ઇલેક્ટ્રિક વ્હીકલ ટેક્નોલોજી: હવે કારની બેટરીથી ચાલશે ઘરના ઉપકરણો અને લાઈટ!
જ્યારે પણ ઘરમાં અચાનક લાઈટ ગુલ થઈ જાય છે, ત્યારે સૌથી પહેલા ઇન્વર્ટર કે જનરેટરની યાદ આવે છે. પરંતુ, જો તમને કોઈ એમ કહે કે તમારી ઇલેક્ટ્રિક કાર (EV) જ તમારા ઘર માટે પાવર બેકઅપ બની શકે છે, તો તમને કદાચ નવાઈ લાગશે. આ વાત સાચી છે અને આજના સમયમાં ઓટોમોબાઈલ સેક્ટરમાં આવી રહી અદભુત ટેક્નોલોજીએ આ બધું સંભવ બનાવી દીધું છે. ઇલેક્ટ્રિક વ્હીકલ્સમાં ઉપલબ્ધ ખાસ ફીચર્સની મદદથી હવે કારની બેટરીનો ઉપયોગ ફક્ત વાહન ચલાવવા માટે જ નહીં, પરંતુ ઘરના નાના-મોટા ઉપકરણો ચલાવવા માટે પણ થઈ રહ્યો છે.
V2L (Vehicle to Load) ટેક્નોલોજી એટલે શું?
V2L એટલે કે ‘વેહિકલ ટુ લોડ’ (Vehicle to Load) એક એવી ટેક્નોલોજી છે, જે ઇલેક્ટ્રિક કારને ચાલતા-ફરતા પાવર બેંકમાં ફેરવી દે છે. સામાન્ય રીતે ઇલેક્ટ્રિક વાહનની બેટરીમાં ડીસી (ડાયરેક્ટ કરંટ) સ્વરૂપે વીજળી સ્ટોર થયેલી હોય છે. V2L સિસ્ટમમાં ઇન્વર્ટરની મદદથી આ ડીસી વીજળીને એસી (અલ્ટર્નેટિંગ કરંટ)માં બદલવામાં આવે છે, જેનો ઉપયોગ ઘરના સામાન્ય ઉપકરણોમાં થાય છે.
આ સુવિધાની મદદથી કારમાંથી પાવર આઉટપુટ કે ખાસ એડેપ્ટર જોડીને પંખા, એલઈડી લાઈટ, લેપટોપ અને મોબાઈલ ચાર્જર જેવા નાના ઉપકરણો સરળતાથી ચલાવી શકાય છે. જોકે, ધ્યાન રાખવા જેવી બાબત એ છે કે આ સુવિધા તમામ ઇલેક્ટ્રિક કારમાં ઉપલબ્ધ હોતી નથી, તેથી કાર ખરીદતી વખતે તેના સ્પેસિફિકેશન્સ ચોક્કસ તપાસવા જોઈએ.
કારથી કેટલી દેર સુધી ચાલી શકે છે ઉપકરણો?
ઘરના ઉપકરણો કેટલી વાર સુધી ચાલશે તે કારની બેટરીની ક્ષમતા અને વીજળીના વપરાશ પર આધાર રાખે છે. ઉદાહરણ તરીકે, જો તમે ૬૦ વોટનો એક પંખો અને ૧૦-૧૦ વોટની ચાર એલઈડી લાઈટ ચલાવો છો, તો કુલ વપરાશ આશરે ૧૦૦ વોટ થશે. આ ઉપકરણો ૧૦ કલાક ચાલે તો પણ માત્ર ૧ યુનિટ જેટલી વીજળી વપરાય છે. જો કે, ગાડી ચલાવવા માટે બેટરીમાં પૂરતો ચાર્જ રાખવો પણ જરૂરી છે, જેથી ઘરના વપરાશ વખતે આ બાબતનું ધ્યાન રાખવું પડે છે.
V2H (Vehicle to Home) ટેક્નોલોજીથી આખું ઘર રહેશે રોશન
V2L ઉપરાંત કેટલીક કારોમાં V2H એટલે કે ‘વેહિકલ ટુ હોમ’ (Vehicle to Home) ટેક્નોલોજી પણ આપવામાં આવે છે. આ ટેક્નોલોજી દ્વારા કારની બેટરીમાંથી સીધી વીજળી ઘરના મેઈન ઇલેક્ટ્રિકલ સિસ્ટમ સુધી પહોંચાડી શકાય છે. આનાથી ઇલેક્ટ્રિક કાર આખા ઘર માટે બેકઅપ સિસ્ટમ તરીકે કામ કરી શકે છે.
આ સેટઅપ માટે વીટુએચ સપોર્ટ કરતી કાર ઉપરાંત ખાસ બાયડિરેક્શનલ ચાર્જર અને ઘરમાં યોગ્ય ઇલેક્ટ્રિકલ સેટઅપની જરૂર પડે છે. એસી કે ગીઝર જેવા હેવી ઉપકરણો ચલાવતા પહેલા કારની ક્ષમતા ચોક્કસ ચકાસી લેવી જોઈએ. ભવિષ્યમાં આ ટેક્નોલોજી પાવર કટની સમસ્યા સામે મોટો વિકલ્પ સાબિત થઈ શકે છે.
