First Female Wrestler
પ્રથમ મહિલા રેસલરઃ ગૂગલે ભારતની પ્રથમ મહિલા રેસલર હમીદા બાનુને યાદ કરીને ડૂડલ બનાવ્યું છે. હમીદા બાનુએ એક શરત રાખી હતી કે જે તેને કુસ્તીમાં હરાવશે તેની સાથે તે લગ્ન કરશે.
Google Makes Doodle of Hamida Banu: ભારતમાં મહિલા કુસ્તીબાજોએ પોતાની મહેનતથી આજે ઘણી ઊંચાઈઓ હાંસલ કરી છે, પરંતુ શું તમે ભારતની પ્રથમ મહિલા રેસલર વિશે જાણો છો. આજે એટલે કે 4 મે 2024 ના રોજ, ગૂગલે ભારતની પ્રથમ મહિલા કુસ્તીબાજ હમીદા બાનુને યાદ કરીને એક ડૂડલ બનાવ્યું છે. હમીદા એ મહિલા કુસ્તીબાજ હતી, જેને કોઈ પુરુષ કુસ્તીબાજ પણ હરાવી શક્યો ન હતો.
હમીદા બાનુ 1940-50ના દાયકાની સૌથી લોકપ્રિય મહિલા રેસલર હતી. તેના વિશે એક જાણીતી વાત એ છે કે તેણે એક શરત મૂકી હતી કે જે તેને કુસ્તીની મેચમાં હરાવશે તેની સાથે તે લગ્ન કરશે, પરંતુ તેમ થયું નહીં. ક્યારેક એવું બનતું કે જેઓ તેની સાથે લડતા હતા તેઓ કોઈને કોઈ બહાને મેચમાંથી ખસી જતા અને ક્યારેક હમીદા તે બધા કુસ્તીબાજોને હરાવી દેતી. હમીદાનો આહાર પણ ભારે ચર્ચાનો વિષય બન્યો હતો.
આહાર ખૂબ જ ચર્ચાનો વિષય હતો
મીડિયા રિપોર્ટ્સ અનુસાર, હમીદાની હાઇટ 5 ફૂટ 3 ઇંચ અને તેનું વજન 108 કિલો હતું. તેમના દૈનિક આહારમાં 5.5 લિટર દૂધ, 2.8 લિટર સૂપ, 1.8 લિટર ફળોનો રસ, એક દેશી ચિકન, એક કિલો મટન, 1 કિલો બદામ, અડધો કિલો ઘી, 6 ઇંડા અને બિરયાનીની બે પ્લેટનો સમાવેશ થતો હતો. આ સાથે હમીદા 9 કલાક ઊંઘ લેતી અને 6 કલાક કસરત કરતી. બાકીના સમયમાં હમીદા જમતી.
ભારતમાં સફળતા બાદ હમીદાએ નક્કી કર્યું કે તે યુરોપ જઈને રેસલિંગ કરશે, પરંતુ આ શક્ય બન્યું નહીં. આ પછી બાનુ અચાનક કુસ્તીની દુનિયામાંથી ગાયબ થઈ ગઈ. આ અંગે એવું કહેવાય છે કે હમીદાના કોચ સલામ પહેલવાનને રેસલરનો યુરોપ જવાનો નિર્ણય પસંદ નહોતો.