નવેમ્બર પૂરો થાય તે પહેલાં આ કામ પતાવી લો! ઘરબેઠા જીવન પ્રમાણપત્ર બનાવવાની સૌથી સરળ રીત!
દર વર્ષે નવેમ્બર મહિનો શરૂ થતાં જ દેશના કરોડો પેન્શનરોના માથે એક ચિંતા સતાવવા લાગે છે અને તે છે જીવન પ્રમાણપત્ર (Life Certificate) જમા કરવાની જવાબદારી. બેંકની લાંબી કતારો, કલાકો સુધી રાહ જોવી અને બાયોમેટ્રિક મશીન પર આંગળીના ટેરવા (Fingerprint) મૅચ ન થવાની સમસ્યા… આ બધી બાબતો વડીલો માટે એક મોટી મુશ્કેલી સમાન રહેતી હતી.
પરંતુ હવે ટેક્નોલોજીએ આ પ્રક્રિયાને ખૂબ જ સરળ બનાવી દીધી છે. કેન્દ્ર સરકારે ડિજિટલ લાઈફ સર્ટિફિકેટ અભિયાન 5.0 ની શરૂઆત કરી છે, જેના અંતર્ગત હવે તમે અથવા તમારા પરિવારના વડીલો ઘરે બેઠા પોતાના સ્માર્ટફોન દ્વારા માત્ર ચહેરાની ઓળખ (Face Authentication) થી પોતાનું જીવન પ્રમાણપત્ર તૈયાર કરી શકો છો. આવો જાણીએ કે આ અભિયાન શું છે અને તમે તેનો લાભ કેવી રીતે મેળવી શકો છો.
શું છે ડિજિટલ લાઈફ સર્ટિફિકેટ અભિયાન 5.0?
પેન્શનનું અવિરત વિતરણ સુનિશ્ચિત કરવા માટે, દર વર્ષે જીવંત હોવાનો પુરાવો આપવો ફરજિયાત છે. આ પ્રક્રિયાને સરળ બનાવવા માટે, સરકારે 1 નવેમ્બરથી 30 નવેમ્બર, 2026 સુધી રાષ્ટ્રવ્યાપી ઝુંબેશ શરૂ કરી છે.
પેન્શન અને પેન્શનરોના કલ્યાણ વિભાગના નેતૃત્વ હેઠળ આ ઝુંબેશનો મુખ્ય ઉદ્દેશ્ય આ વર્ષે 2.30 કરોડ (23 મિલિયન) ડિજિટલ જીવન પ્રમાણપત્રો જનરેટ કરવાનો છે. નોંધનીય છે કે, લક્ષ્યમાં ખાસ કરીને ‘ફેસ ઓથેન્ટિકેશન’ દ્વારા આ પ્રમાણપત્રોમાંથી 1.50 કરોડ (15 મિલિયન) જનરેટ કરવાનો સમાવેશ થાય છે. ટૂંકમાં, હવે તમારે બેંકની મુલાકાત લેવાની જરૂર નથી.
ફેસ ઓથેન્ટિકેશનથી ઘરે બેઠા આ રીતે બનાવો જીવન પ્રમાણપત્ર
આ ડિજિટલ પ્રક્રિયા માટે તમારે કોઈ અલગ ફિંગરપ્રિન્ટ સ્કેનરની જરૂર નથી. તમારી પાસે એન્ડ્રોઇડ અથવા આઈઓએસ (Android/iOS) સ્માર્ટફોન હોવો જરૂરી છે. આ સરળ સ્ટેપને અનુસરીને તમે ઘરે બેઠા સર્ટિફિકેટ બનાવી શકો છો:
૧. એપ ડાઉનલોડ કરો: તમારા સ્માર્ટફોનના ગૂગલ પ્લે સ્ટોર અથવા એપ સ્ટોર પરથી ‘Jeevan Pramaan’ એપ ડાઉનલોડ કરો.
૨. આરડી એપ ઇન્સ્ટોલ કરો: ફેસ ઓથેન્ટિકેશન યોગ્ય રીતે કામ કરે, તે માટે જરૂરી ‘AadhaarFaceRD’ એપ પણ તમારા ફોનમાં ઇન્સ્ટોલ કરો.
૩. માહિતી દાખલ કરો: એપ ઓપન કર્યા પછી ઓપરેટર ઓથેન્ટિકેશન પૂરું કરો અને ત્યારબાદ પેન્શનરની જરૂરી વિગતો (જેવા કે આધાર નંબર, મોબાઈલ નંબર અને પેન્શન એકાઉન્ટ ડિટેઈલ્સ) દાખલ કરો.
૪. ચહેરો કેપ્ચર કરો: સ્ક્રીન પર આપેલી સૂચનાઓ અનુસાર સ્માર્ટફોનના ફ્રન્ટ કેમેરાથી પેન્શનરનો ચહેરો કેપ્ચર કરો.
૫. પ્રમાણપત્ર જનરેટ કરો: ફેસ ઓથેન્ટિકેશન સફળ થતાં જ તમારું ડિજિટલ લાઈફ સર્ટિફિકેટ જનરેટ થઈ જશે.
સફળ પ્રક્રિયા પછી સ્ક્રીન પર એક પ્રમાણ આઈડી (Pramaan ID) દેખાશે, જેની મદદથી તમે તમારું ડિજિટલ સર્ટિફિકેટ ઓનલાઈન ડાઉનલોડ પણ કરી શકો છો.
બેંક, પોસ્ટઓફિસ અને ઘર સુધી મળશે સુવિધા
જો કોઈ વડીલને સ્માર્ટફોન ચલાવવામાં કે આ ડિજિટલ પ્રક્રિયા પૂરી કરવામાં મુશ્કેલી પડતી હોય, તો સરકારે તેના માટે વૈકલ્પિક વ્યવસ્થા પણ કરી છે:
-
બેંક અને પોસ્ટઓફિસની મદદ: આ અભિયાનમાં દેશના ૧૯ મુખ્ય બોંકો, ૭૮૫ જિલ્લા પોસ્ટઓફિસ અને ઈન્ડિયા પોસ્ટ પેમેન્ટ્સ બેંક સક્રિયપણે ભાગ લઈ રહ્યા છે. તમે તમારી નજીકની બેંક અથવા પોસ્ટઓફિસ જઈને પણ આ પ્રક્રિયા પૂરી કરાવી શકો છો.
-
વિશેષ શિબિર (Camps): વધુ પેન્શનરોવાળા વિસ્તારોમાં વિશેષ કેમ્પ લગાવવામાં આવી રહ્યા છે. ઘણી જગ્યાએ વડીલો અને દિવ્યાંગો માટે ઘર સુધીની સેવા (Doorstep Service) ની સુવિધા પણ ઉપલબ્ધ કરાવવામાં આવી રહી છે, જેથી તેમને બહાર ન જવું પડે.
ડિજિટલ લાઈફ સર્ટિફિકેટ અભિયાન 5.0 વડીલોના જીવનને ખરેખર સરળ બનાવવાનું એક શાનદાર પગલું છે. હવે તમારે બેંકની ધક્કામુક્કી અને લાંબી લાઈનોમાં ઊભા રહેવાની બિલકુલ જરૂર નથી. જો તમારા ઘરમાં પણ કોઈ પેન્શનર્સ છે, તો આ ટેક્નોલોજીનો લાભ લો અને સમયસર પોતાનું જીવન પ્રમાણપત્ર ઘરે બેઠા જ પૂરું કરો!
