યારે કંપની પાસે સીલ (Seal), એટ્ટો 3 (Atto 3) અને સી લાયન 7 (Sealion 7) જેવા મોડેલ્સ છે, પણ હવે કંપની તેની સેલ્સ આંકડો બમણો કરવા માંગે છે. આ માટે કંપનીએ ભારતમાં BYD Leopard 8 લક્ઝરી ઓફ-રોડ SUV માટે ડિઝાઇન પેટન્ટ ફાઇલ કરી છે.
શું છે BYD Leopard 8?
આ માત્ર એક સામાન્ય SUV નથી, પણ એક હાઇબ્રિડ રાક્ષસ છે જે રોડ અને ઓફ-રોડ બંને જગ્યાએ રાજ કરવા માટે બનાવવામાં આવી છે. ગ્લોબલ માર્કેટમાં આ ગાડી ‘Denza B8’ અને ‘Fangchengbao Bao 8’ જેવા નામોથી જાણીતી છે. ભારત માટે કંપની તેને ‘Leopard 8’ તરીકે રજૂ કરી શકે છે. તે ખાસ કરીને એવા ગ્રાહકો માટે છે જેમને લક્ઝરીની સાથે પાવર અને લાંબી મુસાફરીમાં કોઈ બાંધછોડ જોઈતી નથી.
એન્જિન અને પાવર: 0 થી 100 માત્ર 4.8 સેકન્ડમાં
Leopard 8 ની સૌથી મોટી તાકાત તેનું ‘પ્લગ-ઇન હાઇબ્રિડ’ એન્જિન છે. તેમાં 2.0 લિટરનું ચાર-સિલિન્ડર ટર્બોચાર્જ્ડ પેટ્રોલ એન્જિન આપવામાં આવ્યું છે, જેની સાથે બે શક્તિશાળી ઇલેક્ટ્રિક મોટર્સ જોડેલી છે.
કુલ પાવર: 748 bhp
ટોર્ક: 760 Nm
બેટરી પેક: 36.8 kWh
આ પાવરફુલ કોમ્બિનેશનને કારણે આ વિશાળ SUV માત્ર 4.8 સેકન્ડમાં 0 થી 100 કિમી પ્રતિ કલાકની ઝડપ પકડી લે છે. આ પર્ફોર્મન્સ ઘણી સ્પોર્ટ્સ કારને પણ ટક્કર આપે તેવું છે.
રેન્જની ચિંતા હવે ભૂલી જાવ: 1200 KM ની મુસાફરી
ભારતીય ગ્રાહકો માટે સૌથી મહત્વની બાબત ‘રેન્જ’ હોય છે. Leopard 8 માં પ્લગ-ઇન હાઇબ્રિડ ટેકનોલોજી હોવાથી, તે માત્ર ઇલેક્ટ્રિક મોડ પર 100 કિમી (WLTP) સુધી ચાલી શકે છે. પરંતુ જ્યારે પેટ્રોલ એન્જિન અને બેટરી બંને સાથે કામ કરે છે, ત્યારે આ ગાડી એકવાર ફૂલ ટેન્ક અને ચાર્જિંગમાં 1200 કિમી (CLTC) સુધીની અધધ રેન્જ આપે છે. એટલે કે, તમે એક જ વારમાં મુંબઈથી દિલ્હી પહોંચી શકો છો!
ઓફ-રોડિંગના બાદશાહ જેવા ફીચર્સ
આ SUV બોડી-ઓન-ફ્રેમ ચેસિસ પર બનેલી છે, જે તેને અત્યંત મજબૂત બનાવે છે. તેમાં ફૂલ-ટાઇમ ઓલ-વ્હીલ ડ્રાઇવ (AWD) સિસ્ટમ આપવામાં આવી છે. ખરાબ રસ્તાઓ અને પહાડો પર ચાલવા માટે તેમાં સેન્ડ, સ્નો, ઓફ-રોડ, કમ્ફર્ટ અને સ્પોર્ટ જેવા અલગ-અલગ ડ્રાઇવિંગ મોડ્સ મળે છે. આ ઉપરાંત:
ઇન્ટેલિજન્ટ હાઇડ્રોલિક સસ્પેન્શન સિસ્ટમ.
ચેસિસનો ટ્રાન્સપરન્ટ વ્યુ (જેથી નીચેનો રસ્તો સ્ક્રીન પર દેખાય).
આગળ અને પાછળ ઇલેક્ટ્રોનિક ડિફરન્શિયલ લોક.
પ્રીમિયમ કેબિન અને ટ્રિપલ સ્ક્રીન સેટઅપ
ગાડીની અંદર પગ મૂકતા જ તમને કોઈ ફ્યુચરિસ્ટિક પ્લેનમાં બેઠા હોવ તેવો અહેસાસ થશે. તેના ડેશબોર્ડ પર એક નહીં પણ ત્રણ સ્ક્રીન આપવામાં આવી છે:
17.3 ઇંચની વિશાળ ટચસ્ક્રીન ઇન્ફોટેનમેન્ટ સિસ્ટમ.
12.3 ઇંચનું ડિજિટલ ડ્રાઇવર ડિસ્પ્લે.
12.3 ઇંચનું પેસેન્જર ડિસ્પ્લે (બાજુમાં બેઠેલી વ્યક્તિના મનોરંજન માટે).
કેબિનમાં હાઇ-ક્વોલિટી મટીરિયલ, પ્રીમિયમ સાઉન્ડ સિસ્ટમ અને કનેક્ટિવિટીના તમામ અત્યાધુનિક ફીચર્સ મળે છે જે તેને સાચી લક્ઝરી SUV બનાવે છે.
ભારતમાં ક્યારે આવશે?
જોકે BYD એ હજુ સત્તાવાર લોન્ચિંગ તારીખ જાહેર કરી નથી, પણ ડિઝાઇન પેટન્ટ ફાઇલ થયા બાદ એવી અપેક્ષા રાખવામાં આવે છે કે 2026 ના મધ્ય સુધીમાં આ ગાડી ભારતીય રસ્તાઓ પર જોવા મળી શકે છે. તેની કિંમત પ્રીમિયમ સેગમેન્ટમાં હોવાથી 80 લાખથી 1 કરોડ રૂપિયાની આસપાસ હોઈ શકે છે.
