Brazil ; બ્રાઝિલના પૂર્વ રાષ્ટ્રપતિ જેયર બોલ્સોનારોને સુપ્રીમ કોર્ટ તરફથી મોટો ઝટકો લાગ્યો છે. બ્રાઝિલની સર્વોચ્ચ અદાલતે ભૂતપૂર્વ રાષ્ટ્રપતિ બોલ્સોનારોની ઇઝરાયેલ મુસાફરી કરવા માટે તેમનો પાસપોર્ટ પરત કરવાની વિનંતીને ફગાવી દીધી છે. આ અંગે જારી કરાયેલા એક સત્તાવાર દસ્તાવેજમાં આ માહિતી આપવામાં આવી છે. બોલ્સોનારોના વકીલે ગુરુવારે એક નિવેદનમાં જણાવ્યું હતું કે ઇઝરાયેલના વડા પ્રધાન બેન્જામિન નેતન્યાહુએ બોલ્સોનારોને મે મહિનામાં યોજાનારી એક કાર્યક્રમમાં આમંત્રણ આપ્યું છે. આવી સ્થિતિમાં તેણે સુપ્રીમ કોર્ટને પોતાનો પાસપોર્ટ પરત કરવાની વિનંતી કરી હતી.
સુપ્રીમ કોર્ટના જસ્ટિસ એલેક્ઝાન્ડર ડી મોરેસે પોતાના નિર્ણયમાં કહ્યું, “જેની સામે તપાસ ચાલી રહી છે તેના પર લાદવામાં આવેલા પ્રતિબંધને હટાવવાનું ખૂબ જ વહેલું છે.” પ્રોસિક્યુટર જનરલની ઓફિસે તેની દલીલમાં કહ્યું કે બોલ્સોનારોને દેશ છોડતા અટકાવવો જોઈએ. તેને રોકવા માટે તેનો પાસપોર્ટ જપ્ત કરવામાં આવ્યો હતો. ફેડરલ પોલીસે ભૂતપૂર્વ રાષ્ટ્રપતિ બોલ્સોનારો સામે દરોડો પાડ્યો હતો અને ફેબ્રુઆરીમાં તેમનો પાસપોર્ટ જપ્ત કર્યો હતો. બોલ્સોનારો પર 2022ના ચૂંટણી પરિણામોની અવગણના કરવા અને પરાજિત નેતાને સત્તામાં રાખવા માટે બળવોનું કાવતરું ઘડવાનો આરોપ છે.
ઉલ્લેખનીય છે કે બ્રાઝિલમાં રાષ્ટ્રપતિની ચૂંટણી વર્ષ 2022માં યોજાઈ હતી. ઓક્ટોબરમાં યોજાયેલી રાષ્ટ્રપતિની ચૂંટણીમાં બોલ્સોનારોનો પરાજય થયો હતો. લુઇઝ ઇનાસિયો લુલા દા સિલ્વાના નેતૃત્વમાં ડાબેરી પક્ષે ચૂંટણી જીતી હતી. લુઇઝ ઇનાસિયો લુલા દા સિલ્વાએ ત્રીજી વખત બ્રાઝિલના રાષ્ટ્રપતિ તરીકે શપથ લીધા. આ પછી, બોલ્સોનારોના સમર્થકોએ ચૂંટણી પરિણામો સ્વીકારવાનો ઇનકાર કરી દીધો. બોલ્સોનારોના સમર્થકો બ્રાઝિલમાં સૈન્ય મથકોની બહાર સૈન્ય હસ્તક્ષેપની માંગ સાથે વિરોધ પ્રદર્શન કરી રહ્યા હતા, જેના પગલે દેશમાં તોડફોડની ઘટનાઓ પણ બની હતી.