MG Windsor EV નો ખેલ ખતમ? મારુતિએ લોન્ચ કરી તેની પહેલી ઇલેક્ટ્રિક SUV e-Vitara, કિંમત ₹10.99 લાખથી શરૂ
ભારતીય ઓટોમોબાઈલ માર્કેટમાં જેની લાંબા સમયથી રાહ જોવાતી હતી, તે ક્ષણ આખરે આવી ગઈ છે. દેશની સૌથી મોટી કાર નિર્માતા કંપની મારુતિ સુઝુકીએ તેની પ્રથમ ઇલેક્ટ્રિક કાર e-Vitara સત્તાવાર રીતે લોન્ચ કરી દીધી છે. શાનદાર લુક અને લાંબી રેન્જ સાથે આવેલી આ ઇલેક્ટ્રિક SUV એ લોન્ચ થતાની સાથે જ બજારમાં ગરમાવો લાવી દીધો છે. ખાસ કરીને તેની કિંમત અને તેના નવા બિઝનેસ મોડલે હરીફ કંપનીઓની ઉંઘ ઉડાવી દીધી છે.
શું છે કિંમત અને BaaS મોડલ?
મારુતિએ e-Vitara ની શરૂઆતી કિંમત ₹10.99 લાખ (ઇન્ટ્રોડક્ટરી BaaS પ્રાઇસ) રાખી છે. અહીં સમજવા જેવી બાબત એ છે કે મારુતિએ પણ MG મોટરની જેમ BaaS (Battery-as-a-Service) મોડલ અપનાવ્યું છે. આ મોડલ હેઠળ, ગ્રાહકે કાર ખરીદતી વખતે બેટરીની આખી કિંમત ચૂકવવાની રહેતી નથી. તેના બદલે, બેટરીના વપરાશ માટે પ્રતિ કિલોમીટર ₹3.99 લેખે EMI ચૂકવવાનો રહેશે. આનાથી કારની શરૂઆતી કિંમત ઘણી ઓછી થઈ જાય છે, જે મધ્યમ વર્ગના ગ્રાહકો માટે ઇલેક્ટ્રિક કાર ખરીદવી સરળ બનાવે છે.
ડિઝાઇન અને ડાયમેન્શન
e-Vitara દેખાવમાં અત્યંત આધુનિક અને મજબૂત લાગે છે. તેની લંબાઈ 4,275mm, પહોળાઈ 1,800mm અને ઊંચાઈ 1,640mm છે. 2,700mm ના લાંબા વ્હીલબેઝને કારણે કારની અંદર પૂરતી જગ્યા મળી રહે છે. આ કારને ભારતમાં જ બનાવીને કંપની વિશ્વના 200 થી વધુ દેશોમાં નિકાસ કરવાનું આયોજન કરી રહી છે.
પ્રીમિયમ ઇન્ટિરિયર અને ફીચર્સ
મારુતિએ આ કારને અત્યાર સુધીની પોતાની સૌથી પ્રીમિયમ કાર ગણાવી છે. ઇન્ટિરિયરમાં તમને નીચે મુજબના હાઈ-ટેક ફીચર્સ જોવા મળશે:
- ડ્યુઅલ સ્ક્રીન સેટઅપ: 10.25-ઇંચનું ડિજિટલ ઇન્સ્ટ્રુમેન્ટ ક્લસ્ટર અને 10.1-ઇંચની ટચસ્ક્રીન ઇન્ફોટેનમેન્ટ સિસ્ટમ.
- કમ્ફર્ટ: વેન્ટિલેટેડ ફ્રન્ટ સીટ્સ અને 10-વે ઇલેક્ટ્રિકલી એડજસ્ટેબલ ડ્રાઇવર સીટ.
- લક્ઝરી: ફિક્સ્ડ ગ્લાસ સનરૂફ, એમ્બિયન્ટ લાઇટિંગ અને Harman ની ટ્યુન કરેલી પ્રીમિયમ ઓડિયો સિસ્ટમ.
- વર્સેટિલિટી: પાછળની સીટ્સ 40:20:40 સ્પ્લિટ રેશિયોમાં ફોલ્ડ કરી શકાય છે.
પાવરફુલ બેટરી અને રેન્જ
મારુતિ e-Vitara બે બેટરી પેક વિકલ્પો સાથે ઉપલબ્ધ છે:
1.49kWh બેટરી: જે 144hp નો પાવર અને 189Nm ટોર્ક જનરેટ કરે છે.
2.61kWh બેટરી: જે 174hp નો પાવર આપે છે. તેના ટોપ વેરિઅન્ટમાં 543 કિલોમીટર થી વધુની રેન્જ મળવાનો દાવો કરવામાં આવ્યો છે, જે આ સેગમેન્ટમાં સૌથી શ્રેષ્ઠ છે.
વિદેશી મોડલ્સમાં ઓલ-વ્હીલ ડ્રાઇવ (AWD) સિસ્ટમ પણ મળે છે, જેમાં કુલ પાવર 184hp સુધી પહોંચે છે.
સુરક્ષામાં કોઈ બાંધછોડ નહીં
સેફ્ટીના મામલે મારુતિએ આ વખતે કોઈ કસર બાકી રાખી નથી. કારમાં 7 એરબેગ્સ, ચારેય પૈડામાં ડિસ્ક બ્રેક અને ટાયર પ્રેશર મોનિટરિંગ સિસ્ટમ સ્ટાન્ડર્ડ તરીકે આપવામાં આવી છે. આ ઉપરાંત, તેમાં Level-2 ADAS ફીચર્સ જેવા કે એડેપ્ટિવ ક્રૂઝ કંટ્રોલ, લેન કીપિંગ આસિસ્ટ અને ઓટોમેટિક ઇમરજન્સી બ્રેકિંગ પણ ઉપલબ્ધ છે.
બજારમાં સ્પર્ધા
ભારતીય બજારમાં e-Vitara નો સીધો મુકાબલો હ્યુન્ડાઈ ક્રેટા EV, ટાટા કર્વ EV અને હાલની બેસ્ટ સેલિંગ ઇલેક્ટ્રિક કાર MG વિન્ડસર EV સાથે થશે. અત્યાર સુધી વિન્ડસર EV તેના BaaS મોડલને કારણે માર્કેટ પર રાજ કરતી હતી, પરંતુ હવે મારુતિએ સમાન વ્યૂહરચના અને વધુ મજબૂત સર્વિસ નેટવર્ક સાથે મેદાનમાં ઝંપલાવ્યું છે.
બુકિંગ વિગતો:
ગ્રાહકો આ કારને કોઈપણ NEXA શોરૂમ પર જઈને અથવા તેમની વેબસાઇટ દ્વારા માત્ર ₹21,000 માં બુક કરાવી શકે છે. કંપની હોમ ચાર્જર અને તેના ઇન્સ્ટોલેશન પર પણ ખાસ ઓફર્સ આપી રહી છે.
