Toyota Urban Cruiser Hyryder Aero Black Edition લોન્ચ: રેગ્યુલર મોડેલથી કેટલું અલગ છે આ નવું સ્પેશિયલ એડિશન?
ભારતીય ઓટોમોબાઈલ માર્કેટમાં એસયુવી (SUV) કારોનો ક્રેઝ દિવસેને દિવસે વધી રહ્યો છે. ખાસ કરીને ઓલ-બ્લેક (All-Black) લુક ધરાવતી એસયુવી કાર યુવાનોમાં ભારે લોકપ્રિય થઈ રહી છે. ગ્રાહકોની આ પસંદગીને ધ્યાનમાં રાખીને ‘ટોયોટા કિરલોસ્કર મોટર’ (Toyota Kirloskar Motor) એ પોતાની લોકપ્રિય મિડ-સાઇઝ એસયુવી ‘અર્બન ક્રૂઝર હાઇરાઇડર’ (Urban Cruiser Hyryder) નું નવું લિમિટેડ એડિશન ભારતમાં લોન્ચ કર્યું છે.
આ નવા સ્પેશિયલ મોડેલને Toyota Hyryder Aero Black Edition નામ આપવામાં આવ્યું છે. કંપનીએ આ એડિશનને ઓલ-બ્લેક થીમ, સ્પોર્ટી લુક અને પ્રીમિયમ રોડ પ્રેઝન્સ સાથે રજૂ કર્યું છે, જે રેગ્યુલર મોડેલ કરતાં તદ્દન અલગ અને આકર્ષક દેખાય છે.
Aero Black Edition ની કિંમત અને વેરીયન્ટ્સ
ટોયોટાએ આ ખાસ “Aero Black Edition” ના સ્ટાઇલિંગ પેકેજની કિંમત રૂ. ૩૧,૯૯૯ રાખી છે. આ કિટને તમે કારના મૂળ કલર અને વેરીયન્ટ સાથે એકસેસરી પૅક તરીકે ઉમેરી શકો છો.
આ સ્પેશિયલ એડિશનને કંપનીના ‘Midnight Black’ કલર ઓપ્શન સાથે G અને V વેરીયન્ટ્સમાં રજૂ કરવામાં આવ્યું છે. તે કારના ‘Neo Drive’ (માઇલ્ડ હાઇબ્રિડ) અને ‘Strong Hybrid’ બંને એન્જિન ઓપ્શનમાં ઉપલબ્ધ છે. આ ઉપરાંત, જો કોઈ ગ્રાહક પોતાની એસયુવીને અંદરથી પણ સંપૂર્ણપણે બ્લેક લુક આપવા માંગતા હોય, તો તેઓ ડીલરશીપ પરથી અલગથી ‘All Black Package’ પણ સેટ કરાવી શકે છે.
ઉલ્લેખનીય છે કે, ટોયોટા હાઇરાઇડરની રેગ્યુલર એક્સ-શોરૂમ કિંમત રૂ. ૧૧.૩૧ લાખથી શરૂ થાય છે અને તેના ટોપ વેરીયન્ટની કિંમત રૂ. ૨૦ લાખ (એક્સ-શોરૂમ) સુધી જાય છે.
શું ખાસ છે Aero Black Edition માં?
નવા Aero Black Edition માં રેગ્યુલર હાઇરાઇડરની સરખામણીમાં બહારના દેખાવ (Exterior Design) માં ઘણા મહત્વપૂર્ણ અને સ્પોર્ટી બદલાવો કરવામાં આવ્યા છે.
જેમાં નીચે મુજબના નવા ફીચર્સ અને ગાર્નિશનો સમાવેશ થાય છે:
ફ્રન્ટ ગ્રીલ ગાર્નિશ: આગળની ગ્રીલ પર એક નવું પ્રીમિયમ અપર ગાર્નિશ આપવામાં આવ્યું છે.
ફ્રન્ટ સ્પોઇલર: કારના આગળના બમ્પર નીચે નવું સ્પોર્ટી ફ્રન્ટ સ્પોઇલર ઉમેરાયું છે.
હેડલેમ્પ અને ટેલગેટ ગાર્નિશ: હેડલાઇટ્સ અને પાછળના ટેલગેટ પર બ્લેક એક્સેન્ટ્સ આપવામાં આવ્યા છે.
રિયર સ્પોઇલર: પાછળની બાજુએ નવો સ્પોર્ટી રિયર સ્પોઇલર લુકને વધુ આક્રમક બનાવે છે.
એરો બ્લેક બેજ: કાર પર એક ખાસ ‘Aero Black Limited Edition’ નો બેજ આપવામાં આવ્યો છે જે તેને રેગ્યુલર મોડેલથી અલગ પાડે છે.
આ તમામ બોડી કિટ્સ અને ઓલ-બ્લેક થીમને કારણે આ એસયુવી રસ્તા પર નીકળતી વખતે ખૂબ જ પ્રીમિયમ અને પાવરફુલ રોડ પ્રેઝન્સ આપે છે.
એન્જિન અને પાવરટ્રેન ઓપ્શન્સ
ટોયોટા હાઇરાઇડરના આ નવા એડિશનમાં એન્જિન અને મિકેનિકલ સ્પેસિફિકેશનમાં કોઈ ફેરફાર કરવામાં આવ્યો નથી. તે અગાઉના શ્રેષ્ઠ એન્જિન ઓપ્શન્સ સાથે જ આવે છે:
૧. Strong Hybrid (સ્ટ્રોંગ હાઇબ્રિડ) એન્જિન અને માઇલેજ
આ વર્ઝનમાં ૧.૫-લીટરનું TNGA એટકિન્સન સાયકલ પેટ્રોલ એન્જિન મળે છે, જે 92 bhp નો પાવર જનરેટ કરે છે. આ એન્જિન સાથે 79 bhp ની ઇલેક્ટ્રિક મોટર અને 177.6V નો લિથિયમ-આયન બેટરી પેક જોડાયેલો છે.
બંને મળીને એસયુવીને કુલ 114 bhp નો કમ્બાઇન્ડ પાવર પૂરો પાડે છે. આ મોડેલ e-CVT ગિયરબોક્સ સાથે આવે છે. માઇલેજની વાત કરીએ તો, કંપનીના દાવા મુજબ આ હાઇબ્રિડ એસયુવી ૨૭.૯૭ kmpl સુધીની જબરદસ્ત માઇલેજ આપે છે.
૨. Neo Drive (માઇલ્ડ હાઇબ્રિડ) એન્જિન
બીજો ઓપ્શન ‘Neo Drive’ પાવરટ્રેનનો છે, જેમાં ૧.૫-લીટરનું K15C પેટ્રોલ એન્જિન આવે છે. આ એન્જિન 103 bhp નો પાવર અને 137 Nm નો ટોર્ક જનરેટ કરે છે. આમાં ૫-સ્પીડ મેન્યુઅલ અને ૬-સ્પીડ ટોર્ક કન્વર્ટર ઓટોમેટિક ગિયરબોક્સનો વિકલ્પ મળે છે. મેન્યુઅલ વેરીયન્ટમાં ગ્રાહકોને AWD (ઓલ-વ્હીલ ડ્રાઇવ) સિસ્ટમ પસંદ કરવાનો વિકલ્પ પણ મળે છે.
કંપનીનું શું કહેવું છે?
ટોયોટા કિરલોસ્કર મોટરના એક્ઝિક્યુટિવ વાઇસ પ્રેસિડેન્ટ (સેલ્સ-સર્વિસ) શબરી મનોહરે આ નવા એડિશનના લોન્ચિંગ અંગે ખુશી વ્યક્ત કરી હતી. તેમણે જણાવ્યું હતું કે, “અર્બન ક્રૂઝર હાઇરાઇડર પોતાની ભવ્ય ડિઝાઇન, અદ્યતન ટેકનોલોજી અને શાનદાર કમ્ફર્ટના કારણે ભારતીય ગ્રાહકોની પહેલી પસંદ બની રહી છે.”
તેમણે વધુમાં ઉમેર્યું કે, “આ નવું Aero Black Edition ખાસ કરીને એવા યુવા ગ્રાહકો માટે લાવવામાં આવ્યું છે જેઓ પોતાની કારમાં વધુ બોલ્ડ, આક્રમક અને પ્રીમિયમ લુક ઇચ્છે છે. ઓલ-બ્લેક ડિઝાઇન આ એસયુવીના લુકને ચાર ચાંદ લગાવી દે છે.”
