ચેન્નાઈ સુપર કિંગ્સની મોટી જાહેરાત: ઝહીર ખાન IPL 2027 માટે હેડ કોચ બન્યા
ઈન્ડિયન પ્રીમિયર લીગ (IPL) 2027 શરૂ થાય તે પહેલાં ચેન્નાઈ સુપર કિંગ્સ (CSK)એ પોતાની કોચિંગ ટીમમાં મોટો ફેરફાર કર્યો છે. ફ્રેન્ચાઇઝીએ ભારતના ભૂતપૂર્વ ઝડપી બોલર ઝહીર ખાનને આગામી IPL સિઝન માટે ટીમના નવા હેડ કોચ તરીકે નિયુક્ત કર્યા છે. આ સાથે ઝહીર હવે ચેન્નાઈને તેનું છઠ્ઠું IPL ટાઇટલ અપાવવાના લક્ષ્ય સાથે નવી જવાબદારી સંભાળશે.
ઝહીર ખાન માટે આ નિયુક્તિ કોચિંગ કારકિર્દીમાં મહત્વપૂર્ણ તબક્કો છે. ખેલાડી તરીકે IPLમાં લાંબો અનુભવ ધરાવનાર ઝહીર હવે ટૂર્નામેન્ટની સૌથી સફળ ફ્રેન્ચાઇઝીઓમાંની એક ચેન્નાઈ સુપર કિંગ્સનું નેતૃત્વ કોચ તરીકે કરશે. તેઓ સ્ટીફન ફ્લેમિંગનું સ્થાન લેશે, જેમણે લાંબા સમય સુધી CSKના મુખ્ય કોચ તરીકે ટીમ સાથે કામ કર્યું હતું.ફ્લેમિંગે 2009થી 2026 સુધી લગભગ 18 વર્ષ ચેન્નાઈની કોચિંગ જવાબદારી સંભાળી હતી. તેમના કાર્યકાળ દરમિયાન ટીમે અનેક મોટી સફળતાઓ મેળવી. હવે ફ્લેમિંગે ઈંગ્લેન્ડની ક્રિકેટ ટીમ સાથે નવી જવાબદારી સ્વીકારી છે અને જુલાઈમાં તેમને ઈંગ્લેન્ડની પુરુષ ટેસ્ટ ટીમના હેડ કોચ તરીકે નિયુક્ત કરવામાં આવ્યા હતા.
IPLમાં ખેલાડીથી લઈને કોચ સુધીનો ઝહીરનો સફર
ઝહીર ખાનની IPL સાથેની સફર માત્ર એક ટીમ પૂરતી મર્યાદિત રહી નથી. 2017માં ખેલાડી તરીકે IPLમાંથી નિવૃત્તિ લીધા બાદ તેમણે કોચિંગ અને ક્રિકેટ મેનેજમેન્ટની વિવિધ ભૂમિકાઓ સંભાળી છે.ખેલાડી તરીકે ઝહીર રોયલ ચેલેન્જર્સ બેંગલુરુ, મુંબઈ ઈન્ડિયન્સ અને દિલ્હી કેપિટલ્સ જેવી ફ્રેન્ચાઇઝીઓ સાથે જોડાયેલા હતા. IPLમાં તેમણે કુલ 100 મેચ રમી અને 27.27ની સરેરાશથી 102 વિકેટ ઝડપી હતી. આ અનુભવ હવે CSKના કોચ તરીકે તેમની નવી ભૂમિકામાં ઉપયોગી થઈ શકે છે.
2019ની IPL પહેલાં મુંબઈ ઈન્ડિયન્સે ઝહીરને ડાયરેક્ટર ઓફ ક્રિકેટ ઓપરેશન્સ તરીકે નિયુક્ત કર્યા હતા. ત્યારબાદ તેમણે ફ્રેન્ચાઇઝીમાં હેડ ઓફ ગ્લોબલ ડેવલપમેન્ટની ભૂમિકા પણ સંભાળી હતી. આ જવાબદારીઓ દરમિયાન તેમને ખેલાડીઓના વિકાસ અને ટીમ મેનેજમેન્ટ સાથે નજીકથી કામ કરવાનો અનુભવ મળ્યો.ઝહીર તાજેતરમાં લખનૌ સુપર જાયન્ટ્સ સાથે પણ જોડાયેલા હતા. તેમને IPL 2025 માટે ટીમના મેન્ટર તરીકે નિયુક્ત કરવામાં આવ્યા હતા. જોકે, આગામી સિઝન પહેલાં તેમણે લખનૌ ફ્રેન્ચાઇઝીથી અલગ થવાનો નિર્ણય લીધો હતો. હવે તેમની કારકિર્દીનો આગામી અધ્યાય ચેન્નાઈ સુપર કિંગ્સ સાથે શરૂ થશે.
CSKમાં જોડાયા બાદ ઝહીરે વ્યક્ત કર્યો ઉત્સાહ
ચેન્નાઈ સુપર કિંગ્સ સાથે જોડાયા બાદ ઝહીરે ફ્રેન્ચાઇઝીનો ભાગ બનવા બદલ ખુશી વ્યક્ત કરી છે. તેમણે કહ્યું કે આ ટીમ સાથે જોડાવું તેમના માટે ગૌરવની વાત છે. ખેલાડી તરીકે જ્યારે તેઓ IPLમાં રમતા હતા ત્યારે ચેન્નાઈ સામે રમવાનો અનુભવ તેમને ગમતો હતો.ઝહીરે ખાસ કરીને ચેપોક સ્ટેડિયમમાં CSKના ચાહકો દ્વારા ઊભા કરવામાં આવતા માહોલનો ઉલ્લેખ કર્યો. ચેન્નાઈની ક્રિકેટ સંસ્કૃતિ અને ફ્રેન્ચાઇઝીના લાંબા ઇતિહાસનો હિસ્સો બનવા માટે તેઓ ઉત્સાહિત હોવાનું તેમણે જણાવ્યું.
ઝહીરની આંતરરાષ્ટ્રીય કારકિર્દી પણ નોંધપાત્ર રહી છે. ભારત માટે ત્રણેય ફોર્મેટમાં તેમણે કુલ 610 વિકેટ ઝડપી હતી. હવે આંતરરાષ્ટ્રીય ક્રિકેટમાં પોતાના અનુભવ અને IPLમાં ખેલાડી તરીકેના જ્ઞાનને તેઓ કોચ તરીકે ઉપયોગમાં લાવશે.CSK માટે પણ આ ફેરફાર મહત્વપૂર્ણ છે. સ્ટીફન ફ્લેમિંગ સાથેનો લગભગ બે દાયકાનો લાંબો અધ્યાય પૂરો થયા બાદ ફ્રેન્ચાઇઝીએ કોચિંગની જવાબદારી એવા વ્યક્તિને સોંપી છે, જેને IPL અને ભારતીય ક્રિકેટ બંનેની ઊંડી સમજ છે.
યુવા પ્રતિભાઓને વિકસાવવાની જવાબદારી
CSKની માલિક રૂપા ગુરુનાથે ઝહીરનું ટીમમાં સ્વાગત કરતાં તેમની ખેલાડી તરીકેની શાનદાર કારકિર્દી અને યુવા પ્રતિભાઓને નિખારવાની ક્ષમતાનો ઉલ્લેખ કર્યો હતો. ફ્રેન્ચાઇઝીનું માનવું છે કે ઝહીરનું માર્ગદર્શન ટીમના પાયાને વધુ મજબૂત કરવામાં મદદરૂપ થશે.
ઝહીર માટે હવે સૌથી મોટો પડકાર ટીમની આગામી સિઝન માટે તૈયારી કરવાનો રહેશે. CSKના કોચ તરીકે તેમણે અનુભવી ખેલાડીઓ સાથે કામ કરવાની સાથે યુવા ખેલાડીઓના વિકાસ પર પણ ધ્યાન આપવાનું રહેશે.IPL 2027 હજુ શરૂ થવાની છે, પરંતુ હેડ કોચ તરીકે ઝહીરની નિમણૂકથી CSKની આગામી સિઝનની તૈયારીઓ અંગે ચર્ચા શરૂ થઈ ગઈ છે. ફ્લેમિંગના લાંબા કાર્યકાળ બાદ ઝહીર કેવી રીતે ટીમનું સંચાલન કરે છે અને તેમની કોચિંગ ફિલોસોફી CSKમાં કેવી રીતે અમલમાં આવે છે, તેના પર ક્રિકેટ ચાહકોની નજર રહેશે.
