ટીમ ઈન્ડિયા અને સાઉથ આફ્રિકા વચ્ચે 5 મેચની સીરિઝની ચોથી ટી20 આંતરરાષ્ટ્રીય મેચ આજે એટલે કે 17 જૂન 2022ના રોજ રમાશે. સાઉથ આફ્રિકાની ટીમ સીરિઝમાં 2-1થી આગળ છે. એવામાં ટીમ ઈન્ડિયા માટે કરો યા મરોનો મુકાબલો રહેશે. ટીમ ઈન્ડિયા આજની મેચ જીતશે તો જ સીરિઝમાં બની રહેશે, નહીં તો આફ્રિકન ટીમ સામે ભારત સીરિઝ ગુમાવી દેશે. બીજી બાજુ સાઉથ આફ્રિકાની ટીમ આ મેચ જીતીને સીરિઝ પોતાના નામે કરવા ઈચ્છશે.
આ મેચમાં ઋષભ પંત પોતાની પ્લેઈંગ ઈલેવનમાં ફેરફાર કરી શકે છે. આવેશ ખાનની જગ્યાએ અર્શદીપ સિંહને આંતરરાષ્ટ્રીય ક્રિકેટમાં ડેબ્યૂ કરવાની તક મળી શકે છે. આવેશ ખાન અત્યાર સુધી આ સીરિઝમાં જે આશાઓ સાથે રમાડવામાં આવ્યો હતો, તેના પર ખરો ઉતર્યો નથી. આવેશ ખાને આ સીરિઝમાં અત્યાર સુધી 11 ઓવર ફેંકી છે. તેમાં તેણે 87 રન આપ્યા છે, પરંતુ એક પણ વિકેટ લેવામાં તે સફળ રહ્યો નથી. આવી સ્થિતિમાં તેનું ટીમમાંથી બહાર થવું નિશ્ચિત જણાય છે. જો ક્વિન્ટન ડી કોક દક્ષિણ આફ્રિકાની ટીમમાં પરત ફરે છે તો રીઝા હેન્ડ્રીક્સ બહાર બેસી શકે છે. ડી કોકના હાથમાં થયેલી ઈજાને ધ્યાનમાં રાખીને હેનરિક ક્લાસેન વિકેટ કીપિંગ કરી શકે છે.
ભારત અને દક્ષિણ આફ્રિકા વચ્ચે ચોથી T20 મેચ રાજકોટના સૌરાષ્ટ્ર ક્રિકેટ એસોસિએશન સ્ટેડિયમમાં રમાવાની છે. મેચ ભારતીય સમય અનુસાર સાંજે 7.00 વાગ્યાથી શરૂ થશે. ટોસનો સમય સાંજે 6:30 છે. સ્ટાર સ્પોર્ટ્સ નેટવર્કની વિવિધ ચેનલો પર મેચનું જીવંત પ્રસારણ કરવામાં આવશે. મેચનું લાઈવ સ્ટ્રીમિંગ Disney+ Hotstar પર ઉપલબ્ધ થશે.
રાજકોટના સૌરાષ્ટ્ર ક્રિકેટ એસોસિએશન સ્ટેડિયમની પીચ બેટિંગ ફ્રેન્ડલી હોવાનું મનાય છે. આ મેદાન પર પ્રથમ દાવનો સૌથી વધુ સ્કોર 183 છે. આવી સ્થિતિમાં બોલરો માટે વિકેટ લેવી ખુબ જ મુશ્કેલ કામ બની શકે છે. અત્યાર સુધી આ મેદાનમાં રમાયેલી ત્રણ T20 ઈન્ટરનેશનલમાંથી બે ટીમે સ્કોરનો પીછો કરી જીત મેળવી છે.
