ફક્ત 8 કલાકની શિફ્ટ નહીં, પ્રોફિટમાં ભાગીદારી બન્યું દીપિકાના ફિલ્મમાંથી બહાર થવાનું અસલી કારણ!
પ્રભાસ અને સંદીપ રેડ્ડી વાંગાની મોસ્ટ અવેટેડ ફિલ્મ ‘સ્પિરિટ’ (Spirit) માંથી અભિનેત્રી દીપિકા પાદુકોણના બહાર થવાને લઈને મનોરંજન જગતમાં ભારે ચર્ચા ચાલી રહી છે. શરૂઆતમાં એવું માનવામાં આવતું હતું કે શૂટિંગ દરમિયાન માત્ર 8 કલાકની વર્કિંગ શિફ્ટની માંગ અને ફીસને કારણે વાત બગડી હતી, પરંતુ હવે ફિલ્મના સહ-નિર્માતા અને ડિરેક્ટરના ભાઈ પ્રણય રેડ્ડી વાંગાએ આ સમગ્ર વિવાદ પર ખુલાસો કરતા ઘણા ચોંકાવનારા તથ્યો બહાર લાવ્યા છે.
ફક્ત ફી નહીં, પણ 10% નફાના હિસ્સાની માંગ
પ્રણય રેડ્ડી વાંગાએ એક ઇન્ટરવ્યુમાં સ્પષ્ટ કર્યું છે કે આ વિવાદ ફક્ત 5 થી 6 કરોડ રૂપિયાની વધારાની ફીસને લઈને નહોતો. તેમના જણાવ્યા મુજબ, મેકર્સ અને દીપિકા પાદુકોણ વચ્ચે દોઢ વર્ષ સુધી વાતચીત ચાલી હતી.
પ્રણયે ખુલાસો કર્યો કે, તેની પ્રમાણભૂત ફી ઉપરાંત, દીપિકાએ ફિલ્મના કુલ નફામાંથી 10% હિસ્સો માંગ્યો હતો – આ વિનંતી નિર્માતાઓને ફિલ્મના બજેટ અને અંદાજિત વ્યવસાયને ધ્યાનમાં રાખીને અશક્ય લાગી. ફિલ્મ નિર્માતાઓએ બજેટને સંતુલિત કરવાના મહત્વ પર ભાર મૂક્યો, નોંધ્યું કે આટલો મોટો હિસ્સો સ્વીકારવો ફક્ત શક્ય નથી.
કહાની અને કેરેક્ટર ડિટેલ્સ લીક કરવાનો ગંભીર આક્ષેપ
આ વિવાદ માત્ર પૈસા પૂરતો સીમિત ન રહ્યો, પરંતુ મેકર્સએ દીપિકા પાદુકોણ પર ફિલ્મ સાથે જોડાયેલી ગુપ્ત વાતો લીક કરવાનો પણ ગંભીર આક્ષેપ મૂક્યો છે. પ્રણય રેડ્ડીએ જણાવ્યું કે જ્યારે ટીમને લાગ્યું કે વાત આગળ નથી વધી રહી અને તેઓ બીજા વિકલ્પો પર વિચાર કરવા લાગ્યા, ત્યારે ફિલ્મની સિક્રેટ કહાની અને પાત્ર સાથે જોડાયેલી આંતરિક માહિતી મીડિયામાં લીક થવા લાગી.
મેકર્સનું કહેવું છે કે દીપિકા સાથે કહાની અને તેમના રોલને લઈને એક વર્ષથી વધુ સમય સુધી ચર્ચા થઈ હતી, અને તે વાતો પબ્લિક ડોમેનમાં આવવાથી ટીમ ખૂબ જ આઘાતમાં હતી અને નારાજ થઈ હતી.
દીપિકા પાદુકોણનો શું હતો પક્ષ?
બીજી બાજુ, મીડિયા રિપોર્ટ્સ અને સામે આવેલી માહિતી મુજબ, દીપિકા પાદુકોણ તરફથી એવો તર્ક આપવામાં આવ્યો હતો કે તે ફિલ્મ માટે નિર્ધારિત શરતો હેઠળ જ કામ કરવા માંગતી હતી. તેમણે કથિત રીતે 20 કરોડ રૂપિયાની ફીસ, અઠવાડિયામાં 5 દિવસ કામ અને દિવસમાં માત્ર 8 કલાકની શિફ્ટની શરત રાખી હતી. આ ઉપરાંત, તેમણે તેલુગુ ભાષામાં ડાયલોગ બોલવાનો પણ ઇનકાર કર્યો હતો.
આ તમામ ક્રિએટિવ ડિફરન્સિસ (Creative Differences) અને શરતોને કારણે વાત આગળ વધી શકી નહીં, અને આખરે મેકર્સએ દીપિકાની જગ્યાએ અભિનેત્રી તૃપ્તિ ડિમરીને ફિલ્મ માટે સાઈન કરી લીધી.
‘સ્પિરિટ’ જેવી મોટી પાન-ઇન્ડિયા ફિલ્મમાંથી દીપિકા પાદુકોણનું બહાર થવું અને મેકર્સ દ્વારા લગાવવામાં આવેલા આ આક્ષેપો ફિલ્મ ઇન્ડસ્ટ્રીમાં ચર્ચાનું મોટું કેન્દ્ર બન્યા છે. હવે જોવાનું એ રહેશે કે આ ખુલાસા બાદ આ વિવાદ પર આગળ શું પ્રતિક્રિયા સામે આવે છે.
