લોન્ચિંગ પહેલા જ Renault Duster Hybrid થઈ ‘સોલ્ડ આઉટ’, બુકિંગ પર લાગી બ્રેક
ભારતીય ઓટોમોબાઈલ માર્કેટમાં રેનો ડસ્ટરની એન્ટ્રીએ ભારે ઉત્તેજના જગાવી છે. રેનો ડસ્ટરનું પેટ્રોલ વર્ઝન પહેલેથી જ લોન્ચ થઈ ચૂક્યું છે, પરંતુ તેના હાઇબ્રિડ વર્ઝનને લઈને ગ્રાહકોમાં ગજબનો ક્રેઝ જોવા મળી રહ્યો છે. ચોંકાવનારી વાત એ છે કે, દિવાળી 2026માં લોન્ચ થનારા Duster Hybrid ના આ વર્ષના તમામ યુનિટ્સ લોન્ચિંગ પહેલા જ વેચાઈ ગયા છે, જેના કારણે કંપનીએ હાલમાં તેનું બુકિંગ બંધ કરવું પડ્યું છે.
રેનો ઈન્ડિયાના વાઇસ પ્રેસિડેન્ટ ફ્રાન્સિસ્કો હિડાલ્ગોએ લોન્ચ ઈવેન્ટ દરમિયાન જણાવ્યું હતું કે, ડસ્ટર હાઇબ્રિડને અપેક્ષા કરતા અનેકગણો સારો પ્રતિસાદ મળ્યો છે. ખાસ કરીને શહેરી વિસ્તારોમાં રહેતા 39 ટકા ખરીદદારોએ ટર્બો પેટ્રોલના બદલે હાઇબ્રિડ એન્જિન પર પસંદગી ઉતારી છે.
સેગમેન્ટમાં સૌથી પાવરફુલ હાઇબ્રિડ એન્જિન
નવી ડસ્ટર હાઇબ્રિડ તેના સેગમેન્ટની સૌથી શક્તિશાળી એસયુવી સાબિત થશે. તેની ટેકનિકલ વિગતો પર નજર કરીએ તો:
- એન્જિન: 1.8 લિટર, ચાર-સિલિન્ડર પેટ્રોલ એન્જિન.
- ઇલેક્ટ્રિક મોટર્સ: આમાં બે ઇલેક્ટ્રિક મોટર્સ (49 BHP ડ્રાઈવ મોટર અને 20 BHP જનરેટર મોટર) હશે.
- પાવર આઉટપુટ: આ સિસ્ટમ મળીને કુલ 160 BHP નો પાવર અને 172 Nm ટોર્ક જનરેટ કરશે.
- બેટરી: 1.4 kWh ની બેટરી અને મલ્ટી-મોડ ઓટોમેટિક ટ્રાન્સમિશન સાથે તે ડ્રાઈવિંગનો શ્રેષ્ઠ અનુભવ આપશે.
ડિઝાઇનની વાત કરીએ તો, ‘હાઇબ્રિડ’ બેજિંગ સિવાય આ કાર દેખાવમાં તેના સ્ટાન્ડર્ડ મોડલ જેવી જ હશે. કેબિન લેઆઉટ, સ્પેસ અને ફીચર્સ પણ સમાન રાખવામાં આવ્યા છે.
કિંમત અને સ્પર્ધા
રેનો ડસ્ટરના ટર્બો પેટ્રોલ વેરિઅન્ટ્સ હાલમાં 10.49 લાખથી 18.49 લાખ રૂપિયાની કિંમતમાં ઉપલબ્ધ છે. જોકે, હાઇબ્રિડ વર્ઝન ટેકનોલોજીના કારણે મોંઘું હશે. નિષ્ણાતોના મતે, ડસ્ટર હાઇબ્રિડની કિંમત 18 લાખથી 21 લાખ રૂપિયાની વચ્ચે હોઈ શકે છે.
ભારતીય બજારમાં લોન્ચ થયા પછી, ડસ્ટર હાઇબ્રિડનો સીધો મુકાબલો મારુતિ ગ્રાન્ડ વિટારા હાઇબ્રિડ, ટોયોટા હાઇરાઇડર અને ટૂંક સમયમાં આવનારી હ્યુન્ડાઈ ક્રેટા તથા કિયા સેલ્ટોસના હાઇબ્રિડ મોડલ્સ સાથે થશે.
ઉત્પાદન ક્ષમતા વધારવા પર ભાર
હાઇબ્રિડ મોડલની અભૂતપૂર્વ માંગને જોતા રેનો હવે ચેન્નાઈ સ્થિત તેના પ્લાન્ટમાં ઉત્પાદન ક્ષમતા વધારવા માટે મોટા પાયે કામ કરી રહી છે. કંપનીનું લક્ષ્ય છે કે દિવાળી સુધીમાં પ્રોડક્શન વધારીને ફરીથી બુકિંગ વિન્ડો ઓપન કરવામાં આવે જેથી વધુમાં વધુ ગ્રાહકો આ હાઈ-ટેક SUV મેળવી શકે.
