એપ્રિલમાં લોન્ચ થશે 3 શક્તિશાળી ઇલેક્ટ્રિક કાર: સસ્તી SUVથી લઈને 7-સીટર MPV સુધીના વિકલ્પો
વર્ષ 2026 ભારતીય ઓટોમોબાઈલ માર્કેટ માટે હાઇબ્રિડ અને ઇલેક્ટ્રિક વાહનોનું વર્ષ સાબિત થવા જઈ રહ્યું છે. ખાસ કરીને આ એપ્રિલ મહિનામાં ત્રણ નવા ઇલેક્ટ્રિક મોડલ્સ શોરૂમમાં દસ્તક આપવા માટે તૈયાર છે. જેમાં લક્ઝરી સેડાન, મિડ-સાઇઝ SUV અને ફેમિલી માટે ઉપયોગી MPVનો સમાવેશ થાય છે. જો તમે પણ પર્યાવરણને અનુકૂળ અને આધુનિક ટેકનોલોજી ધરાવતી કાર લેવાનું વિચારી રહ્યા છો, તો આ વિકલ્પો તમારા માટે શ્રેષ્ઠ સાબિત થઈ શકે છે.
ટોયોટા અર્બન ક્રુઝર ઇબેલા (Toyota Ebela EV)
ટોયોટાની આ નવી ઇલેક્ટ્રિક SUVની આતુરતાથી રાહ જોવાઈ રહી છે અને તેની બુકિંગ પણ શરૂ થઈ ચૂકી છે. આ કાર વાસ્તવમાં મારુતિ સુઝુકીની ‘ઇ-વિટારા’નું ટોયોટા વર્ઝન છે. તે મુખ્યત્વે ત્રણ વેરિઅન્ટ્સ – E1, E2 અને E3 માં ઉપલબ્ધ થશે.
ટેકનિકલ વિગતો મુજબ, E1 વેરિઅન્ટમાં 49 kWhની બેટરી અને 144 BHPની મોટર હશે, જે સિંગલ ચાર્જ પર 440 કિમીની રેન્જ આપશે. જ્યારે હાઈ-એન્ડ E2 અને E3 વેરિઅન્ટ્સમાં 61 kWhની મોટી બેટરી અને 174 BHPની મોટર મળશે, જે 543 કિમી સુધીની લાંબી રેન્જ આપવા સક્ષમ છે.
મર્સિડીઝ-બેન્ઝ CLA EV (Mercedes-Benz CLA EV)
લક્ઝરી કારના શોખીનો માટે મર્સિડીઝ તેની શાનદાર સેડાન CLA EV લોન્ચ કરી રહી છે. કંપનીના જણાવ્યા અનુસાર, CLA 250+ ‘લોન્ગ રેન્જ’ વેરિઅન્ટની ડિલિવરી એપ્રિલથી જ શરૂ થઈ જશે. આ કારમાં 85 kWhની પાવરફુલ બેટરી આપવામાં આવી છે, જે WLTP સાયકલ મુજબ 729 કિમીની અદભૂત રેન્જ આપે છે.
આ કારની સૌથી મોટી ખાસિયત તેની ચાર્જિંગ સ્પીડ છે. 240 kW ના ફાસ્ટ ડીસી ચાર્જરની મદદથી, આ કાર માત્ર 20 મિનિટમાં આશરે 400 કિમી સુધી દોડવા માટે તૈયાર થઈ જાય છે. જેઓ લાંબી મુસાફરી કરવા માંગે છે તેમના માટે આ એક પરફેક્ટ પ્રીમિયમ વિકલ્પ છે.
વિનફાસ્ટ લિમો ગ્રીન (VinFast Limo Green)
વિયેતનામી કંપની વિનફાસ્ટ હવે ભારતમાં પોતાનું ત્રીજું મોડલ ‘લિમો ગ્રીન’ લોન્ચ કરવા જઈ રહી છે. આ એક થ્રી-રો (ત્રણ હરોળવાળી) MPV છે, જે વ્યક્તિગત ઉપયોગ તેમજ ટેક્સી અથવા ફ્લીટ ઓપરેટરો માટે પણ ઉત્તમ છે.
આ MPVમાં 60.13 kWhનું બેટરી પેક છે જે 204 BHP પાવર અને 280 Nm ટોર્ક જનરેટ કરે છે. એકવાર ફૂલ ચાર્જ કરવા પર આ ગાડી 450 કિમી (NEDC રેન્જ) સુધી ચાલી શકે છે. જો તમારી ફેમિલી મોટી છે અથવા તમારે વધુ સ્પેસની જરૂર છે, તો લિમો ગ્રીન એક આર્થિક અને ટકાઉ વિકલ્પ બની શકે છે.
