કર્મચારીઓ ફફડાટમાં! મેટાના ચીફ ઓફિસરે વધુ છટણીના આપ્યા સંકેત, જાણો અંદરની મીટિંગમાં શું થયું
ટેક જાયન્ટ મેટા (Meta) માં તાજેતરમાં કરવામાં આવેલી મોટા પાયાની છટણી બાદ પણ સ્થિતિ થાળે પડતી દેખાઈ રહી નથી. હજુ ગયા મહિને જ કંપનીએ તેના કુલ વૈશ્વિક કર્મચારીઓના ૧૦ ટકા, એટલે કે અંદાજે ૮,૦૦૦ જેટલા લોકોને નોકરીમાંથી મુક્ત કરવાની જાહેરાત કરી હતી. પરંતુ હવે જે સંકેતો મળી રહ્યા છે તે કર્મચારીઓ માટે ચિંતાજનક છે. મેટાના આંતરિક વર્તુળોમાંથી જે સમાચારો બહાર આવ્યા છે તે મુજબ, નોકરીઓમાં કાપનો આ સિલસિલો હજુ અટકવાનો નથી.
ફેસબુક, ઇન્સ્ટાગ્રામ અને વોટ્સએપ જેવી દિગ્ગજ એપ્સની પેરેન્ટ કંપની ‘મેટા’ માં છેલ્લા કેટલાક સમયથી ભારે ઉથલપાથલ જોવા મળી રહી છે. કંપનીના ઇતિહાસની સૌથી મોટી છટણી બાદ પણ કર્મચારીઓના માથે હજુ આશંકાની તલવાર લટકી રહી છે. તાજેતરમાં યોજાયેલી એક ઇન્ટરનલ મીટિંગમાં કંપનીના ચીફ પીપલ ઓફિસર જેનલ ગેલ (Brynn Gale) દ્વારા આપવામાં આવેલા જવાબોએ કર્મચારીઓમાં ફફડાટ ફેલાવી દીધો છે.
ભવિષ્યમાં છટણીની કોઈ ગેરંટી નથી
કંપનીના કર્મચારીઓએ જ્યારે ગેલને પ્રશ્ન પૂછ્યો કે શું હવે છટણીની પ્રક્રિયા પૂરી થઈ ગઈ છે? ત્યારે જેનલ ગેલે સ્પષ્ટપણે જણાવ્યું હતું કે, તે એવું વચન આપી શકે નહીં કે ભવિષ્યમાં વધુ છટણી નહીં થાય. તેમણે સ્વીકાર્યું કે કંપનીનો બિઝનેસ હાલમાં મજબૂત સ્થિતિમાં છે, પરંતુ બદલાતી પ્રાથમિકતાઓ અને વૈશ્વિક બજારમાં વધી રહેલી હરીફાઈને કારણે કંપનીએ ખર્ચ પર અંકુશ રાખવો અનિવાર્ય છે. ગેલે ઉમેર્યું કે, “બિઝનેસની જરૂરિયાત મુજબ અને ખર્ચના સંતુલનને જાળવવા માટે અમારે કડક નિર્ણયો લેવા પડી શકે છે.”
ટીમ સ્ટ્રક્ચરમાં સતત ફેરફાર
મેટા હવે ‘લીન’ (Lean) બનવા પર ધ્યાન આપી રહી છે. કંપની તેના ટીમ સ્ટ્રક્ચરમાં મોટા ફેરફારો કરી રહી છે. મેનેજમેન્ટનું માનવું છે કે જ્યાં જરૂર નથી ત્યાં વધારાના સ્તરો દૂર કરવા જોઈએ. ગેલના જણાવ્યા અનુસાર, કંપની સતત તેની ટીમોની સમીક્ષા કરતી રહેશે. જો કોઈ પ્રોજેક્ટ કે વિભાગ કંપનીની નવી પ્રાથમિકતાઓમાં બંધબેસતો ન હોય, તો ત્યાં કાપ મૂકવામાં આવશે. જોકે, તેમણે એ પણ આશ્વાસન આપ્યું હતું કે જ્યાં શક્ય હશે ત્યાં અસરગ્રસ્ત કર્મચારીઓને અન્ય વિભાગોમાં ખાલી પડેલી ભૂમિકાઓમાં શિફ્ટ કરવાનો પ્રયાસ કરવામાં આવશે.
શું AI ખરેખર નોકરીઓ છીનવી રહ્યું છે?
ઘણા લોકો માને છે કે આર્ટિફિશિયલ ઇન્ટેલિજન્સ (AI) ના આગમન પછી મેટા જેવી કંપનીઓ કર્મચારીઓને કાઢી રહી છે. પરંતુ સીઈઓ માર્ક ઝકરબર્ગે આ અંગે સ્પષ્ટતા કરી છે. ઝકરબર્ગના મતે, AI એ છટણીનું મુખ્ય કારણ નથી. જોકે, તેમણે સ્વીકાર્યું કે AI ને કારણે નાની ટીમો હવે વધુ પ્રભાવશાળી અને કાર્યક્ષમ બની રહી છે. જે કામ માટે પહેલા ૧૦ લોકોની જરૂર પડતી હતી, તે કામ હવે AI ટૂલ્સની મદદથી ઓછા લોકો કરી શકે છે. પરંતુ કંપનીના મતે, આ માત્ર એક ભાગ છે; અર્થતંત્રમાં આવતા ઉતાર-ચઢાવ અને રોકાણકારોનું દબાણ પણ એટલું જ મોટું પરિબળ છે.
કર્મચારીઓની દેખરેખ અને ગોપનીયતા
કર્મચારીઓમાં એવી પણ ચર્ચા હતી કે મેટા તેમની દરેક ગતિવિધિ પર નજર રાખી રહી છે. આ અંગે ઝકરબર્ગે સ્પષ્ટ કર્યું હતું કે કંપની કર્મચારીઓની સીધી જાસૂસી નથી કરતી. કીબોર્ડ અને માઉસના ડેટાનો ઉપયોગ માત્ર એકાઉન્ટિંગ કે પ્રોડક્ટિવિટી ટ્રેકિંગ માટે નથી થતો, પરંતુ તે ડેટાને ‘એનોનિમસ’ (અનામી) રીતે એકઠો કરવામાં આવે છે જેથી કંપનીના AI મોડલ્સને વધુ સારા બનાવી શકાય. જોકે, કર્મચારીઓને આ બાબત પચી રહી નથી અને તેઓ પોતાની પ્રાઈવસી બાબતે ચિંતિત છે.
Hemangi – 1
કર્મચારીઓના મનોબળ પર અસર અને રાહત
સતત થઈ રહેલી છટણીને કારણે મેટાના કર્મચારીઓના મનોબળ (Morale) પર વિપરીત અસર પડી છે. કંપનીના કલ્ચર તરીકે ઓળખાતી ‘ઓપનનેસ’ હવે ક્યાંક ગાયબ થતી જણાય છે. જેનલ ગેલે સ્વીકાર્યું કે આ એક મુશ્કેલ પ્રક્રિયા છે અને તે કર્મચારીઓના માનસિક સ્વાસ્થ્યને અસર કરે છે.
રાહતની વાત એ છે કે મેટાએ અસરગ્રસ્ત કર્મચારીઓ માટે કેટલાક સહાયક પગલાં લીધા છે. જે કર્મચારીઓને કાઢવામાં આવ્યા છે, તેમને ૧૮ મહિના સુધી હેલ્થકેર કવર આપવાની સુવિધા જારી રાખવામાં આવી છે. આ ઉપરાંત, તેમને નવી નોકરી શોધવામાં મદદ કરવા માટે કરિયર સપોર્ટ પણ પૂરો પાડવામાં આવી રહ્યો છે.
AI માં જંગી રોકાણ અને ભવિષ્યની દિશા
એકબાજુ મેટા નોકરીઓમાં કાપ મૂકી રહી છે, તો બીજી બાજુ AI ક્ષેત્રમાં પાણીની જેમ પૈસા વહાવી રહી છે. કંપનીના એઆઈ હેડ એલેક્ઝાન્ડર વાંગે તાજેતરમાં ‘Spark’ નામનું નવું મૉડલ રજૂ કર્યું છે, જે મેટાના પ્લેટફોર્મ્સ પર યૂઝર એક્સપિરિયન્સને બદલી નાખશે. કંપનીના CFO સુસાન લીએ જણાવ્યું કે કંપની માટે હજુ પણ સૌથી મોટો પડકાર ‘રાઈટ-સાઈઝિંગ’ (કર્મચારીઓની યોગ્ય સંખ્યા નક્કી કરવી) છે. ટેકનોલોજી એટલી ઝડપથી બદલાઈ રહી છે કે કંપનીએ કયા વિભાગમાં કેટલા લોકો જોઈએ તે વારંવાર નક્કી કરવું પડે છે.
