૩૩ વર્ષની ઉંમરે સરાંશ જૈનનું સ્વપ્ન સાકાર: શ્રીલંકા સામે કોલંબો ટેસ્ટમાં ભારતીય ટીમ માટે કર્યું ડેબ્યૂ
સ્થાનિક ક્રિકેટમાં વર્ષોની સખત મહેનત અને સાતત્યપૂર્ણ પ્રદર્શન બાદ આખરે ૩૩ વર્ષીય ઓલરાઉન્ડર સરાંશ જૈનનું ભારત માટે રમવાનું સપનું પૂરું થયું છે. શ્રીલંકા સામે કોલંબોના ઐતિહાસિક એસએસસી (SSC) ગ્રાઉન્ડ ખાતે રમાઈ રહેલી બીજી ટેસ્ટ મેચમાં સરાંશને ભારતની ટેસ્ટ કેપ મેળવવાની ગોલ્ડન તક મળી છે. મેચના ટોસ પહેલા ભારતના દિગ્ગજ ઓલરાઉન્ડર રવિન્દ્ર જાડેજાએ એક ભાવુક ક્ષણ વચ્ચે સરાંશને તેની ડેબ્યૂ ટેસ્ટ કેપ સોંપી હતી.
કુલદીપ યાદવ અનફિટ: કપ્તાન શુભમન ગિલે આપી માહિતી
બીજી ટેસ્ટ મેચમાં ટોસ જીતીને ભારતીય ટીમ ઈન્ડિયાના કપ્તાન શુભમન ગિલે સતત બીજી વાર પહેલા બેટિંગ કરવાનો નિર્ણય લીધો હતો. ટોસ દરમિયાન ટીમમાં થયેલા ફેરફાર વિશે વાત કરતા ગિલે ખુલાસો કર્યો કે ચાઇનામેન બોલર કુલદીપ યાદવ અચાનક ઇન્ફેક્શન (ચેપ) થી પીડાવાને કારણે આ મેચમાંથી બહાર થઈ ગયો છે. તેના સ્થાને સરાંશ જૈનને પ્લેઇંગ-૧૧ માં સામેલ કરવામાં આવ્યો છે.
ગાલે ટેસ્ટમાં મળેલી જીત પર ચર્ચા કરતા કપ્તાન ગિલે ટીમ પ્રદર્શનને ૧૦ માંથી ૯ રેટિંગ આપ્યું હતું. તેણે ઉમેર્યું કે ટીમ સતત સુધારા તરફ જોઈ રહી છે અને કોલંબો ટેસ્ટમાં પણ વિજયની લય જાળવી રાખવા માંગે છે.
ઘરેલુ ક્રિકેટનો અનુભવ અને શાનદાર આંકડા
સરાંશ જૈન કોઈ નવોદિત ખેલાડી નથી, પરંતુ ફર્સ્ટ-ક્લાસ ક્રિકેટનો મોટો અનુભવ ધરાવે છે. તેણે ૨૦૧૪ માં તમિલનાડુ સામે પોતાની ફર્સ્ટ-ક્લાસ કરિયરની શરૂઆત કરી હતી.
બોલિંગમાં શ્રેષ્ઠતા: અત્યાર સુધી રમેલી ૫૪ ફર્સ્ટ-ક્લાસ મેચોની ૯૭ ઇનિંગ્સમાં સરાંશે ૨૭.૩૦ ની શાનદાર સરેરાશ અને ૩.૦૧ ના ઇકોનોમી રેટ સાથે કુલ ૧૮૮ વિકેટો ઝડપી છે. તેણે ૧૦ વખત ઇનિંગ્સમાં ૫ વિકેટ અને ૧૦ વખત ૪ વિકેટ લેવાની સિદ્ધિ મેળવી છે. તેનું સર્વશ્રેષ્ઠ પ્રદર્શન ૭૫ રનમાં ૬ વિકેટ છે.
બેટિંગમાં પણ મજબૂત: નીચલા ક્રમમાં બેટિંગ કરતા સરાંશે ૮૫ ઇનિંગ્સમાં ૨,૨૨૩ રન બનાવ્યા છે. જેમાં ૨ સદી અને ૧૪ અર્ધસદીઓ સામેલ છે, જે તેને એક ઉપયોગી ઓલરાઉન્ડર બનાવે છે.
બીજી ટેસ્ટ માટે બંને ટીમોની પ્લેઈંગ-૧૧
ભારતીય ટીમ:
યશસ્વી જયસ્વાલ, કેએલ રાહુલ, દેવદત્ત પડિકલ, શુભમન ગિલ (કેપ્ટન), ઋષભ પંત (વિકેટકીપર), રવિન્દ્ર જાડેજા, ધ્રુવ જુરેલ, સરાંશ જૈન, માનવ સુથાર, મોહમ્મદ સિરાજ, પ્રસિદ્ધ કૃષ્ણ.
શ્રીલંકન ટીમ:
લાહિરુ ઉદારા, કામિલ મિશ્રા, પસિંદુ સૂરિયાબંદરા, કામિન્દુ મેન્ડિસ, ધનંજયા ડી સિલ્વા (કેપ્ટન), સોનલ દિનુશા, નિરોશન ડિકવેલા (વિકેટકીપર), કેશરા નુવંથા, પ્રબથ જયસૂર્યા, લાહિરુ કુમારા, અસિથા ફર્નાન્ડો.
