પાકિસ્તાન સુધી પહોંચ્યો રણબીર કપૂરની ‘રામાયણ’નો જાદુ, કરાચીના મંદિરમાં લાગ્યા ફિલ્મના પોસ્ટર!

પાકિસ્તાનમાં 4,000 કરોડી ‘રામાયણ’નો ભારે ક્રેઝ! ફેન્સે કહ્યું- આ ફિલ્મ બોક્સ ઓફિસના તમામ રેકોર્ડ તોડશે!

બૉલીવુડ સુપરસ્ટાર રણબીર કપૂર, યશ અને સાઈ પલ્લવીની આગામી ભવ્ય ફિલ્મ ‘રામાયણ’નો ખુમાર માત્ર ભારતમાં જ નહીં, પણ સરહદ પાર પાકિસ્તાનમાં પણ માથે ચડીને બોલી રહ્યો છે. વર્ષ 2026ની સૌથી મોસ્ટ અવેટેડ ફિલ્મોમાં સામેલ ‘રામાયણ’ને લઈને પાડોશી દેશના લોકોમાં અદ્ભુત ઉત્સાહ જોવા મળી રહ્યો છે. હાલમાં જ પાકિસ્તાનના કરાચી શહેરમાંથી એક એવો નજારો સામે આવ્યો છે, જેણે સોશિયલ મીડિયા પર સૌનું ધ્યાન ખેંચી લીધું છે.

કરાચીના મંદિરમાં લાગ્યું ‘રામાયણ’નું પોસ્ટર

હકીકતમાં, નિતેશ તિવારીના નિર્દેશનમાં બની રહેલી આ ફિલ્મને લઈને પાકિસ્તાનમાં રહેતા હિન્દુ સમુદાયના લોકોમાં ભારે ક્રેઝ જોવા મળી રહ્યો છે. કરાચીના એક પ્રસિદ્ધ મંદિર પરિસરમાં ત્યાંના લોકોએ ફિલ્મ ‘રામાયણ’નું મોટું પોસ્ટર લગાવ્યું છે.

સોશિયલ મીડિયા પર વાયરલ થઈ રહેલા એક વીડિયોમાં જોઈ શકાય છે કે મંદિરમાં પોસ્ટર લગાવવાની સાથે જ સ્થાનિક લોકો ખૂબ જ ખુશ દેખાઈ રહ્યા છે. તેઓ માત્ર ફિલ્મની આખી સ્ટારકાસ્ટ અને મેકર્સના વખાણ જ નથી કરી રહ્યા, પણ દિલ ખોલીને શુભેચ્છાઓ પણ આપી રહ્યા છે.

યુટ્યુબરે શેર કર્યો વીડિયો, ઓસ્કરની વ્યક્ત કરી આશા

કરાચીના એક સ્થાનિક યુટ્યુબરે આ આખી ઘટનાનો વીડિયો બનાવીને પોતાના સોશિયલ મીડિયા પ્લેટફોર્મ પર શેર કર્યો છે. વીડિયોમાં દેખાતા લોકોનું કહેવું છે કે આ ફિલ્મ ભારતીય સિનેમાના ઇતિહાસમાં એક નવો અધ્યાય લખશે.

વાતચીત દરમિયાન કેટલાક ફેન્સે આશા વ્યક્ત કરી કે આ ફિલ્મ બોક્સ ઓફિસના તમામ જૂના રેકોર્ડ તોડી નાખશે અને દુનિયાભરમાં ભારતનું નામ રોશન કરશે. તો વળી, કેટલાક ઉત્સાહી ફેન્સે તો ત્યાં સુધી કહી દીધું કે જે પ્રકારના ગ્રાન્ડ સ્કેલ પર આ ફિલ્મ બની રહી છે, તેને ઓસ્કર એવોર્ડ (Oscar Award) ચોક્કસ મળવો જોઈએ.

શું પાકિસ્તાનના સિનેમાઘરોમાં રિલીઝ થશે ‘રામાયણ’?

કરાચીના મંદિરમાં ફિલ્મનું પોસ્ટર લાગવા અને ફેન્સની દીવાનગી સામે આવ્યા બાદ હવે એ સવાલ ઝડપથી ઉઠી રહ્યો છે કે શું આ ફિલ્મ પાકિસ્તાનના થિયેટરોમાં રિલીઝ થઈ શકશે? ભારત અને પાકિસ્તાન વચ્ચે લાંબા સમયથી ચાલી રહેલા રાજકીય અને કૂટનીતિક તણાવના કારણે ત્યાં ભારતીય ફિલ્મોના પ્રદર્શન પર અવારનવાર બેન રહેતો હોય છે. એવામાં એ જોવું ખૂબ જ રસપ્રદ રહેશે કે શું ત્યાંનું સેન્સર બોર્ડ અને સરકાર આ બહુચર્ચિત ફિલ્મને સિનેમાઘરોમાં રિલીઝ કરવાની મંજૂરી આપે છે કે નહીં.

બે ભાગમાં આવી રહી છે 4000 કરોડની મહાગાથા

ફિલ્મ ‘રામાયણ’ના સ્કેલની વાત કરીએ તો આ ભારતીય સિનેમાના ઇતિહાસની સૌથી મોંઘી ફિલ્મોમાંથી એક બનવા જઈ રહી છે. રિપોર્ટ્સ અનુસાર, લગભગ 4,000 કરોડ રૂપિયાના ભારેખમ બજેટથી બની રહેલી આ ફિલ્મને બે ભાગમાં રિલીઝ કરવામાં આવશે.

• પહેલો ભાગ: 5 નવેમ્બર 2026ના રોજ સિનેમાઘરોમાં દસ્તક આપશે.

• બીજો ભાગ: દિવાળી 2027ના ખાસ અવસર પર રિલીઝ કરવાનું આયોજન છે.

આ મેગા પ્રોજેક્ટમાં રણબીર કપૂર (ભગવાન રામ), સાઈ પલ્લવી (માતા સીતા) અને યશ (રાવણ) ઉપરાંત સની દેઓલ, અરુણ ગોવિલ, રવિ દુબે, રકુલ પ્રીત સિંહ, લારા દત્તા, કુણાલ કપૂર અને વિવેક ઓબેરોય જેવા મજબૂત કલાકારોની ટીમ જોવા મળશે. હાલ તો, કરાચીના મંદિરથી આવેલી આ તસવીરે એ સાબિત કરી દીધું છે કે કળા અને સંસ્કૃતિને કોઈ સીમાડા નડિયા નથી!