“બજરંગબલીનો પ્રિય ભોગ”: હનુમાન જયંતિ પર ઘરે બનાવો શુદ્ધ બુંદીના લાડુ, જાણો સૌથી સરળ રીત.
આવતીકાલે, ૨ એપ્રિલ ૨૦૨૬ ના રોજ સમગ્ર દેશમાં ‘હનુમાન જયંતિ’ ની ધામધૂમથી ઉજવણી કરવામાં આવશે. હનુમાનજીની પૂજામાં બુંદીના લાડુનું વિશેષ મહત્વ છે. ઘણીવાર ભક્તો બજારમાંથી પ્રસાદ લાવતા હોય છે, પરંતુ આ વર્ષે તમે ઘરે જ શુદ્ધ દેશી ઘીમાં કેસરીયા બુંદીના લાડુ બનાવીને દાદાને ભોગ ધરાવી શકો છો. સોજી અને ચણાના લોટના મિશ્રણથી બનતા આ લાડુ સ્વાદિષ્ટ હોવાની સાથે પૌષ્ટિક પણ છે.
જરૂરી સામગ્રી:
-
ચણાનો લોટ: ૨૫૦ ગ્રામ
-
સોજી: ૫૦ ગ્રામ (કરકરા સ્વાદ માટે)
-
ખાંડ: ૧ કપ (ચાસણી માટે)
-
એલચી પાવડર: ૨ ચમચી
-
ડ્રાયફ્રૂટ્સ (કાજુ-બદામના ટુકડા): ૧ કપ
-
પીળો/કેસરી ફૂડ કલર: ૧ ચમચી
-
દેશી ઘી: ૩૦૦ ગ્રામ (તળવા માટે)
બુંદીના લાડુ બનાવવાની સ્ટેપ-બાય-સ્ટેપ રીત:
૧. ચણાના લોટનું મિશ્રણ (Batter) તૈયાર કરો:
સૌ પ્રથમ એક મોટા બાઉલમાં ચણાનો લોટ અને સોજી મિક્સ કરો. હવે તેમાં ધીમે-ધીમે પાણી ઉમેરીને મધ્યમ જાડું ખીરું તૈયાર કરો. ધ્યાન રાખો કે ખીરામાં કોઈ ગઠ્ઠા (Lumps) ન રહે. આ મિશ્રણને ૧૦ મિનિટ માટે ઢાંકીને રહેવા દો જેથી સોજી સરસ રીતે ફૂલી જાય.
૨. ચાસણી બનાવવાની રીત:
એક તપેલીમાં ખાંડ અને તેની સમાન માત્રામાં પાણી લઈને ગરમ કરવા મૂકો. ખાંડ સંપૂર્ણ ઓગળી જાય પછી તેને ૫ મિનિટ સુધી ઉકાળો. જ્યારે એક તારની ચાસણી બનવા લાગે, ત્યારે તેમાં એલચી પાવડર અને ફૂડ કલર ઉમેરી ગેસ બંધ કરી દો.
૩. બુંદી પાડવાની પ્રક્રિયા:
કઢાઈમાં દેશી ઘી ગરમ કરો. ઘી બરાબર ગરમ થાય એટલે મીડિયમ કાણાંવાળો ઝારો (બુંદી પાડવાનો ઝારો) લો. ઝારા પર લોટનું ખીરું રેડીને હળવા હાથે ટેપ કરો, જેથી ગોળ બુંદી ઘીમાં પડે. બુંદી સહેજ સોનેરી અને ક્રિસ્પી થાય એટલે તેને બહાર કાઢી લો.
૪. ચાસણીમાં પલાળવી:
તળેલી ગરમ બુંદીને તરત જ તૈયાર કરેલી ગરમ ચાસણીમાં નાખો. બુંદીને ૧૦-૧૫ મિનિટ સુધી ચાસણીમાં રહેવા દો જેથી તે ચાસણીને બરાબર સોષી લે. ત્યારબાદ વધારાની ચાસણી નિતારીને બુંદીને એક થાળીમાં કાઢી લો અને તેમાં ડ્રાયફ્રૂટ્સના ટુકડા ભેળવો.
૫. લાડુ વાળવાની રીત:
બુંદી થોડી નવશેકી ગરમ હોય ત્યારે જ હથેળીમાં ઘી લગાવીને નાના કે મોટા ગોળ લાડુ વાળી લો. લાડુ સંપૂર્ણ ઠંડા થાય એટલે તે તૈયાર છે.
આવતીકાલે હનુમાન જયંતિ પર આ શુદ્ધ પ્રસાદ બનાવીને હનુમાનજીને અર્પણ કરો. ઘરે બનાવેલો આ પ્રસાદ ભક્તિ અને શુદ્ધતાનો સંગમ છે.
