માર્કેટમાં હલચલ: E2E Networksના શેરે રોકાણકારોને કર્યા માલામાલ, ૩ વર્ષમાં ૧૬૦૦% રિટર્ન આપી રચ્યો ઈતિહાસ.
ભારતીય શેરબજારમાં જ્યારે મોટાભાગના આઈટી શેરો દબાણ હેઠળ હતા, ત્યારે E2E Networks ના શેરે કંઈક એવું કર્યું જેની કોઈએ કલ્પના સુધ્ધાં કરી નહોતી. દિવસની શરૂઆત સાધારણ ₹૨૫૬૦ ના સ્તરે ફ્લેટ ઓપનિંગ સાથે થઈ હતી, પરંતુ બપોરના સત્રમાં સમાચાર આવતા જ આ શેરમાં ખરીદીનું એવું પૂર આવ્યું કે જોતજોતામાં ૨૦% ની અપર સર્કિટ લાગી ગઈ. આ તેજી સાથે શેર તેના નવા શિખર ₹૩૦૬૮.૨૦ પર પહોંચી ગયો હતો.
NVIDIA સાથેનું જોડાણ: તેજીનું મુખ્ય કારણ
આ જબરદસ્ત ઉછાળા પાછળનું અસલી કારણ વૈશ્વિક ચિપ નિર્માતા કંપની NVIDIA ની જાહેરાત છે. ભારતમાં યોજાયેલી ‘AI Impact Summit’ દરમિયાન NVIDIA એ જાહેરાત કરી છે કે તેઓ ભારતમાં AI ઇનોવેશનને વેગ આપવા માટે લાર્સન એન્ડ ટુબ્રો (L&T), યોટ્ટા (Yotta) અને E2E Networks સાથે ભાગીદારી કરી રહ્યા છે.
NVIDIA ના બ્લોગ અનુસાર, આ ભાગીદારીનો હેતુ ભારતમાં ‘AI ફેક્ટરીઝ’ સ્થાપિત કરવાનો છે, જે નેક્સ્ટ જનરેશન ક્લાઉડ પ્રોવાઇડર્સ તરીકે કામ કરશે. આ સમાચાર આવતાની સાથે જ રોકાણકારો E2E Networks ના શેર પર તૂટી પડ્યા હતા, કારણ કે NVIDIA જેવી દિગ્ગજ કંપની સાથે નામ જોડાવું એ કોઈ પણ ટેક કંપની માટે ગૌરવની વાત છે.
રોકાણકારોની સંપત્તિમાં તોતિંગ વધારો
E2E Networks હવે માત્ર એક શેર નથી રહ્યો, પરંતુ રોકાણકારો માટે ‘કુબેરનો ખજાનો’ સાબિત થયો છે. છેલ્લા કેટલાક વર્ષોના આંકડા જોઈએ તો:
૩ વર્ષનું રિટર્ન: ૧૭ ફેબ્રુઆરી ૨૦૨૩ ના રોજ આ શેર માત્ર ₹૧૬૩ પર હતો, જે આજે ₹૩૦૬૮ પર છે. એટલે કે માત્ર ૩ વર્ષમાં ૧૬૦૦% થી વધુ રિટર્ન!
૫ વર્ષનું રિટર્ન: આ સમયગાળામાં શેરે આશરે ૧૯૦૦% જેટલું મલ્ટીબેગર રિટર્ન આપીને માર્કેટ કેપને ₹૫૮૭૦ કરોડ સુધી પહોંચાડી દીધું છે.
શું છે આ કંપનીનું ભવિષ્ય?
E2E Networks એ ભારતની અગ્રણી ક્લાઉડ કમ્પ્યુટિંગ પ્લેટફોર્મ પૂરી પાડતી કંપની છે. AI અને મશીન લર્નિંગના વધતા વ્યાપને કારણે હાઈ-પર્ફોર્મન્સ કમ્પ્યુટિંગની માંગ વધી છે. NVIDIA સાથેની આ પાર્ટનરશિપ બાદ હવે આ કંપની ગ્લોબલ પ્લેયર્સની હરોળમાં આવી ગઈ છે. માર્કેટ એક્સપર્ટ્સ માને છે કે જો AI સેક્ટરમાં ભારતની પ્રગતિ આવી જ રહી, તો આ શેર હજુ પણ નવા રેકોર્ડ બનાવી શકે છે.
ચેતવણી: શેરબજારમાં રોકાણ જોખમોને આધીન છે. કોઈ પણ શેરમાં રોકાણ કરતા પહેલા તમારા નાણાકીય સલાહકારની મદદ અવશ્ય લો.
