હાલ ઉનાળાનું વેકેસન ચાલી રહ્યું છે, લોકો ફરવાના સ્થળો પર જય રહ્યા છે. દેશ ભરના મોટા ભાગના ફરવાના સ્થળો પર લોકોની ભીડ જોવા મળી રહી છે. ત્યારે દીવ ખાતે પણ સહેલાણીઓની ભારે ભીડ જોવા મળે છે. આ વચ્ચે રાજયમાં ચોમાસાનું પણ આગમન થઈ રહ્યું છે. ત્યારે પર્યટન સ્થળ દીવમાં જિલ્લા કલેકટર ફોરમન બ્રહ્માના આદેશ અનુસાર તા. 01 જૂનથી 31 ઓગસ્ટ સુધી દીવના તમામ બીચો તેમજ દરિયામાં નાહવા પર પર્યાટકો તેમજ સ્થાનિક લોકો પર પ્રતિબંધ મૂકવામાં આવ્યો છે. જોકે પર્યાટકો બીચ પર ફરી શકશે, પરંતુ નાહવા કે દરિયામાં નહિ જઈ શકે. કલેકટરના આ આદેશને લઈને દીવ પોલીસ વિભાગ પર્યાટકો તેમજ સ્થાનિક લોકોને દરિયામાં જતા અટકાવી રહ્યા છે.
દીવના દરિયા કિનારે આમ તો કાયમી ધોરણે અહીં પોલીસનો પહેરો જોવા મળે છે. પરંતુ હવેથી પોલીસ સ્ટાફ સતત તહેનાત રહેશે અને જો કોઈ પ્રવાસી દરિયા નજીક ઘૂસી નાહવાનો પ્રયત્ન કરશે તો તેમની સામે કાર્યવાહી કરવામાં આવનાર હોવાનું પણ જાણવા મળી રહ્યું છે. હાલ પણ પોલીસ પર્યટકો તેમજ સ્થાનિક લોકોને દરિયામાં જતા અટકાવતી જોવા મળી રહી છે. જોકે, દીવમાં આવનારા પર્યટકો શહેરમાં આવેલા ઐતિહાસિક સ્થળોએ ઉપર હરીફરી શકશે.
હાલ ચોમાસાની શરૂઆત થતી હોવાથી દરિયામાં વધુ પ્રમાણમાં કરંટ અને પવન સાથે મોટાં મોજાં થતા હોવાથી માનવ જિંદગીને દરિયામાં જવાનો ખતરો વધી જતો હોય છે. ત્યારે જિલ્લા કલેક્ટરે આ આદેશ જાહેર કરી કલમ 144 લગાડવામાં આવી છે. અને આ બાબતે કોઈ કાયદાનું ઉલ્લઘન કરશે તો IPC 188 અને 291 ધારા હેઠળ કાનૂની કાર્યવાહી કરવામાં આવશે. આમ જો કોઈ વ્યક્તિ દરિયામાં ન્હાતા પકડાશે તો તેમની સામે એફઆરઆઈ પણ દાખલ થઈ શકે છે.
