ગુજરાતના પાટણ જિલ્લાના સરહદી વિસ્તારમાં SOG પોલીસે એક નકલી ડોક્ટરની ધરપકડ કરી છે, જે માત્ર 10 પાસ હતો. પરંતુ તેણે એક નાનકડા ગામમાં આઈસીયુવાળી હોસ્પિટલ ખોલી હતી. આ હોસ્પિટલ ગામમાં માત્ર 700 ઘરોના વિસ્તારમાં આવેલી હતી. પોલીસને આ કૌભાંડની જાણ ત્યારે થઈ જ્યારે SOGને બાતમી મળતાં ગામમાં દરોડો પાડી હોસ્પિટલમાં ચાલી રહેલા કાળા કારોબારનો પર્દાફાશ કર્યો હતો.
વાસ્તવમાં પાટણ જિલ્લાના સાંતલપુર તાલુકાના કોરડા ગામમાં સુરેશ ઠાકોર નામના વ્યક્તિએ ઘરની ઉપર આઈસીયુ હોસ્પિટલ બનાવી હતી. તે છેલ્લા 10 વર્ષથી નકલી ડોક્ટર બનીને હજારો લોકોની સારવાર કરતો હતો. આ હોસ્પિટલમાં નકલી આઈસીયુ હતું, જેમાં સારવારના નામે દર્દીઓ સાથે છેતરપિંડી કરવામાં આવતી હતી.
પોલીસે બાતમીના આધારે દરોડો પાડતાં ત્યાંથી 13 લાખથી વધુની કિંમતની એલોપેથિક દવાઓ જપ્ત કરી હતી. પોલીસે સુરેશ ઠાકોર નામના નકલી તબીબની અટકાયત કરી, તેની સામે ગુનો નોંધી વધુ તપાસ શરૂ કરી છે. પોલીસે આરોપી ડોક્ટરના કોર્ટમાંથી ત્રણ દિવસના રિમાન્ડ મેળવ્યા છે.
પોલીસે આ કેસમાં આ મુજબ જણાવ્યું હતું
ડીવાયએસપી રાધનપુરના ડી.ડી.ચૌધરીએ જણાવ્યું કે, હોસ્પિટલના બોર્ડમાં અન્ય ડોકટરોના નામ પણ લખવામાં આવ્યા છે, જેની ભૂમિકા તપાસવામાં આવશે. પોલીસ એ પણ શોધી કાઢશે કે હોસ્પિટલમાં કોઈ દર્દીનું મૃત્યુ થયું છે કે કેમ અને આ સિવાય અન્ય ડોક્ટરોની મિલીભગતની પણ તપાસ કરવામાં આવશે. પોલીસે નકલી હોસ્પિટલના મામલામાં ગંભીરતાથી તપાસ શરૂ કરી છે અને આ બાબત પ્રકાશમાં આવતાં જ મેડિકલ ફ્રોડ સામે મોટું પગલું ભરવામાં આવ્યું છે.
