સમગ્ર ભારતમાં અત્યારે 21 દિવસનું લોકડાઉન ચાલી રહ્યું છે,અને 14 એપ્રિલે લોકડાઉન પૂરુ થશે,ત્યારે કેટલાક રાજ્યોએ લોક ડાઉન વધારવા માટે કેન્દ્રને ભલામણ કરી છે તે સમયે ગુજરાતમાં પણ લોકડાઉન વધશે કે પૂર્ણ થશે તે માટે પણ ગુજરાત સરકારમાં ચાલતી મુવમેન્ટ અંગે આંતરિક તપાસ કરી હતી. જેમાં રાજ્યના એક ઉચ્ચ અધિકારીએ ગુજરાતના લોક ડાઉન અંગે ચાલી રહેલી ચર્ચા વિચારણાની કેટલીક માહિતી આપી હતી.
સમગ્ર ભારતમાં કોરોના લોકડાઉનનો સમય 14 એપ્રિલે પૂરો થઈ રહ્યો છે,જેમાં એક વાત ચોક્કસ જાણવા મળી કે ગુજરાતમાં લોક ડાઉન પૂર્ણપણે ખોલવામાં નહીં આવે, જે વિકલ્પ મુજબ ખુલશે ત્યાં અંશતઃ જ ખુલશે અને એ વિસ્તારમાં કોરોનાની ગાઇડ લાઈન મુજબ તમામ ચોકસાઈ રાખવી પડશે.
ગુજરાતમાં છેલ્લા 4 દીવસથી વધી રહેલા કોરોના પોઝિટિવના કેસો અને અન્ય વિસ્તારોમાં ફેલાતા જતા કેસોમાં આગામી 3 કે 4 દિવસમાં વધારો કે ઘટાડો થાય છે તેના આધારે લોકડાઉન અંગે આખરી નિર્ણય લેવામાં આવી શકે છે. આ માટે રાજ્યના આરોગ્ય અને ગૃહ વિભાગ ઉપરાંત દરેક જિલ્લા કલેક્ટર અને મ્યુનિસિપલ કમિશનર પાસેથી રોજે રોજના રિપોર્ટ લેવામાં આવે છે અને તેનું વિશ્લેષણ કરવામાં આવી રહ્યું છે. આમ, ગુજરાતમાં લોકડાઉન અંગેનો નિર્ણય 4 દિવસ પછી લેવામાં આવે તેવી શક્યતા છે.
ગુજરાતની કોરોનાની સ્થિતિ અંગે ગહન ચર્ચા
ગુજરાતમાં લોકડાઉન વધારવું કે નહીં તે અંગે ગુજરાત સરકાર દ્વારા વિશ્લેષણ કરવામાં આવી રહ્યું છે. જેમાં કેન્દ્રની ગાઇડ લાઈન મુજબ ગુજરાતની કોરોનાની સ્થિતિ અંગે ગહન ચર્ચા ચાલી રહી છે. જેમાં ગુજરાતમાં આગામી 3 થી4 દિવસમાં કોરોના પોઝિટિવ કેસોની સંખ્યા અને એરિયાના આધારે લોકડાઉન અંગે નિર્ણય કરવામાં આવશે. આ અંગે ગુજરાત સરકાર દ્વારા આરોગ્ય વિભાગ સહિત ગૃહ વિભાગ અને દરેક કલેકટર અને મ્યુનિસિપલ કમિશનર પાસેથી વિગતો મંગાવવામાં આવી રહી છે.
લોકડાઉન અંગે ચાલી રહેલી અલગ અલગ વિચારણા મુજબ સરકાર લોકડાઉન અંગે આ ત્રણ વિકલ્પ પર વિચારણા
વિકલ્પ નંબર-1: સંક્રમિત અને હોટસ્પોટ વિસ્તારમાં લોકડાઉન વધે
ગુજરાતના સંક્રમિત અને હોટસ્પોટ વિસ્તારમાં લોકડાઉનનો કડક અમલ કરી વધારી શકે છે જ્યારે એ સિવાયના વિસ્તારમાં અંશતઃ લોકડાઉન ખોલવામાં આવી શકે. આ વિકલ્પ મુજબ જ્યાં જ્યાં લોકડાઉન અંશતઃ ખુલે ત્યાંના લોકો એ જ વિસ્તારમાં રહે અને બીજા વિસ્તારમાં જવાની મનાઈ ફરમાવવામાં આવે.
વિકલ્પ નંબર-2: જે જિલ્લામાં કોરોના કેસ નથી ત્યાં અંશતઃ ખોલવામાં આવે
આ ઉપરાંત બીજા ઉકેલ માં એવું પણ કરી શકે છે કે, જે જિલ્લામાં છેલ્લા 14 દીવસમાં એક પણ કેસ નોંધાયો નથી ત્યાં લોકડાઉન અંશતઃ ખોલવામાં આવે, એટલે સરકાર લોકડાઉન મામલે જિલ્લા મુજબ કે હોટસ્પોટ વિસ્તાર મુજબ લોકડાઉન વધારવુ કે ખોલવું તે અંગે નિર્ણય લઈ શકે છે.
વિકલ્પ નંબર-3: કેસો વધે તો લોક ડાઉન 15 દિવસ વધારવામાં આવે
એક એવો પણ વિકલ્પ છે કે, ગુજરાતમાં કોરોના પોઝિટિવના કેસો વધવા લાગે અને અલગ અલગ વિસ્તારમાં લોકો વધુ સંક્રમિત થાય તો લોકડાઉનમાં બીજા 15 દિવસનો વધારો પણ કરવામાં આવી શકે છે.
