બ્લેક લુકમાં આવી હ્યુન્ડાઈની આ નાની SUV: રૂ. ૮.૧૩ લાખથી કિંમત શરૂ, અંદર પણ મળશે શાનદાર ફીચર્સ
હ્યુન્ડાઈ મોટર ઈન્ડિયાએ ભારતીય ઓટોમોબાઈલ માર્કેટમાં પોતાની લોકપ્રિય સ્મોલ એસયુવી હ્યુન્ડાઈ એક્સ્ટરનું નવું ‘નાઈટ એડિશન’ (Hyundai Exter Knight Edition) લોન્ચ કરી દીધું છે. કાર પ્રેમીઓ માટે ખાસ તૈયાર કરવામાં આવેલા આ મોડેલમાં અંદર અને બહાર સંપૂર્ણપણે ઓલ-બ્લેક થીમ આપવામાં આવી છે. આ નવા લુકને કારણે એક્સ્ટરનો રોડ પ્રેઝન્સ પહેલા કરતા વધુ સ્પોર્ટી, પ્રીમિયમ અને આક્રમક દેખાઈ રહ્યો છે.
હ્યુન્ડાઈ એક્સ્ટર નાઈટ એડિશનની શરૂઆતી કિંમત રૂ. ૮.૧૩ લાખ (એક્સ-શોરૂમ) રાખવામાં આવી છે, જ્યારે તેના ટોપ-એન્ડ વેરિઅન્ટની કિંમત રૂ. ૯.૬૦ લાખ સુધી જાય છે. જો તમે થોડી અલગ, બોલ્ડ અને આકર્ષક દેખાતી કાર ખરીદવાનું વિચારી રહ્યા છો, તો આ નવું એડિશન એક સરસ વિકલ્પ સાબિત થઈ શકે છે.
કેટલા વેરિઅન્ટ અને કલર ઓપ્શનમાં મળશે?
કંપનીએ એક્સ્ટર નાઈટ એડિશનને કુલ ચાર અલગ-અલગ વેરિઅન્ટમાં માર્કેટમાં ઉતાર્યું છે. જેમાં ગ્રાહકોને પેટ્રોલ મેન્યુઅલ, પેટ્રોલ એએમટી (AMT) અને વાતાવરણને અનુકૂળ એવું હાઈ-સીએનજી ડ્યુઓ (Hy-CNG Duo) એમ ત્રણેય પાવરટ્રેન વિકલ્પો મળી રહેશે.
રંગોની વાત કરીએ તો, ગ્રાહકો તેને ટાઈટેનિયમ બ્લેક, એટલાસ વાઈટ, સ્ટારી નાઈટ, ટાઈટન ગ્રે અને ગોલ્ડન બ્રોન્ઝ જેવા આકર્ષક કલર શેડ્સમાં ખરીદી શકશે. ખાસ વાત એ છે કે ડ્યુઅલ-ટોન કલર ઓપ્શન સાથે આ બ્લેક એલિમેન્ટ્સ વધુ ઉભરીને આવે છે.
બ્લેક એલિમેન્ટ્સ સાથે વધુ એગ્રેસિવ બન્યો એક્સટીરિયર લુક
એક્સ્ટર નાઈટ એડિશનને સામાન્ય મોડેલથી અલગ પાડવા માટે હ્યુન્ડાઈએ તેના બહારના ડિઝાઈનમાં ઘણા નાના-મોટા પરંતુ મહત્વપૂર્ણ ફેરફારો કર્યા છે:
મેટ બ્લેક બેજિંગ: કારની આગળ અને પાછળના ભાગે આપવામાં આવેલા હ્યુન્ડાઈ અને એક્સ્ટરના લોગો મેટ બ્લેક ફિનિશિંગમાં મળે છે.
ડાર્ક ગ્રે ગાર્નિશ: ફ્રન્ટ અને રિયર બમ્પર તેમજ કારની સાઈડ પ્રોફાઈલ પર ડાર્ક ગ્રે કલરની ગાર્નિશિંગ લાઈન્સ આપવામાં આવી છે, જે કારને બોલ્ડ લુક આપે છે.
રેડ બ્રેક કૅલિપર્સ: ૧૫-ઈંચના ઓલ-બ્લેક એલોય વ્હીલ્સની અંદરથી દેખાતા આગળના રેડ બ્રેક કૅલિપર્સ ઓલ-બ્લેક થીમ સાથે શાનદાર કોન્ટ્રાસ્ટ ઊભો કરે છે.
નાઈટ બેજ: કારના ટેલગેટ પર ખાસ ‘Knight’ નું બેજ લગાવવામાં આવ્યું છે જે તેની ઓળખ આપે છે. નિચલા વેરિઅન્ટ્સમાં ડાર્ક ગ્રે સ્ટીલ વ્હીલ્સ મળશે.
ઈન્ટિરિયર: કેબિનમાં પણ જળવાઈ રહી ઓલ-બ્લેક થીમ
માત્ર બહારથી જ નહીં, પરંતુ એક્સ્ટર નાઈટ એડિશનના કેબિનમાં પગ મૂકતાં જ તમને એક અલગ પ્રીમિયમ અનુભવ થાય છે. આખી કેબિનને ડાર્ક બ્લેક ટોનમાં ડિઝાઈન કરવામાં આવી છે.
બ્રાસ હાઈલાઈટ્સ: ડાર્ક કેબિનને મોર્ડન લુક આપવા માટે ડેશબોર્ડ અને એસી વેન્ટ્સ પર ‘બ્રાસ કલર’ (પીતળ જેવા ચમકદાર રંગ) ના કલર ટચ આપવામાં આવ્યા છે.
સીટિંગ અને લાઈટિંગ: બ્લેક કલરની સેમી-ફેબ્રિક સીટો, એમ્બર કલરની ફૂટવેલ એમ્બિયન્ટ લાઈટિંગ અને ડી-કટ (D-Cut) સ્ટીયરીંગ વ્હીલ કારના ઈન્ટિરિયરને પ્રીમિયમ સ્પોર્ટી ટચ આપે છે.
ફીચર્સ અને સિક્યુરિટી: તેમાં ટચસ્ક્રીન ઈન્ફોટેનમેન્ટ સિસ્ટમ, કનેક્ટેડ કાર ટેકનોલોજી, ઓટોમેટિક ક્લાઈમેટ કંટ્રોલ, ડિજિટલ ઈન્સ્ટ્રુમેન્ટ ક્લસ્ટર સહિત ૬ એરબેગ્સ અને ઈએસસી (ESC) જેવા આધુનિક સેફ્ટી ફીચર્સ યથાવત રાખવામાં આવ્યા છે.
એન્જિન અને પરફોર્મન્સમાં કોઈ ફેરફાર નહીં
હ્યુન્ડાઈએ સ્પષ્ટ કર્યું છે કે એક્સ્ટર નાઈટ એડિશન માત્ર ડિઝાઈન અને કસ્માઈઝેશન અપગ્રેડ છે. તેના મિકેનિકલ પાર્ટ્સ કે એન્જિનમાં કોઈ ફેરફાર કરવામાં આવ્યો નથી.
આ કારમાં અગાઉની જેમ જ ભરોસાપાત્ર ૧.૨-લીટર કપ્પા (Kappa) પેટ્રોલ એન્જિન આપવામાં આવ્યું છે, જે ૫-સ્પીડ મેન્યુઅલ અને ગિયરલેસ ડ્રાઈવિંગ માટે સ્માર્ટ એએમટી (AMT) ટ્રાન્સમિશન સાથે આવે છે. સીએનજી પ્રેમીઓ માટે ૧.૨-લીટર હાઈ-સીએનજી ડ્યુઓ એન્જિન ઉપલબ્ધ છે, જે ઉત્તમ માઈલેજ આપે છે.
હ્યુન્ડાઈની ‘નાઈટ એડિશન’ સીરીઝની સફળતા
હ્યુન્ડાઈ કંપનીના જણાવ્યા અનુસાર, ભારતમાં તેમના ‘Knight Edition’ મોડેલ્સને ગ્રાહકો તરફથી ખૂબ જ ઉત્સાહજનક પ્રતિસાદ મળ્યો છે. વર્ષ ૨૦૨૨માં લાઈનઅપની શરૂઆત થયા પછી, કંપની અત્યાર સુધીમાં વેન્યુ અને ક્રેટા જેવી કાર્સના ૧ લાખથી વધુ નાઈટ એડિશન મોડેલ્સ વેચી ચૂકી છે.
કોમ્પેક્ટ અને માઈક્રો એસયુવી સેગમેન્ટમાં યુવાનો ખાસ કરીને બ્લેક કલર અને સ્પોર્ટી લુક ધરાવતી કાર્સ વધુ પસંદ કરી રહ્યા છે. આ ટ્રેન્ડને ધ્યાનમાં રાખીને જ હ્યુન્ડાઈએ એક્સ્ટરને આ નવા ડાર્ક અવતારમાં લોન્ચ કરી છે. જેઓ બજેટમાં સ્ટાઇલિશ અને ફીચર-પેક્ડ એસયુવી ઈચ્છે છે તેમના માટે આ કાર એકદમ યોગ્ય પસંદગી બની શકે છે.
