IRDAI ના એક જ ઝાટકે બજાર હચમચી ગયું! આ પાંચ શેરો પર તોળાઈ રહ્યું છે સૌથી મોટું સંકટ!
ભારતીય વીમા નિયમનકારી અને વિકાસ સત્તામંડળ (IRDAI) દ્વારા વીમા વિતરણ અને કમિશન માળખામાં ફેરફાર કરવાના પ્રસ્તાવને કારણે ગુરુવારે શેરબજારમાં ફાઇનાન્શિયલ શેરો પર ભારે વેચવાલીનું દબાણ જોવા મળ્યું હતું. આ અચાનક આવેલા ઘટાડાને કારણે માત્ર ૧૨ ફાઇનાન્શિયલ શેરોના માર્કેટ કેપિટલાઇઝેશનમાં અંદાજે ₹૧.૧૨ લાખ કરોડનું ધોવાણ થઈ ગયું હતું.
આ મોટા ઘટાડામાં બજાજ ફાઇનાન્સ, પીબી ફિનટેક, એચડીએફસી બેંક અને એક્સિસ બેંક જેવા દિગ્ગજ શેરોનો મોટો હિસ્સો રહ્યો છે. ચાલો જાણીએ કે કઈ કંપનીને કેટલું નુકસાન થયું છે અને આ નવા પ્રસ્તાવ પાછળનું અસલી કારણ શું છે.
કઈ કંપનીના શેરોમાં સૌથી મોટું ધોવાણ થયું?
ટ્રેક કરવામાં આવેલા શેરોમાં બજાજ ફાઇનાન્સને સૌથી મોટો ફટકો પડ્યો છે, જેનું માર્કેટ મૂલ્ય અંદાજે ₹૨૯,૦૦૦ કરોડ ઘટી ગયું છે. ત્યારબાદ પીબી ફિનટેક (PB Fintech) ને લગભગ ₹૨૦,૦૦૦ કરોડનું નુકસાન સહન કરવું પડ્યું છે.
જ્યારે એચડીએફસી બેંક અને એક્સિસ બેંકના માર્કેટ કેપિટલાઇઝેશનમાં અનુક્રમે અંદાજે ₹૧૫,૦૦૦ કરોડ અને ₹૧૪,૦૦૦ કરોડનું ધોવાણ થયું છે. આ ઉપરાંત, એચડીએફસી લાઈફને ₹૭,૦૦૦ કરોડથી વધુનું નુકસાન થયું છે. મેક્સ ફાઇનાન્શિયલના ₹૬,૮૦૦ કરોડ, એલએન્ડટી ફાઇનાન્સના ₹૬,૨૦૦ કરોડ અને આઈસીઆઈસીઆઈ પ્રુડેન્શિયલ લાઈફના ₹૩,૦૦૦ કરોડ સ્વાહા થઈ ગયા છે. ઇન્ડસઇન્ડ બેંક, આઈડીએફસી ફર્સ્ટ બેંક અને એયુ સ્મોલ ફાઇનાન્સ બેંકમાંથી પણ દરેકના અંદાજે ₹૩,૦૦૦ કરોડ ધોવાયા છે.
ફાઇનાન્શિયલ શેરો પર વેચવાલીનું ભારે દબાણ
બજારના વલણને જોઈએ તો ફાઇનાન્શિયલ સર્વિસિસ ઇન્ડેક્સમાં ભારે ગભરાટ જોવા મળ્યો હતો. ફાઇનાન્શિયલ સર્વિસિસ ઇન્ડેક્સમાં એચડીએફસી લાઈફ અને બજાજ ફાઇનાન્સ બંનેમાં ૫% થી વધુનો ઘટાડો નોંધાયો હતો, જ્યારે ચોલા, એક્સિસ બેંક અને બજાજ ફિનસર્વમાં ૪% થી વધુનો ઘટાડો થયો હતો.
બેંકિંગ ઇન્ડેક્સમાં પણ આઈડીએફસી ફર્સ્ટ બેંક, એયુ સ્મોલ ફાઇનાન્સ બેંક અને ઇન્ડસઇન્ડ બેંક લગભગ ૪% નીચે આવ્યા હતા, જ્યારે એચડીએફસી બેંકે ૧% થી વધુ ઘટાડો નોંધાવ્યો હતો. આ બધામાં પીબી ફિનટેક તો તેની ૧૦% ની લોઅર સર્કિટ પર લૉક થઈ ગઈ હતી, જે ફાઇનાન્શિયલ સેક્ટરની ગંભીર સ્થિતિ દર્શાવે છે.
શેરબજારમાં આ ભૂકંપ લાવનારું મુખ્ય કારણ શું છે?
આ અચાનક આવેલા ઘટાડા પાછળનું મુખ્ય કારણ આઈઆરડીએઆઈ (IRDAI) નું એક કન્સલ્ટેશન પેપર છે, જેમાં વીમા કંપનીઓ અને ડિસ્ટ્રિબ્યુટર્સને મળતા કમિશન માળખામાં ધરખમ ફેરફાર કરવાનો પ્રસ્તાવ મૂકવામાં આવ્યો છે.
નિયમનકારે વીમા ઉત્પાદનોની જટિલતા, તેના વેચાણ પાછળની મહેનત અને ઉપયોગમાં લેવાતી વિતરણ ચેનલના આધારે કમિશન નક્કી કરવાનો પ્રસ્તાવ મૂક્યો છે.
-
કમિશન પર મર્યાદા: હેલ્થ, મોટર અને લાઈફ ઇન્શ્યોરન્સ પરના કમિશન પર કડક મર્યાદા મૂકવામાં આવી શકે છે.
-
હેલ્થ ઇન્શ્યોરન્સ: નવા હેલ્થ ઇન્શ્યોરન્સ પોલિસીઓ માટે ૧૫% થી ૨૦% ની કમિશન કેપ (મર્યાદા) પ્રસ્તાવિત છે, જ્યારે રિન્યુઅલ માટે તે ૫% થી ૧૦% રહેશે.
-
લાઈફ ઇન્શ્યોરન્સ: પ્રીમિયમ ચૂકવણીની મુદતના આધારે પહેલા વર્ષનું કમિશન ૫% થી ૨૦% વચ્ચે હોઈ શકે છે.
-
બેંકિંગ લિંકેજ પર રોક: સૌથી મોટો પ્રસ્તાવ એ છે કે બેંકો અથવા લોન આપતી સંસ્થાઓ લોન સાથે વીમાનું વેચાણ ફરજિયાત નહીં કરી શકે.
બેંકો અને નાણાકીય શેરો માટે આનો અર્થ શું છે?
આઈઆરડીએઆઈના આ નવા પ્રસ્તાવોથી મોટી ભારતીય બેંકોની ફી-ઇનકમ (Fee Income) પર સીધી અસર પડી શકે છે. અત્યાર સુધી ‘બેંકાસ્યોરન્સ’ (Bancassurance) બેંકોની નોન-ઇન્ટરેસ્ટ ઇનકમમાં મોટો ફાળો આપતું હતું.
ચોઈસ ઇન્સ્ટીટ્યુશનલ ઇક્વિટીઝના બેંકિંગ અને ફાઇનાન્શિયલ સર્વિસિસના એનાલિસ્ટ ઇશાંક ગુપ્તાના જણાવ્યા અનુસાર, પ્રસ્તાવિત કમિશન કેપથી બેંકોની ફી આવક પર સીધી અસર થશે. તેમણે જણાવ્યું હતું કે વીમા વિતરણ એ ઉચ્ચ માર્જિનવાળો બિઝનેસ છે અને કમિશનની મર્યાદા ઘટવાથી બેંકોના ઓપરેટિંગ નફા પર અસર પડશે.
આગામી સમયમાં બેંકો અને નાણાકીય શેરોની ચાલ નિયમનકારી વિગતો, અંતિમ કમિશન કેપ અને મેનેજમેન્ટના પ્રતિસાદ પર આધાર રાખશે. રોકાણકારોએ કોઈપણ નિર્ણય લેતા પહેલા સર્ટિફાઇડ નિષ્ણાતોની સલાહ ચોક્કસ લેવી જોઈએ.
