બેલફાસ્ટમાં ટીમ ઈન્ડિયાની શરમજનક હાર: આયર્લેન્ડ સામે પહેલીવાર આંચકો, કેપ્ટન શ્રેયસ અને ઉપ-કેપ્ટન તિલક ફ્લોપ!
ક્રિકેટ અનિશ્ચિતતાઓનો ખેલ છે અને અહીં કોઈપણ ટીમને નબળી સમજવાની ભૂલ ભારે પડી શકે છે. આવો જ એક મોટો ઉલટફેર બેલફાસ્ટના મેદાન પર જોવા મળ્યો, જ્યાં ક્રિકેટ જગતની પાવરહાઉસ ગણાતી અને વર્લ્ડ ચેમ્પિયન ટીમ ઈન્ડિયાને આયર્લેન્ડ સામેની પ્રથમ T20 મેચમાં 34 રનથી કારમી અને ઐતિહાસિક હારનો સામનો કરવો પડ્યો છે. ક્રિકેટના ઇતિહાસમાં આ પહેલીવાર બન્યું છે જ્યારે આયર્લેન્ડે કોઈપણ ફોર્મેટમાં ભારતને હરાવ્યું હોય. આ શરમજનક પરાજયની સાથે જ ભારતીય ટીમના નવા યુગની શરૂઆત ખરાબ સપના જેવી રહી છે, જ્યાં ટીમના નવા કેપ્ટન શ્રેયસ અય્યર અને ઉપ-કેપ્ટન તિલક વર્મા બંને સંપૂર્ણપણે નિષ્ફળ સાબિત થયા છે.
કેપ્ટન તરીકે શ્રેયસનું ખરાબ ડેબ્યૂ: નવો નબળો રેકોર્ડ
આ મેચ ભારતીય ક્રિકેટના ભવિષ્યની દ્રષ્ટિએ ખૂબ જ મહત્વપૂર્ણ હતી. રોહિત શર્મા અને વિરાટ કોહલી જેવા સિનિયર્સની ગેરહાજરીમાં શ્રેયસ અય્યરને ભારતીય T20 ટીમની કમાન સોંપવામાં આવી હતી, જ્યારે યુવા સ્ટાર તિલક વર્માને ઉપ-કેપ્ટન બનાવવામાં આવ્યો હતો. ચાહકોને આશા હતી કે આ નવી જોડી આયર્લેન્ડની ધરતી પર ધમાકો કરશે, પરંતુ વાસ્તવિકતા સાવ ઉલટી રહી.
નંબર 4 પર બેટિંગ કરવા આવેલા કેપ્ટન શ્રેયસ અય્યર પાસેથી મુશ્કેલ પરિસ્થિતિમાં કેપ્ટન ઇનિંગ્સની અપેક્ષા હતી. પરંતુ તે માત્ર 7 બોલ રમીને અને માત્ર 3 રન બનાવીને પેવેલિયન ભેગો થઈ ગયો. આયર્લેન્ડ તરફથી ડેબ્યૂ કરી રહેલા ફાસ્ટ બોલર મેટ હોલાર્ડે શ્રેયસને આઉટ કરીને ભારતને મોટો ઝટકો આપ્યો હતો. આ સસ્તા સ્કોર સાથે જ શ્રેયસના નામે એક શરમજનક રેકોર્ડ નોંધાયો – તે કેપ્ટન તરીકે ડેબ્યૂ મેચમાં સૌથી ઓછો સ્કોર બનાવનાર ભારતીય T20 કેપ્ટન બની ગયો છે.
તિલક વર્માની ધીમી બેટિંગે વધાર્યું દબાણ
શ્રેયસના આઉટ થયા બાદ ઇનિંગ્સને સંભાળવાની જવાબદારી ઉપ-કેપ્ટન તિલક વર્મા પર હતી. તિલકે ક્રીઝ પર ટકી રહેવાનો પ્રયાસ ચોક્કસ કર્યો, પરંતુ T20 ફોર્મેટના હિસાબે તેની બેટિંગ અત્યંત ધીમી રહી. રન રેટ વધારવાના બદલે તે રન માટે સંઘર્ષ કરતો જોવા મળ્યો હતો. તિલકે 21 બોલનો સામનો કરીને માત્ર 19 રન બનાવ્યા અને અંતે મેથ્યુ હમ્ફ્રીસનો શિકાર બન્યો. કેપ્ટન અને ઉપ-કેપ્ટનની આ નિષ્ફળતાને કારણે મિડલ ઓર્ડર પર દબાણ અસહ્ય બની ગયું અને બાકીની ટીમ પત્તાના મહેલની જેમ ધરાશાયી થઈ ગઈ.
Lowest Score by an Indian on T20I Captaincy Debut:
3 – Shreyas Iyer vs IRE, 2026
17 – Rohit Sharma vs SL, 2017
24 – Hardik Pandya vs IRE, 2022
25 – Ruturaj Gaikwad vs NEP, 2023
28 – Suresh Raina vs ZIM, 2010
Sony Liv | #IREvsIND pic.twitter.com/ph03bjXN03
— CricketGully (@thecricketgully) June 26, 2026
પત્તાના મહેલની જેમ વિખેરાઈ ગયું ભારતનું ટોપ ઓર્ડર
આયર્લેન્ડે ભારત સામે જીતવા માટે 183 રનનો મજબૂત લક્ષ્યાંક રાખ્યો હતો. આ સ્કોરનો પીછો કરવા ઉતરેલી ભારતીય ટીમની શરૂઆત ખરાબ નહીં, પણ અત્યંત ભયાનક રહી હતી
સંજુ સેમસન: મેચની બીજી જ ઓવરમાં માત્ર 5 રન બનાવીને આઉટ થઈ ગયો.
ઇશાન કિશન: ફોર્મ મેળવવા ઝંખતો ઇશાન પણ માત્ર 1 રન બનાવીને પેવેલિયન પરત ફર્યો.
