ભારતીય ક્રિકેટ જ નહીં પરંતુ ક્રિકેટ જગતમાં સૌરવ ગાંગુલી એક આક્રમક સુકાની તરીકે જાણીતો છે. તેમાં પણ લોર્ડ્સ મેદાનમાં તેની બે ઘટના ભારતીય ક્રિકેટ પ્રેમીઓના દિલમાં ઘર કરી ગઈ છે. 2002માં નેટવેસ્ટ સીરિઝની ઈંગ્લેન્ડ સામેની ફાઈનલ જીત્યા બાદ લોર્ડ્સની ગેલેરીમાંથી ટીશર્ટ કાઢીને હવામાં લહેરાવીને અંગ્રેજોનો ઘંમડ તોડ્યો તે એક ઐતિહાસિક ઘટના હતી. જોકે, તે પહેલા ગાંગુલીએ લોર્ડ્સ ખાતે જ પોતાની કારકિર્દીની પ્રથમ ટેસ્ટ રમી હતી. આ પ્રથમ ટેસ્ટમાં જ સૌરવ ગાંગુલીએ એક ઈતિહાસ રચી દીધો હતો. ભારતીય ટીમ 1996માં ઈંગ્લેન્ડના પ્રવાસે ગઈ હતી. જેમાં 20-24 જૂન દરમિયાન લોર્ડ્સ ખાતે બીજી ટેસ્ટ રમાઈ હતી. આ ટેસ્ટ દ્વારા ભારતના બે મહાન ક્રિકેટર્સે પોતાની ટેસ્ટ કારકિર્દીનો પ્રારંભ કર્યો હતો. જેમાં એક હતો સૌરવ ગાંગુલી અને બીજો હતો રાહુલ દ્રવિડ. ગાંગુલીએ 22 જૂન એટલે કે મેચના ત્રીજા દિવસે લોર્ડ્સના મેદાન પર સદી ફટકારી હતી.
આ ટેસ્ટમાં સુકાની મોહમ્મદ અઝહરૂદ્દીને ટોસ જીતીને પ્રથમ બોલિંગ લીધી હતી. ઈંગ્લેન્ડે પ્રથમ દાવમાં 344 રનનો સ્કોર ખડક્યો હતો. જેમાં ગ્રેહામ થોર્પે 89 રન ફટકાર્યા હતા. જ્યારે વિકેટકીપર બેટર જેક રસેલે અદ્દભુત બેટિંગ કરતા 124 રનની શાનદાર ઈનિંગ્સ રમી હતી. 44 વર્ષ બાદ લોર્ડ્સના મેદાન પર ઈંગ્લેન્ડના વિકેટકીપરે સદી ફટકારી હતી. ભારત માટે વેંકટેશ પ્રસાદે 76 રન આપીને પાંચ વિકેટ ઝડપી હતી. જ્યારે જવાગલ શ્રીનાથે 76 રન આપીને ત્રણ વિકેટ પોતાના નામે કરી હતી. સૌરવ ગાંગુલીએ બે વિકેટ ખેરવી હતી.
ભારતે તેના પ્રથમ દાવમાં 429 રનનો સ્કોર ખડકીને સરસાઈ મેળવી હતી. જેમાં વન-ડાઉન આવેલા સૌરવ ગાંગુલીએ 301 બોલમાં 20 ચોગ્ગા સાથે 131 રનની ઐતિહાસિક ઈનિંગ્સ રમી હતી. આ સાથે જ લોર્ડ્સના મેદાન પર ટેસ્ટ ડેબ્યુમાં સદી ફટકારનારો સૌરવ ગાંગુલી પ્રથમ ભારતીય બેટર બન્યો હતો. જોકે, રાહુલ દ્રવિડ પાંચ રન માટે આ સિદ્ધિથી ચૂકી ગયો હતો. રાહુલ દ્રવિડ 95 રનના સ્કોર પર આઉઠ થયો હતો. તેણે 363 બોલ રમ્યા હતા. વિકેટકીપર રસેલે તેનો કેચ કર્યો હતો. આમ લોર્ડ્સના મેદાન પર બે ડેબ્યુ ખેલાડી સદી ફટકારે તે ઘટના બનતા-બનતા રહી ગઈ હતી. ઈંગ્લેન્ડ માટે ક્રિસ લૂઈસ અને એલન મૂલાલેએ ત્રણ-ત્રણ વિકેટ ઝડપી હતી. જ્યારે ડોમિનિક કોર્કને બે તથા પીટર માર્ટિન અને રોની ઈરાનીને એક-એક સફળતા મળી હતી.
