૧૦૦૦ કરોડના બજેટવાળી ફિલ્મ ‘રાકા’એ રચ્યો નવો કીર્તિમાન, મેકર્સને મળ્યું ગિનિસ સર્ટિફિકેટ
સિનેમા જગતમાં દરરોજ નવા રેકોર્ડ્સ બને અને તૂટે છે, પરંતુ કેટલીક ઉપલબ્ધિઓ એવી હોય છે જે ઇતિહાસના પાનાઓમાં હંમેશાં માટે અમર થઈ જાય છે. સાઉથ સુપરસ્ટાર અલ્લુ અર્જુન અને પ્રખ્યાત દિગ્દર્શક એટલીની આગામી ચર્ચિત ફિલ્મ ‘રાકા’એ કંઈક એવું જ જાદુ કરી બતાવ્યું છે.
‘પુષ્પા’ અને ‘પુષ્પા 2’ જેવી બ્લોકબસ્ટર ફિલ્મોથી દુનિયાભરમાં ધમાકો મચાવનાર અલ્લુ અર્જુન હવે પોતાની નવી ફિલ્મને લઈને ચર્ચામાં છે. સન પિક્ચર્સના બેનર હેઠળ બની રહેલી આ ફિલ્મ હજુ સિનેમાઘરોમાં રિલીઝ પણ નથી થઈ, અને તેણે રિલીઝના લગભગ એક વર્ષ પહેલા જ ગ્લોબલ લેવલ પર એક એવો રેકોર્ડ પોતાના નામે કરી લીધો છે, જેના પર આખા દેશને ગર્વ છે.
મોશન-કેપ્ચર ટેકનિકમાં રચાયો નવો ઇતિહાસ
ફિલ્મ ‘રાકા’એ એક સાથે ૩૭ કલાકારો (આર્ટિસ્ટ) સાથે મોશન-કેપ્ચર ટેકનિક (Motion-Capture Technology)નો ઉપયોગ કરીને ‘ગિનિસ વર્લ્ડ રેકોર્ડ્સ’માં પોતાનું નામ નોંધાવ્યું છે. ભારતીય સિનેમાના ઇતિહાસમાં આ પહેલીવાર છે જ્યારે આટલા મોટા પાયે રિયલ-ટાઇમમાં મોશન-કેપ્ચર ટેકનિકનો ઉપયોગ કરવામાં આવ્યો હોય.
નિર્માણ સાથે સંકળાયેલા સૂત્રોના જણાવ્યા અનુસાર, આ ઐતિહાસિક સિદ્ધિ ફેબ્રુઆરી ૨૦૨૬માં હાંસલ કરવામાં આવી હતી અને ૧૫ સપ્ટેમ્બર ૨૦૨૬ના રોજ નિર્માતાઓને સત્તાવાર પ્રમાણપત્ર સોંપવામાં આવ્યું હતું. ગિનીસ વર્લ્ડ રેકોર્ડ્સના વરિષ્ઠ નિર્ણાયક (Senior Adjudicator) સ્વપ્નિલ ડાંગરીકરે એક ભવ્ય કાર્યક્રમમાં સુપરસ્ટાર અલ્લુ અર્જુન અને દિગ્દર્શક એટલીને આ પ્રતિષ્ઠિત પ્રમાણપત્ર અર્પણ કર્યું હતું.
સન પિક્ચર્સે શેર કરી ખુશખબરી
સોમવાર, ૨૧ સપ્ટેમ્બર ૨૦૨૬ના રોજ સન પિક્ચર્સે પોતાના સત્તાવાર સોશિયલ મીડિયા હેન્ડલ ‘એક્સ’ પર આ મોટા સમાચાર શેર કર્યા. તેમણે પોતાની પોસ્ટમાં લખ્યું—
“ઇતિહાસ રચાયો. એક એવી જીત જે ઇન્ડિયન સિનેમાને ગ્લોબલ સ્ટેજ પર લઈ જાય છે. ‘રાકા’એ રિયલ-ટાઇમમાં સૌથી વધુ (૩૭ કલાકારો) લોકોના મોશન-કેપ્ચરનો ગિનિસ વર્લ્ડ રેકોર્ડ બનાવ્યો છે.”
આ પોસ્ટ સામે આવતાની સાથે જ સોશિયલ મીડિયા પર ફેન્સનો ઉત્સાહ સાતમા આસમાને પહોંચી ગયો છે. શેર કરવામાં આવેલી તસવીરોમાં અલ્લુ અર્જુન અને એટલી ગર્વ સાથે ગિનિસ વર્લ્ડ રેકોર્ડનું સર્ટિફિકેટ પકડેલા નજરે પડી રહ્યા છે.
અલ્લુ અર્જુને વ્યક્ત કરી કૃતજ્ઞતા
આ ઐતિહાસિક સિદ્ધિ બદલ આનંદ વ્યક્ત કરતા સુપરસ્ટાર અલ્લુ અર્જુને કહ્યું, “અમને આ અસાધારણ સિદ્ધિ પર ખૂબ ગર્વ છે. આ એક એવી ક્ષણ છે જે વૈશ્વિક મંચ પર એક નવો માપદંડ સ્થાપિત કરે છે અને સિનેમાની સીમાઓને વધુ વિસ્તૃત કરે છે. હું આ પ્રેમ અને સમર્થન બદલ હૃદયપૂર્વક આભાર માનું છું.”
બે ભાગમાં બનશે ૧૦૦૦ કરોડી ‘રાકા’
અલ્લુ અર્જુન અને એટલીની આ મહત્ત્વાકાંક્ષી ફિલ્મ બે ભાગમાં બનાવવામાં આવી રહી છે, જેનું કુલ બજેટ આશરે ૧૦૦૦ કરોડ રૂપિયા જણાવવામાં આવી રહ્યું છે. ફિલ્મનો પહેલો ભાગ ડિસેમ્બર ૨૦૨૭ સુધીમાં સિનેમાઘરોમાં રિલીઝ થવાની સંભાવના છે. ફિલ્મના સ્ટાર કાસ્ટની વાત કરીએ તો અલ્લુ અર્જુનની સામે આ ફિલ્મમાં બોલિવૂડની સુપરસ્ટાર દીપિકા પાદુકોણ મુખ્ય ભૂમિકામાં નજરે પડશે.
શૂટિંગના તબક્કા દરમિયાન જ ‘રાકા’એ ટેકનિકલ મોરચે જે સિદ્ધિ હાંસલ કરી છે તે સ્પષ્ટ કરે છે કે આ ફિલ્મ માત્ર બોક્સ-ઓફિસ પર સફળતા મેળવનારી સામાન્ય ફિલ્મ નહીં, પરંતુ ભારતીય સિનેમા માટે એક નવો સીમાચિહ્નરૂપ બની રહેશે.
