શું તમારી કાર સ્ટાર્ટ થવામાં વાર લાગે છે? બેટરી ડેડ થવાના આ લક્ષણો જાણી લો, નહીં તો પસ્તાશો

વચ્ચે રસ્તે કાર દગો દઈ શકે છે! બેટરી ખરાબ થતા પહેલા મળતા આ સંકેતોને ક્યારેય ન કરો નજરઅંદાજ

કાર અચાનક બંધ પડી જવી અથવા સ્ટાર્ટ ન થવી એ કોઈપણ ડ્રાઈવર માટે માથાનો દુખાવો બની શકે છે. આ સમસ્યા પાછળનું સૌથી મુખ્ય કારણ ઘણીવાર નબળી બેટરી હોય છે. સામાન્ય રીતે કારની બેટરી 3 થી 5 વર્ષ સુધી સારી રીતે કામ કરે છે, પરંતુ હવામાન, ડ્રાઈવિંગની રીત અને મેન્ટેનન્સના આધારે તેનું આયુષ્ય વધી કે ઘટી શકે છે. ઘણીવાર બેટરી સંપૂર્ણપણે ડેડ થઈ જાય તે પહેલા ગાડી કેટલાક ખાસ સંકેતો આપવા લાગે છે. જો તમે આ ઈશારાઓને સમયસર સમજી લો, તો વચ્ચે રસ્તે ફસાવવાની મુસીબતમાંથી બચી શકો છો.

એન્જિન સ્ટાર્ટ થવામાં વિલંબ

જો તમારી કાર પહેલા કરતા સ્ટાર્ટ થવામાં વધુ સમય લેતી હોય અથવા ચાવી ફેરવતા કે બટન દબાવતા તરત જ રિસ્પોન્સ ન મળતો હોય, તો સમજી લેવું કે બેટરી નબળી પડી રહી છે. ખાસ કરીને સવારના સમયે જો ગાડી સ્ટાર્ટ કરવામાં મહેનત પડતી હોય અથવા વારંવાર ‘જમ્પ-સ્ટાર્ટ’ કરવાની જરૂર પડતી હોય, તો તે સ્પષ્ટ સંકેત છે કે બેટરીમાં હવે પાવર બચ્યો નથી.

ડેશબોર્ડ પર વોર્નિંગ લાઈટ

ડ્રાઈવિંગ કરતી વખતે જો ઇન્સ્ટ્રુમેન્ટ ક્લસ્ટર (ડેશબોર્ડ) પર બેટરીનો લાલ આઈકન અથવા ‘Check Engine’ લાઈટ સતત ચાલુ રહે, તો તેને હળવાશથી ન લેવી જોઈએ. આ લાઈટનો અર્થ એ છે કે બેટરી અથવા ગાડીની ચાર્જિંગ સિસ્ટમમાં કોઈ ખામી છે. આ સંકેત મળતા જ નજીકના મિકેનિક પાસે બેટરીનું વોલ્ટેજ ચેક કરાવી લેવું હિતાવહ છે.

ઇલેક્ટ્રિકલ ફીચર્સમાં સમસ્યા

નબળી બેટરીની સીધી અસર ગાડીના ઇલેક્ટ્રોનિક સિસ્ટમ પર જોવા મળે છે. જો તમને લાગે કે કારની હેડલાઈટ્સનો પ્રકાશ ઓછો થઈ ગયો છે, પાવર વિન્ડો ધીમી ગતિએ કામ કરી રહી છે અથવા મ્યુઝિક સિસ્ટમ વારંવાર રીસ્ટાર્ટ થઈ રહી છે, તો આ તમામ લક્ષણો બેટરીની ખરાબી તરફ ઈશારો કરે છે. બેટરી પૂરતો કરંટ સપ્લાય ન કરી શકતી હોવાને કારણે આવું બને છે.

બેટરીનો આકાર બદલાવો કે દુર્ગંધ આવવી

તમારે સમયાંતરે બોનેટ ખોલીને બેટરીની શારીરિક સ્થિતિ પણ તપાસવી જોઈએ. જો બેટરીનો બોડી પાર્ટ ફૂલેલો દેખાય અથવા તેમાંથી કોઈ વિચિત્ર કેમિકલ જેવી દુર્ગંધ આવતી હોય, તો તે ઓવરહીટિંગ અથવા ગેસ લીકેજ હોઈ શકે છે. આવી સ્થિતિમાં બેટરી ગમે ત્યારે ફાટી શકે છે અથવા સંપૂર્ણપણે બંધ પડી શકે છે, તેથી તેને તરત જ બદલાવી લેવી જોઈએ.

ટર્મિનલ પર કાટ કે સફેદ જમાવટ

બેટરીના કનેક્શન પોઈન્ટ્સ (ટર્મિનલ્સ) પર સફેદ કે વાદળી રંગનો પાવડર જેવો પદાર્થ જમા થવો એ ‘કર્રોઝન’ અથવા કાટ લાગવાની નિશાની છે. આ જમાવટને કારણે બેટરીમાંથી એન્જિન સુધી પાવર બરાબર પહોંચી શકતો નથી. જો તેને સાફ કર્યા પછી પણ વારંવાર આવો કાટ જમા થતો હોય, તો તેનો અર્થ એ છે કે બેટરી હવે તેનું આયુષ્ય પૂરું કરી ચૂકી છે.

ગાડીનું નિયમિત સર્વિસિંગ અને બેટરીના વોલ્ટેજની તપાસ તમને રસ્તા પરના અણધાર્યા સંકટથી બચાવી શકે છે. હંમેશા સારી ગુણવત્તાની બેટરીનો જ આગ્રહ રાખવો જોઈએ.