સાઉથ આફ્રિકા સામેની હાર છતાં શું ટીમ ઈન્ડિયા હજી પણ પહોંચી શકે છે ફાઇનલમાં? જાણો સંપૂર્ણ પોઈન્ટ્સ ટેબલ સિનારિયો

સાઉથ આફ્રિકા સામેની હાર છતાં શું ટીમ ઈન્ડિયા હજી પણ WTC ફાઇનલમાં પહોંચી શકે છે? જાણો સંપૂર્ણ ગણિત

ઈડન ગાર્ડન્સમાં સાઉથ આફ્રિકા સામેની હાર બાદ ભારત WTC પોઈન્ટ્સ ટેબલમાં ચોથા સ્થાને પહોંચી ગયું છે. વર્લ્ડ ટેસ્ટ ચેમ્પિયનશિપ (WTC) ની ફાઇનલમાં પહોંચવા માટે ભારતનું સંપૂર્ણ ગણિત શું છે, તે જાણો.

કોલકાતાના ઈડન ગાર્ડન્સમાં દક્ષિણ આફ્રિકા સામે 30 રનની હારથી ભારતની વર્લ્ડ ટેસ્ટ ચેમ્પિયનશિપ (WTC) ની આશાઓને મોટો ફટકો પડ્યો છે. શુભમન ગિલની આગેવાની હેઠળની ટીમ હવે પોઈન્ટ્સ ટેબલમાં ચોથા સ્થાને છે અને તેમની સામે માત્ર 10 ટેસ્ટ મેચ બાકી છે. ગણિત સ્પષ્ટ છે, હવે એક પણ ભૂલ ભારે પડી શકે છે.

WTC પોઈન્ટ્સ ટેબલમાં ભારતની સ્થિતિ

8 મેચોમાં ભારતે 52 પોઈન્ટ્સ મેળવ્યા છે અને તેમની PCT (પોઈન્ટ્સ ટકાવારી) માત્ર 54.17% છે. તેમના ઉપર ઓસ્ટ્રેલિયા, દક્ષિણ આફ્રિકા અને શ્રીલંકા આરામથી બેઠા છે. ઓસ્ટ્રેલિયાએ તો હજી સુધી હારનો સ્વાદ ચાખ્યા વિના પોતાની તમામ મેચો જીતી છે.

ભારતની બાકી રહેલી સિરીઝ આ પ્રમાણે છે:

• દક્ષિણ આફ્રિકા (ઘરઆંગણે): 1 ટેસ્ટ – ગુવાહાટી

• શ્રીલંકા (વિદેશ): 2 ટેસ્ટ

• ન્યૂઝીલેન્ડ (વિદેશ): 2 ટેસ્ટ

• ઓસ્ટ્રેલિયા (ઘરઆંગણે): 5 ટેસ્ટ

એટલે કે કુલ 10 ટેસ્ટ, જેમાં 120 પોઈન્ટ્સ દાવ પર હશે. સમગ્ર ચક્રમાં ભારત 18 મેચ રમશે અને પોઈન્ટ્સનો અંતિમ આધાર 216 હશે.

WTC ફાઈનલની ટિકિટ મેળવવા કેટલી જીત જરૂરી?

હવે સૌથી મોટો સવાલ એ છે કે ભારતે ફાઇનલમાં પોતાનું સ્થાન બનાવવા માટે 10માંથી કેટલી મેચ જીતવી પડશે? ગણિત પ્રમાણે:

• 5 જીત: 51.85% (કામ નહીં થાય)

• 6 જીત: 57.41% (હજી પણ ઓછું)

• 7 જીત: 62.96% (ફાઇનલની રેસમાં આવવા માટે પૂરતું)

• 8 જીત: 68.52% (લગભગ નિશ્ચિત)

અગાઉની WTC ફાઇનલિસ્ટ ટીમોની PCT જોતાં વલણ સ્પષ્ટ છે. ફાઇનલમાં સ્થાન મેળવવા માટે આશરે 64–68% ની PCT જરૂરી હોય છે. આનો અર્થ છે કે ભારતે ઓછામાં ઓછી 7 જીત મેળવવી પડશે, જ્યારે 8 જીત તેમને લગભગ નિશ્ચિતપણે ફાઇનલમાં પહોંચાડી દેશે.

જો કોઈ મેચ ડ્રો પણ થાય તો ફાઇનલનું ગણિત કંઈક આ પ્રકારનું રહેશે:

7 જીત + 1 ડ્રો + 2 હાર = 64.81% (જે ફાઇનલ માટે પૂરતું ગણાશે.)

ભારત માટે વાસ્તવિક રસ્તો શું છે?

ભારત માટે ફાઇનલનો પ્લાન કંઈક આ રીતે દેખાય છે:

1. દક્ષિણ આફ્રિકાને હરાવવું (1 ટેસ્ટમાં જીત)

2. શ્રીલંકાને વિદેશી જમીન પર ક્લીન સ્વીપ કરવું (2 ટેસ્ટમાં જીત)

3. ન્યૂઝીલેન્ડ સામે ઓછામાં ઓછી 1 જીત અને 1 ડ્રો

4. ઓસ્ટ્રેલિયા સામે 5 માંથી ઓછામાં ઓછી 3 જીત

આમ કરવાથી ભારતને મળશે:

કુલ 7 જીત + 1 ડ્રો + 2 હાર = આશરે 64.81%

એટલે કે WTC ફાઇનલની રેસમાં ભારત મજબૂતીથી વાપસી કરી શકે છે, પરંતુ તેના માટે બાકીની મેચોમાં સતત અને દમદાર પ્રદર્શન કરવું અનિવાર્ય છે.