Wi-Fiના ‘ડેડ ઝોન’થી પરેશાન છો? તમારો જૂનો એન્ડ્રોઇડ ફોન મફતમાં કરશે આ કમાલ
આજના સમયમાં ઘરમાં બધું જ હોય પણ જો વાઇફાઇના સિગ્નલ નબળા હોય, તો જાણે દુનિયા થંભી ગઈ હોય તેવું લાગે છે. આપણે ગમે તેટલું મોંઘું અને પાવરફુલ રાઉટર કેમ ન લગાવીએ, ઘરના કેટલાક ખૂણા એવા રહી જ જાય છે જ્યાં ઇન્ટરનેટના સિગ્નલ દમ તોડી દે છે. આને આપણે ‘ડેડ ઝોન’ કહીએ છીએ.
ભલે દુનિયા Wi-Fi 7 અને Wi-Fi 8 ની વાતો કરી રહી હોય, પરંતુ મોટા ઘરોમાં કવરેજની સમસ્યા આજે પણ એવી જ છે. આ સમસ્યાના ઉકેલ માટે લોકો અવારનવાર મોંઘા ‘મેશ સિસ્ટમ’ અથવા ‘વાઇફાઇ એક્સ્ટેન્ડર’ પાછળ હજારો રૂપિયા ખર્ચી નાખે છે. પરંતુ શું તમને ખબર છે કે તમારા કબાટમાં પડેલો તમારો જૂનો એન્ડ્રોઇડ ફોન આ સમસ્યાનો મફત અને સચોટ ઉકેલ છે?
જી હા, તમે તમારા જૂના ફોનને વાઇફાઇ એક્સ્ટેન્ડર તરીકે વાપરી શકો છો. ચાલો જાણીએ આ ‘દેશી જુગાડ’ પાછળનું વિજ્ઞાન અને તેને સેટ કરવાની રીત.
જૂનો ફોન કેવી રીતે બનશે વાઇફાઇ એક્સ્ટેન્ડર?
સામાન્ય રીતે આપણે ફોનના ‘મોબાઇલ હોટસ્પોટ’નો ઉપયોગ ત્યારે કરીએ છીએ જ્યારે આપણે સિમ કાર્ડનો ડેટા શેર કરવાનો હોય. પરંતુ વાઇફાઇ એક્સ્ટેન્ડર તરીકે કામ કરતી વખતે તમારો ફોન થોડો અલગ વ્યવહાર કરે છે.
તે તમારા મુખ્ય રાઉટર પાસેથી વાઇફાઇ સિગ્નલ મેળવશે (Receive) અને પછી તે જ વાઇફાઇ ડેટાને આગળ ફરીથી પ્રસારિત (Re-broadcast) કરશે. સરળ ભાષામાં કહીએ તો, તમારો ફોન એક પુલ (Bridge) જેવું કામ કરશે જે રાઉટરની પહોંચથી દૂર આવેલા રૂમો સુધી ઇન્ટરનેટના તરંગો પહોંચાડશે.
સ્ટેપ-બાય-સ્ટેપ ગાઇડ: ફોનને એક્સ્ટેન્ડર કેવી રીતે બનાવવો?
આ પ્રક્રિયા ખૂબ જ સરળ છે અને તેના માટે તમારે કોઈ ટેકનિકલ નિષ્ણાત હોવાની જરૂર નથી:
-
વાઇફાઇ સાથે કનેક્ટ કરો: સૌથી પહેલા તમારા જૂના એન્ડ્રોઇડ ફોનને ઘરના મુખ્ય વાઇફાઇ નેટવર્ક સાથે જોડો.
-
હોટસ્પોટ ઓન કરો: હવે ફોનના સેટિંગ્સમાં જઈને ‘Mobile Hotspot’ ચાલુ કરો. (નોંધ: આધુનિક એન્ડ્રોઇડ વર્ઝનમાં વાઇફાઇ અને હોટસ્પોટ એકસાથે કામ કરી શકે છે).
-
સેટિંગ્સ ફિક્સ કરો: હોટસ્પોટ સેટિંગ્સમાં ‘Auto-off’ વાળા વિકલ્પને બંધ કરી દો. આનાથી ફાયદો એ થશે કે જો કોઈ ડિવાઇસ કનેક્ટેડ ન હોય, તો પણ ફોન એક્સ્ટેન્ડરની જેમ સિગ્નલ ફેલાવતો રહેશે.
-
ફ્રીક્વન્સી પસંદ કરો: જો તમારો ફોન સપોર્ટ કરતો હોય, તો તમે 2.4GHz (વધારે અંતર માટે) અથવા 5GHz (વધારે સ્પીડ માટે) માંથી કોઈ એક પસંદ કરી શકો છો.
આ બાબતોનું ધ્યાન રાખવું ખૂબ જરૂરી છે
જૂના ફોનને 24 કલાક એક્સ્ટેન્ડર તરીકે ચલાવતા પહેલા આ બાબતો ગાંઠે બાંધી લેજો:
-
સિમ ડેટા બંધ રાખો: જો ફોનમાં સિમ કાર્ડ હોય, તો મોબાઇલ ડેટાને ડિસેબલ કરી દો. આનાથી એ સુનિશ્ચિત થશે કે ફોન માત્ર વાઇફાઇનો જ ઉપયોગ કરી રહ્યો છે.
-
યોગ્ય જગ્યાની પસંદગી: ફોનને રાઉટર અને પેલા ‘ડેડ ઝોન’ (જ્યાં ઇન્ટરનેટ નથી ચાલતું) ની બરાબર વચ્ચે રાખો. જો તમે ફોનને ડેડ ઝોનની સાવ અંદર મૂકી દેશો, તો તેને પોતાને જ સિગ્નલ નહીં મળે.
-
પાવર સપ્લાય: એક્સ્ટેન્ડર તરીકે કામ કરતી વખતે બેટરી ખૂબ જ ઝડપથી પૂરી થાય છે. તેથી ફોનને હંમેશા ચાર્જર સાથે કનેક્ટ રાખો.
-
બેટરીની તબિયત: જો તમારા ફોનમાં ‘Protect Battery’ અથવા ‘Charge Limit’ (80% સુધી ચાર્જિંગ) નું ફીચર હોય, તો તેને ઓન કરી દો. સતત 100% ચાર્જિંગ પર રહેવાથી જૂની બેટરી ફૂલી શકે છે.
-
બેટરી સેવર: ફોન પર બીજું કોઈ કામ કરવાનું નથી, તેથી ‘બેટરી સેવર મોડ’ ઓન રાખો જેથી ફોન ઓછો ગરમ થાય.
આ રીત કદાચ કોઈ પ્રોફેશનલ મેશ સિસ્ટમ જેટલી તાકાતવર ન હોય, પરંતુ એક રૂમ કે બાલ્કની સુધી ઇન્ટરનેટ પહોંચાડવા માટે આ સૌથી શ્રેષ્ઠ અને સસ્તો રસ્તો છે. તમારા જૂના ફોનને ભંગારમાં ફેંકવા કે કબાટમાં બંધ રાખવાને બદલે આ રીતે કામ પર લગાડવો એ પર્યાવરણ અને તમારા ખિસ્સા બંને માટે સારું છે.
