ઇન્સ્ટાગ્રામ પ્લસ થયું લોન્ચ, શું હવે રીલ્સ જોવા માટે ખિસ્સા ખાલી કરવા પડશે?

તમારી ઇન્સ્ટાગ્રામ સ્ટોરી કોણે કેટલી વાર જોઈ? બધું જ ખબર પડી જશે! લોન્ચ થયું નવું ‘Instagram Plus’

જો તમે પણ સવારે ઉઠતાની સાથે જ સૌથી પહેલા ઇન્સ્ટાગ્રામ સ્ક્રોલ કરો છો, મીમ્સ શેર કરો છો અને કલાકો સુધી રીલ્સ જોવાના શોખીન છો, તો તમારા માટે એક ખૂબ જ મોટા સમાચાર છે. પેરેન્ટ કંપની મેટા (Meta) એ સોશિયલ મીડિયાની દુનિયામાં એક મોટો ધમાકો કરતા ‘ઇન્સ્ટાગ્રામ પ્લસ’ (Instagram Plus) નામે એક નવો પ્રીમિયમ સબસ્ક્રિપ્શન પ્લાન વૈશ્વિક સ્તરે લોન્ચ કરી દીધો છે.

આ નવા પ્લાનના આવ્યા પછીથી જ ઇન્ટરનેટ પર એ ચર્ચા શરૂ થઈ ગઈ છે કે શું હવે ઇન્સ્ટાગ્રામ ચલાવવા માટે પૈસા ચૂકવવા પડશે? સામાન્ય યુઝર્સ પર આની શું અસર પડશે? ચાલો આ લેખમાં સરળ ભાષામાં સમજીએ કે ઇન્સ્ટાગ્રામ પ્લસ શું છે, તેમાં કયા અનોખા ફીચર્સ મળી રહ્યા છે અને તમારું હાલનું ઇન્સ્ટાગ્રામ એકાઉન્ટ ફ્રી રહેશે કે નહીં.

સૌથી મોટો સવાલ: શું બંધ થઈ જશે ફ્રી ઇન્સ્ટાગ્રામ?

ઇન્સ્ટાગ્રામ પ્લસના સમાચાર સામે આવતાની સાથે જ સામાન્ય યુઝર્સના મનમાં સૌથી પહેલો અને મોટો ડર એ જ છે કે શું હવે તેમને પોતાની મનપસંદ એપનો ઉપયોગ કરવા માટે દર મહિને પૈસા ચૂકવવા પડશે?

મેટાએ આ વાતને સંપૂર્ણપણે સ્પષ્ટ કરતા યુઝર્સને મોટી રાહત આપી છે. હાલનું ઇન્સ્ટાગ્રામ પ્લેટફોર્મ પહેલાની જેમ જ તદ્દન ફ્રી રહેશે. સામાન્ય યુઝર્સને નોર્મલ પોસ્ટ કરવા, સ્ટોરીઝ મૂકવા, રીલ્સ જોવા, મિત્રોને ડાયરેક્ટ મેસેજ (DM) કરવા જેવી પાયાની સુવિધાઓ માટે ₹1 પણ આપવો નહીં પડે.

સીધું ગણિત એ છે કે: ઇન્સ્ટાગ્રામ પ્લસ માત્ર એક વૈકલ્પિક (Optional) પેઇડ સર્વિસ છે. આ એવા લોકો માટે છે જેઓ એક્સ્ટ્રા ફીચર્સ ઈચ્છે છે. જે લોકો પૈસા ખર્ચવા નથી માંગતા, તેઓ કોઈ પણ ફેરફાર વગર પહેલાની જેમ જ નોર્મલ ઇન્સ્ટાગ્રામની મજા માણી શકે છે. ઇન્સ્ટાગ્રામના સીઇઓ એડમ મોસેરીએ પણ એક વીડિયો જાહેર કરીને આ વાતની પુષ્ટિ કરી છે.

આખરે શું છે Instagram Plus અને તેમાં શું છે ખાસ?

આ નવો પ્લાન મુખ્યત્વે એવા પાવર-યુઝર્સ, ક્રિએટર્સ અને ઇન્ફ્લુએન્સર્સને ધ્યાનમાં રાખીને તૈયાર કરવામાં આવ્યો છે, જેઓ પોતાના સોશિયલ મીડિયા એકાઉન્ટને વધુ પ્રોફેશનલ અને પર્સનલ ટચ આપવા માંગે છે. ઇન્સ્ટાગ્રામ પ્લસમાં ઘણા એવા અદ્ભુત ફીચર્સ ઉમેરવામાં આવ્યા છે જે અત્યાર સુધી સામાન્ય એપમાં જોવા મળ્યા નથી.

ચાલો તેના કેટલાક સૌથી મુખ્ય અને રસપ્રદ ફીચર્સ પર નજર કરીએ:

1. સ્ટોરીઝ માટેના કમાલના ફીચર્સ

• સ્ટોરી એક્સટેન્ડ (Story Extend): અત્યાર સુધી ઇન્સ્ટાગ્રામ પર મૂકવામાં આવેલી સ્ટોરી માત્ર 24 કલાકમાં ગાયબ થઈ જતી હતી, પરંતુ પ્લસ યુઝર્સની સ્ટોરી હવે પૂરા 48 કલાક સુધી લાઈવ રહેશે.

• સ્ટોરી સ્પોટલાઇટ (Story Spotlight): આ ફીચરની મદદથી તમારી સ્ટોરીને તમારા મિત્રોના ફીડમાં સૌથી આગળ અને વધુ પ્રાથમિકતા (Priority) મળશે.

• મલ્ટિપલ સ્ટોરી ઓડિયન્સ (Multiple Story Audiences): હવે તમે અલગ-અલગ લોકોના ગ્રુપના હિસાબથી અલગ-અલય સ્ટોરીઝ કસ્ટમાઇઝ કરીને મૂકી શકશો.

• સુપર હાર્ટ્સ (Super Hearts): મિત્રોની સ્ટોરીઝ પર રિએક્ટ કરવા માટે સામાન્ય લાઇક્સની જગ્યાએ શાનદાર એનિમેટેડ અને ખાસ રિએક્શનના ઓપ્શન્સ મળશે.

2. જાસૂસી અને ઇનસાઇટ્સ વાળા ટુલ્સ

• રીવોચ ઇનસાઇટ્સ (Story Rewatch Insights): આ પ્લાનનું સૌથી ચર્ચિત ફીચર બની શકે છે. આનાથી તમને એ ખબર પડી જશે કે તમારી સ્ટોરીને કોઈ ખાસ વ્યક્તિએ કેટલી વાર ફરીથી (Rewatch) જોઈ છે.

• સર્ચ વ્યુઅર લિસ્ટ (Search Viewer List): જો તમારી સ્ટોરી પર સેંકડો વ્યુઝ આવતા હોય, તો હવે તમારે એ ચેક કરવા માટે આખું લિસ્ટ સ્ક્રોલ નહીં કરવું પડે કે તમારા ખાસ મિત્રએ સ્ટોરી જોઈ કે નહીં. તમે સીધું નામ સર્ચ કરી શકો છો.

• સ્ટોરી પ્રિવ્યૂ (Story Preview): તમે સામેવાળાની સ્ટોરી પર કોઈ પણ પ્રકારનું ઇન્ટરેક્શન કર્યા વગર કે ‘સીન’ (Seen) નો ટેગ આપ્યા વગર તેનો પ્રિવ્યૂ જોઈ શકશો.

પ્રોફાઇલ કસ્ટમાઇઝેશન અને પ્રાઇવસીમાં મોટા ફેરફાર

ઇન્સ્ટાગ્રામ પ્લસ દ્વારા યુઝર્સને પોતાની પ્રોફાઇલને બિલકુલ યુનિક લુક આપવાની તક મળશે:

• હોમ સ્ક્રીનનો લુક બદલો: પ્લસ યુઝર્સને ઘણા બધા ‘કસ્ટમ એપ આઇકોન’ મળશે, જેનાથી તેઓ પોતાના ફોનની હોમ સ્ક્રીન પર દેખાતા ઇન્સ્ટાગ્રામ લોગોની સ્ટાઇલ બદલી શકે છે. આ સાથે જ ‘કસ્ટમ બાયો ફોન્ટ્સ’ ની મદદથી પ્રોફાઇલ બાયોને અલગ અને આકર્ષક રાઇટિંગ સ્ટાઇલમાં લખી શકાશે.

• 6 પોસ્ટ પિન કરી શકાશે: અત્યાર સુધી આપણે આપણી પ્રોફાઇલ ગ્રીડના ટોપ પર માત્ર 3 પોસ્ટ જ પિન કરી શકતા હતા, પરંતુ નવા પ્લાનમાં તેને વધારીને 6 કરી દેવામાં આવી છે.

ફીડમાં આવ્યા વગર સીધું પ્રોફાઇલ પર પોસ્ટ કરો

પ્લસ પ્લાનમાં ‘પોસ્ટ ડાયરેક્ટલી ટુ પ્રોફાઇલ’ નામે એક અત્યંત અનોખું ફીચર આપવામાં આવ્યું છે. આના દ્વારા તમે કોઈ પણ ફોટો કે વીડિયો સીધો તમારી પ્રોફાઇલ અથવા હાઇલાઇટ્સમાં અપલોડ કરી શકો છો, પરંતુ તે તમારા ફોલોઅર્સની હોમ ફીડ (હોમ સ્ક્રીન) પર દેખાશે નહીં. આ ફીચર એવા ક્રિએટર્સ માટે ગેમ-ચેન્જર સાબિત થઈ શકે છે જેઓ પોતાની પ્રોફાઇલને એક પોર્ટફોલિયોની જેમ મેઇન્ટેન રાખવા માંગે છે, પરંતુ પોતાની દરેક નાની-મોટી પોસ્ટથી ફોલોઅર્સની ફીડને ભરવા નથી માંગતા.

શું તમારે ઇન્સ્ટાગ્રામ પ્લસ લેવું જોઈએ?

મેટાએ મે મહિનામાં આ ફીચરનું ટેસ્ટિંગ શરૂ કર્યું હતું અને હવે તેને આખી દુનિયામાં રોલઆઉટ કરવામાં આવી રહ્યું છે. કંપનીનો દાવો છે કે આગામી સમયમાં આમાં વધુ એડવાન્સ ફીચર્સ ઉમેરવામાં આવશે.

જો તમે એક સામાન્ય યુઝર છો જે માત્ર મનોરંજન માટે ઇન્સ્ટાગ્રામ ચલાવે છે, તો તમારા માટે ફ્રી વર્ઝન જ બેસ્ટ છે અને તમારે કોઈ પૈસા આપવાની જરૂર નથી. પરંતુ, જો તમે એક ગંભીર કન્ટેન્ટ ક્રિએટર, ઇન્ફ્લુએન્સર કે બિઝનેસ ઓનર છો અને તમારા ઓડિયન્સ એન્ગેજમેન્ટને ઊંડાણપૂર્વક સમજવા માંગો છો, તો ‘ઇન્સ્ટાગ્રામ પ્લસ’ ના એડવાન્સ ટુલ્સ તમારા માટે ખૂબ જ મદદરૂપ સાબિત થઈ શકે છે.