આંતરડામાં સોજો આવવાના લક્ષણો શું છે? જાણો કઈ રીતે ખબર પડશે કે તમારા આંતરડામાં સમસ્યા છે
Contents
આંતરડામાં સોજો એ એક ક્રોનિક સ્થિતિ છે જે તમારા સમગ્ર પાચનતંત્રને અસર કરે છે. તેના લક્ષણો ક્યારેક અચાનક દેખાય છે તો ક્યારેક ધીમે ધીમે વધતા જાય છે. સમયસર તેની ઓળખ કરવી અત્યંત જરૂરી છે.
આંતરડામાં સોજાના મુખ્ય લક્ષણો
આંતરડામાં સોજો ઓછો કે વધારે હોઈ શકે છે. જો તમને નીચે મુજબના ફેરફારો જણાય, તો તુરંત ડોક્ટરનો સંપર્ક કરવો જોઈએ:
- પેટમાં દુખાવો: પેટના નીચેના ભાગમાં સતત દુખાવો રહેવો અથવા વારંવાર ખેંચાણ (Cramps) અનુભવવી.
- મળમાં લોહી: શૌચ દરમિયાન મળમાં લોહી દેખાવું એ સોજાનું ગંભીર લક્ષણ છે.
- ક્રોનિક ડાયરિયા: લાંબા સમય સુધી ઝાડાની સમસ્યા રહેવી, જેમાં મળ અત્યંત પાતળો આવે છે.
- થાક અને નબળાઈ: પૂરતો આરામ કરવા છતાં શરીર હંમેશા થાકેલું અને નબળું અનુભવવું.
- વજન ઘટવું: કોઈપણ કારણ વગર અચાનક વજનમાં ઘટાડો થવો.
કયો ખોરાક આંતરડામાં સોજો વધારી શકે છે?
અમુક પ્રકારના પીણાં અને ખોરાક આંતરડાની તકલીફમાં વધારો કરી શકે છે:
- આલ્કોહોલ (દારૂ) અને કેફીનયુક્ત પીણાં (ચા-કોફી).
- કાર્બોનેટેડ ડ્રિંક્સ (સોડા/કોલ્ડ ડ્રિંક્સ).
- દૂધ અને ડેરી પ્રોડક્ટ્સ (જો લેક્ટોઝ ઈન્ટોલરન્સ હોય તો).
- વધારે પડતું ફાઈબર ધરાવતી વસ્તુઓ અથવા વધુ પડતો તેલ-મસાલા વાળો ખોરાક.
સોજો લાંબો સમય રહે તો કઈ બીમારીઓ થઈ શકે?
જો આંતરડાના સોજાની સમયસર સારવાર ન કરવામાં આવે તો તે જીવલેણ બની શકે છે:
- કોલોન કેન્સર: જેમને આંતરડામાં લાંબા સમય સુધી સોજો રહેતો હોય, તેમને આંતરડાના કેન્સરનું જોખમ વધી જાય છે.
- આંતરડામાં છિદ્ર (Perforation): સોજાને કારણે આંતરડામાં કાણું પડી શકે છે, જેનાથી પેટમાં અસહ્ય દુખાવો અને સોજો આવે છે.
- ટોક્સિક મેગાકોલોન: આ એક જીવલેણ સ્થિતિ છે જેમાં આંતરડું અસાધારણ રીતે ફૂલીને પહોળું થઈ જાય છે. આ સ્થિતિમાં તાત્કાલિક સર્જરીની જરૂર પડે છે.
અન્ય સંભવિત જોખમો
આંતરડાની સમસ્યા માત્ર પાચન પૂરતી મર્યાદિત નથી રહેતી, તે અન્ય અંગોને પણ અસર કરે છે:
- શરીરમાં લોહીની કમી (એનિમિયા) થવી.
- સાંધામાં સોજો અને હાડકાં નબળા પડવા.
- લિવરની સમસ્યાઓ અને પથરી થવાની શક્યતા.
- આંખોમાં દુખાવો, મોઢામાં ચાંદા અને શરીર પર રેશેશ (ચકામા) થવા.
આંતરડાના સ્વાસ્થ્યને હળવાશથી ન લો. જો પાચનને લગતી સમસ્યાઓ અઠવાડિયાથી વધુ સમય સુધી ચાલુ રહે, તો તે ઈન્ફ્લેમેટરી બાઉલ ડિસીઝ હોઈ શકે છે.
