રણબીર-આલિયાની દીકરી રાહાનું 3 વર્ષની ઉંમરે બોલિવૂડ ડેબ્યુ! ‘રામાયણ’ના સેટ પરથી ખાસ તસવીર વાયરલ
બોલિવૂડના જાણીતા અભિનેતા રણબીર કપૂર અને અભિનેત્રી આલિયા ભટ્ટની દીકરી રાહા કપૂરને લઈને એક મોટા સમાચાર સામે આવ્યા છે. માત્ર ચાર વર્ષની ઉંમરે રાહા ફિલ્મી દુનિયામાં પગ મૂકવા જઈ રહી છે. ખાસ વાત એ છે કે રાહાનું બોલિવૂડ ડેબ્યૂ કોઈ સામાન્ય ફિલ્મથી નહીં, પરંતુ રણબીર કપૂરની બહુચર્ચિત ફિલ્મ ‘રામાયણ’થી થવા જઈ રહ્યું છે. આ વાતનો ખુલાસો ખુદ રણબીર કપૂરે એક ઇન્ટરવ્યૂ દરમિયાન કર્યો છે. આ સમાચાર સામે આવ્યા બાદ કપૂર પરિવારના ચાહકોમાં ખુશીનો માહોલ જોવા મળી રહ્યો છે.
પિતાની ફિલ્મમાં જોવા મળશે નાનકડી રાહા
રણબીર કપૂર હાલમાં પોતાની આગામી ફિલ્મ ‘રામાયણ’ને લઈને ચર્ચામાં છે. આ ફિલ્મમાં તેઓ ભગવાન શ્રીરામની ભૂમિકા ભજવી રહ્યા છે. ફિલ્મના પ્રમોશન દરમિયાન રણબીરે પોતાની દીકરી રાહા વિશે એક ખાસ વાત જણાવી હતી.
તેમણે કહ્યું કે રાહાને નાનપણથી જ રામાયણની વાર્તાઓમાં ખૂબ રસ છે. રણબીર અને આલિયા બંને તેને વારંવાર રામાયણની વાર્તાઓ સંભળાવે છે. આ કારણે રાહાને આ પૌરાણિક કથા સાથે એક ખાસ લગાવ થઈ ગયો છે.
રણબીરે વધુમાં જણાવ્યું કે રાહા ઘણી વખત ફિલ્મના શૂટિંગ સેટ પર પણ આવી હતી. આ દરમિયાન તેણે સાઈ પલ્લવી અને લક્ષ્મણની ભૂમિકા ભજવતા રવિ દુબે સાથે એક શૂટિંગ શોટ પણ આપ્યો હતો. આમ, રાહા પણ આ ફિલ્મની સફરનો એક નાનકડો ભાગ બની ગઈ છે.
સાઈ પલ્લવી અને રવિ દુબે સાથે કર્યો શોટ
ફિલ્મમાં રણબીર કપૂર ભગવાન રામ, સાઈ પલ્લવી માતા સીતા અને રવિ દુબે લક્ષ્મણની ભૂમિકામાં જોવા મળશે. હવે આ કલાકારો સાથે રાહાએ પણ એક શોટ આપ્યો હોવાની વાત સામે આવી છે.
જોકે, ફિલ્મમાં રાહાની ભૂમિકા કેટલી મોટી હશે અથવા તે કેટલા સમય માટે પડદા પર જોવા મળશે તે અંગે હજુ વધારે વિગતો જાહેર કરવામાં આવી નથી. પરંતુ આ નાનકડી હાજરી તેના પરિવાર માટે ચોક્કસ યાદગાર બની રહેશે.
રાહા છે રણબીરના જીવનનો સૌથી મોટો આનંદ
ઇન્ટરવ્યૂ દરમિયાન રણબીરે દીકરી રાહા પ્રત્યેનો પ્રેમ પણ વ્યક્ત કર્યો હતો. જ્યારે તેમને પૂછવામાં આવ્યું કે તેમના જીવનમાં સૌથી વધુ પ્રકાશ કોણ લાવે છે, ત્યારે તેમણે તરત જ દીકરી રાહાનું નામ લીધું હતું.
રણબીરે રાહાને પોતાના જીવનનો ‘દીવો’ ગણાવી હતી. તેમણે જણાવ્યું કે દિવાળીનો તહેવાર અને રાહાનો જન્મદિવસ તેમના પરિવાર માટે ખૂબ ખાસ છે. રાહાનો જન્મદિવસ 6 નવેમ્બરના રોજ આવે છે, જ્યારે દિવાળીની ઉજવણી પણ આ જ સમયગાળામાં હોય છે.
‘રામાયણ’માં જોવા મળશે મોટા કલાકારો
નિર્દેશક નિતેશ તિવારીની ફિલ્મ ‘રામાયણ’ ભારતીય સિનેમાની સૌથી ચર્ચિત ફિલ્મોમાંની એક છે. ફિલ્મમાં રણબીર કપૂર ઉપરાંત સાઈ પલ્લવી, યશ, સની દેઓલ અને રવિ દુબે જેવા કલાકારો મહત્વની ભૂમિકામાં જોવા મળશે.
ફિલ્મનો પ્રથમ ભાગ 5 નવેમ્બર, 2026ના રોજ સિનેમાઘરોમાં રિલીઝ થવાનો છે, જ્યારે બીજો ભાગ દિવાળી 2027માં રિલીઝ કરવાની યોજના છે.
હવે ચાહકો માટે સૌથી મોટું આકર્ષણ એ રહેશે કે ફિલ્મના પડદા પર નાનકડી રાહાની ઝલક જોવા મળે છે કે નહીં. પિતા રણબીરની ફિલ્મ સાથે રાહાની આ ખાસ શરૂઆત કપૂર પરિવાર માટે એક સુંદર યાદ બની રહેશે.
