સોના-ચાંદીના ભાવમાં ઐતિહાસિક કડાકો

રવિવારે સોના-ચાંદીના ભાવ સ્થિર, પરંતુ ચાલુ સપ્તાહે જોવા મળ્યો અત્યાર સુધીનો સૌથી મોટો ઘટાડો

વૈશ્વિક બજારમાં બદલાતા સમીકરણો અને આંતરરાષ્ટ્રીય સ્તરે રાજકીય તણાવ હળવો થતાં જ બુલિયન માર્કેટમાં મોટો ભૂકંપ આવ્યો છે. છેલ્લા કેટલાક સમયથી આસમાને પહોંચેલા સોના અને ચાંદીના ભાવમાં ચાલુ અઠવાડિયે ઐતિહાસિક કડાકો જોવા મળ્યો છે. માત્ર પાંચ ટ્રેડિંગ સત્રમાં સોનાના ભાવમાં પ્રતિ ૧૦ ગ્રામ ₹૫,૦૦૦થી વધુનો ઘટાડો નોંધાયો છે, જ્યારે ઔદ્યોગિક વપરાશ અને રોકાણ માટે મહત્વની ગણાતી ચાંદી પ્રતિ કિલોગ્રામ ₹૨૦,૦૦૦ જેટલી સસ્તી થઈ ગઈ છે. રવિવાર (૨૧ જૂન ૨૦૨૬) ના રોજ વાયદા બજાર (MCX) અને સ્થાનિક બુલિયન માર્કેટ બંધ હોવાને કારણે કિંમતો સ્થિર રહી છે, પરંતુ અઠવાડિયાનો આ આઘાતજનક ઘટાડો ગ્રાહકો માટે ખરીદીની સુવર્ણ તક લઈને આવ્યો છે.

છેલ્લા કેટલાક મહિનાઓથી સોના અને ચાંદીના ભાવ સતત નવા રેકોર્ડ બનાવી રહ્યા હતા, જેના કારણે સામાન્ય ગ્રાહકો માટે દાગીના ખરીદવા મુશ્કેલ બની ગયા હતા. જો કે, આ અઠવાડિયું ખરીદદારો માટે મોટી રાહત લઈને આવ્યું છે. યુએસ-ઈરાન શાંતિ કરાર સફળતાપૂર્વક સંપન્ન થતાં જ મધ્ય પૂર્વ (મિડલ ઈસ્ટ) માં લાંબા સમયથી ચાલી રહેલો ભૌગોલિક-રાજકીય તણાવ અચાનક ઓછો થઈ ગયો છે. આ વૈશ્વિક સુધારાના કારણે આંતરરાષ્ટ્રીય બજારની સ્થિતિ સંપૂર્ણપણે બદલાઈ ગઈ છે અને રોકાણકારોનો સેિફંગ એસેટ્સ (સલામત રોકાણ) તરફનો ઝુકાવ ઘટ્યો છે.

કિંમતોમાં તીવ્ર ઘટાડાનું અસલી કારણ

બજારના ટોચના નિષ્ણાતોના જણાવ્યા અનુસાર, જ્યારે પણ વૈશ્વિક સ્તરે યુદ્ધ કે તણાવની સ્થિતિ હોય છે, ત્યારે મોટા કોર્પોરેશનો અને ફંડ હાઉસ શેરબજારમાંથી નાણાં પાછા ખેંચીને સોનામાં રોકાણ કરે છે. હવે જ્યારે વૈશ્વિક તણાવ હળવો થયો છે, ત્યારે આ મોટા રોકાણકારોએ ઉચ્ચ સ્તરે નફો બુક કરવાનું એટલે કે સોનું વેચવાનું શરૂ કરી દીધું છે. આ ભારે વેચવાલીના કારણે છેલ્લા પાંચ ટ્રેડિંગ સત્રોમાં હાજર સોનાના ભાવમાં પ્રતિ ૧૦ ગ્રામ ₹૫,૨૨૮નો જંગી ઘટાડો નોંધાયો છે. આગામી સમયમાં જે પરિવારોમાં લગ્ન પ્રસંગો છે, તેમના માટે આ ઘટાડો દાગીના બનાવવાની શ્રેષ્ઠ તક સાબિત થઈ શકે છે.

ચાંદીના ભાવમાં પણ મોટો કડાકો

સોનાની જેમ જ ચાંદીના ખરીદદારો માટે પણ આ અઠવાડિયું અદ્ભુત રહ્યું છે. માત્ર પાંચ દિવસની અંદર ચાંદીની કિંમતમાં પ્રતિ કિલોગ્રામ ₹૨૦,૦૯૨નો ઐતિહાસિક ઘટાડો જોવા મળ્યો છે. હાલમાં દેશમાં ૧ ગ્રામ ચાંદીનો ભાવ ₹૨૫૫ ના સ્તરે પહોંચી ગયો છે. આ હિસાબે સ્થાનિક બજારમાં ૧૦ ગ્રામ ચાંદીની કિંમત ₹૨,૫૫૦ અને ૧ કિલોગ્રામ ચાંદીનો ભાવ ₹૨,૫૫,૦૦૦ પર સ્થિર થયો છે.

દેશના મુખ્ય શહેરોમાં સોનાની સ્થિતિ (પ્રતિ ૧૦ ગ્રામ)

રવિવારે વાયદા બજાર બંધ હોવાને કારણે શુક્રવારના બંધ ભાવ જ આજે પણ લાગુ પડ્યા છે. દેશના મુખ્ય મહાનગરોમાં કિંમતો કંઈક આ પ્રમાણે છે:

• મુંબઈ અને કોલકાતા: આ બંને શહેરોમાં ૨૪ કેરેટ સોનાનો ભાવ પ્રતિ ૧૦ ગ્રામ ₹૧,૪૬,૦૮૦ આસપાસ છે, જ્યારે ૨૨ કેરેટનો ભાવ ₹૧,૩૩,૯૦૦ અને ૧૮ કેરેટનો ભાવ ₹૧,૦૯,૫૬૦ પર ટ્રેડ થઈ રહ્યો છે.

• દિલ્હી: દેશની રાજધાનીમાં ૨૪ કેરેટ સોનું ₹૧,૦૯,૨૩૦, ૨૨ કેરેટ સોનું ₹૧,૩૪,૦૫૦ અને ૧૮ કેરેટ સોનું ₹૧,૦૯,૭૧૦ ના સ્તરે છે.

• ચેન્નાઈ: દક્ષિણ ભારતના આ મુખ્ય શહેરમાં ૨૪ કેરેટ સોનાની કિંમત ₹૧,૪૮,૩૭૦, ૨૨ કેરેટની કિંમત ₹૧,૩૬,૦૦૦ અને ૧૮ કેરેટની કિંમત ₹૧,૧૩,૩૭૦ જોવા મળી રહી છે.

નિષ્ણાતોનું માનવું છે કે વૈશ્વિક બજારો હજુ પણ અસ્થિર છે, પરંતુ વર્તમાન ઘટાડો લાંબા ગાળાના રોકાણકારો અને વાસ્તવિક ગ્રાહકો માટે બજારમાં પ્રવેશવાનો બહુ સારો સમય છે.