ખાંડ વગર બનાવો આમલીની ખાટી-મીઠી કેન્ડી; બાળકોને ખવડાવો નિફિકર થઈને, ઝટપટ નોંધી લો રેસીપી
આમલીની ખાટી-મીઠી કેન્ડીનું નામ સાંભળતા જ બાળપણની યાદો તાજી થઈ જાય છે. તેનો ચટપટો સ્વાદ બાળકોની સાથે મોટેરાઓને પણ ખૂબ ગમે છે. જોકે, બજારમાં મળતી કેન્ડીમાં ઘણીવાર વધુ પડતી ખાંડ, આર્ટિફિશિયલ રંગો અને પ્રિઝર્વેટિવ્સ હોય છે, જે સ્વાસ્થ્ય માટે હાનિકારક બની શકે છે. આવી સ્થિતિમાં, તમે ઘરે જ ખાંડ વગર હેલ્ધી અને ટેસ્ટી આમલીની કેન્ડી બનાવી શકો છો. આ કેન્ડી બનાવવી ખૂબ જ સરળ છે અને તેમાં ગોળ કે ખજૂરનો ઉપયોગ કરી શકાતો હોવાથી તે પૌષ્ટિક પણ છે.
કેન્ડી બનાવવા માટેની જરૂરી સામગ્રી:
- આમલીનો પલ્પ (કૂચો): 1 કપ
- ગોળનો પાવડર અથવા ખજૂરની પેસ્ટ: 2 થી 3 ચમચી
- સંચળ (કાળું મીઠું): અડધી ચમચી
- શેકેલા જીરાનો પાવડર: અડધી ચમચી
- લાલ મરચું પાવડર: એક ચપટી (સ્વાદ મુજબ)
આમલીની કેન્ડી બનાવવાની સ્ટેપ-બાય-સ્ટેપ રીત:
સ્ટેપ 1: સૌથી પહેલા આમલીના પલ્પને (બીજ કાઢીને તૈયાર કરેલો માવો) એક પેનમાં કાઢી લો અને તેને ધીમી આંચ પર થોડો ગરમ કરો.
સ્ટેપ 2: હવે તેમાં ગોળનો પાવડર અથવા ખજૂરની પેસ્ટ ઉમેરો અને બન્ને મિશ્રણને બરાબર મિક્સ કરો જેથી તે એકરસ થઈ જાય.
સ્ટેપ 3: ત્યારબાદ તેમાં સંચળ, શેકેલા જીરાનો પાવડર અને લાલ મરચું પાવડર ઉમેરો. આ મિશ્રણને ત્યાં સુધી હલાવતા રહો જ્યાં સુધી તે ઘટ્ટ (ગઠ્ઠો વળે તેવું) ન થઈ જાય.
સ્ટેપ 4: જ્યારે મિશ્રણ તૈયાર થઈ જાય ત્યારે ગેસ બંધ કરી તેને થોડું ઠંડુ થવા દો. મિશ્રણ હાથમાં લઈ શકાય તેવું ઠંડુ થાય એટલે તેના નાના-નાના ગોળા અથવા તમને ગમતો કેન્ડીનો આકાર આપો.
સ્ટેપ 5: આ કેન્ડીને વધુ સારી રીતે સેટ કરવા માટે તમે તેને થોડીવાર ફ્રીજમાં પણ મૂકી શકો છો.
સ્ટેપ 6: તૈયાર છે તમારી શુદ્ધ અને પૌષ્ટિક ખાટી-મીઠી આમલીની કેન્ડી! તમે તેને એરટાઈટ બરણીમાં ભરીને રાખી શકો છો અને બાળકોને ટિફિનમાં પણ આપી શકો છો.
આ કેન્ડીના ફાયદા
ઘરે બનાવેલી આ કેન્ડીમાં ખાંડનો ઉપયોગ થતો નથી, તેથી તે દાંતને નુકસાન કરતી નથી. વળી, તેમાં રહેલું જીરું અને સંચળ પાચનક્રિયામાં પણ મદદરૂપ થાય છે. આ ઉનાળામાં જ્યારે બાળકો કંઈક ચટપટું ખાવાની જીદ કરે, ત્યારે આ હોમમેડ કેન્ડી એક ઉત્તમ વિકલ્પ છે.
