ક્રિસ્પી કોર્ન કબાબ: રેસ્ટોરન્ટ જેવો સ્વાદ હવે ઘરે જ માણો, જાણો મકાઈના કબાબ બનાવવાની પરફેક્ટ અને આસાન રીત
જ્યારે પણ કબાબનું નામ સાંભળીએ ત્યારે મગજમાં માંસાહારી વાનગીઓનો વિચાર આવે, પરંતુ શાકાહારીઓમાં ‘કોર્ન કબાબ’ એક અત્યંત લોકપ્રિય અને સ્વાદિષ્ટ વિકલ્પ છે. મકાઈના દાણાની કુદરતી મીઠાશ અને ભારતીય મસાલાઓનું મિશ્રણ આ કબાબને એક અલગ જ લેવલ પર લઈ જાય છે. પછી તે બાળકોનો જન્મદિવસ હોય કે સાંજના નાસ્તાની મહેફિલ, આ કોર્ન કબાબ દરેક પ્રસંગે હિટ સાબિત થાય છે. ચાલો જાણીએ આ કબાબ બનાવવા માટે કઈ સામગ્રીની જરૂર પડશે અને તેને બનાવવાની સાચી રીત કઈ છે.
કોર્ન કબાબ માટેની જરૂરી સામગ્રી
આ વાનગી બનાવવા માટે તમારે નીચે મુજબની વસ્તુઓ તૈયાર રાખવી પડશે:
- તાજા મકાઈ (બાફેલા): 200 ગ્રામ
- બાફેલા બટાકા: 2 નંગ (છોલેલા)
- બ્રેડ સ્લાઈસ (સફેદ): 4 નંગ (બાઈન્ડિંગ માટે)
- ઝીણી સમારેલી ડુંગળી: 1 નંગ (મધ્યમ કદની)
- ઝીણી સમારેલી શિમલા મરચું: અડધું
- લીલા મરચાં: 1 થી 2 (ઝીણા સમારેલા)
- કોથમીર: 1/4 કપ (ઝીણી સમારેલી)
- ફુદીનાના પાન: 1/4 કપ (ઝીણા સમારેલા)
- લીંબુનો રસ: 2 નાની ચમચી
- લોટનું મિશ્રણ: કોર્ન ફ્લોર (2 ચમચી), બેસન (3 ચમચી), ચોખાનો લોટ (3 ચમચી)
- મસાલા: ગરમ મસાલો (1/3 ચમચી), લાલ મરચું પાવડર (1/3 ચમચી), મરી પાવડર (1/4 ચમચી), મેગી મસાલો (1 પેકેટ – ઓપ્શનલ)
- મીઠું: સ્વાદ મુજબ
- તેલ: તળવા માટે
બનાવવાની રીત: સ્ટેપ-બાય-સ્ટેપ ગાઈડ
1. મકાઈ અને બટાકાનું મિશ્રણ:
સૌ પ્રથમ બાફેલા મકાઈના દાણાને મિક્સર જારમાં લઈ અધકચરા (કોર્સલી) પીસી લો. ધ્યાન રાખવું કે પીસતી વખતે પાણી બિલકુલ ન ઉમેરવું. હવે આ મિશ્રણને એક મોટા બાઉલમાં કાઢી લો. તે જ બાઉલમાં બાફેલા બટાકાને છીણી લો અથવા હાથથી બરાબર મેશ કરી લો.
2. બ્રેડ અને શાકભાજી ઉમેરવા:
બ્રેડની સ્લાઈસને પાણીમાં પલાળી, તરત જ તેને બે હથેળી વચ્ચે દબાવીને વધારાનું પાણી નીચોવી લો. આ નીચોવેલી બ્રેડને મકાઈ અને બટાકાના મિશ્રણમાં ઉમેરો. હવે તેમાં સમારેલી ડુંગળી, શિમલા મરચું, લીલા મરચાં, કોથમીર અને ફુદીનો ઉમેરો.
3. લોટ અને મસાલાનું બાઈન્ડિંગ:
હવે આ મિશ્રણમાં બેસન, ચોખાનો લોટ અને કોર્ન ફ્લોર ઉમેરો. ત્યારબાદ લાલ મરચું, ગરમ મસાલો, મરી પાવડર, મીઠું અને લીંબુનો રસ ઉમેરો. જો તમે બાળકો માટે બનાવતા હોવ તો મેગી મસાલો ચોક્કસ ઉમેરજો, તેનાથી સ્વાદ બેગણો થઈ જશે. આ બધું જ બરાબર મિક્સ કરી એક લોટ જેવું તૈયાર કરો. આ મિશ્રણને ઢાંકીને 20 મિનિટ માટે ફ્રીજમાં સેટ થવા મૂકી દો.
4. કબાબને આકાર આપવો:
ફ્રીજમાંથી મિશ્રણ કાઢી, હાથમાં થોડું તેલ લગાવો અને મિશ્રણનો નાનો ભાગ લઈ તેને ગોળ અથવા લંબગોળ કબાબનો આકાર આપો. બધા કબાબ તૈયાર થઈ જાય એટલે તેને ફરીથી 30 મિનિટ માટે ફ્રીજમાં મૂકો. આ સ્ટેપ કરવાથી તળતી વખતે કબાબ તૂટશે નહીં અને તેલ પણ ઓછું પીશે.
5. તળવાની પ્રક્રિયા:
એક કઢાઈમાં તેલ ગરમ કરો. તેલ બરાબર ગરમ થઈ જાય એટલે ગેસની આંચ મધ્યમ (મીડિયમ) કરી દો. હવે સાવધાનીપૂર્વક 2-3 કબાબ તેલમાં મૂકો. તેને બંને તરફથી સોનેરી અને કડક (ગોલ્ડન બ્રાઉન) થાય ત્યાં સુધી તળો. કબાબને વચ્ચે-વચ્ચે પલટાવતા રહેવું જેથી તે બધી બાજુથી સરખા ચઢી જાય.
સર્વિંગ અને સ્ટોરેજ ટિપ્સ:
સર્વિંગ: તૈયાર થયેલા ગરમાગરમ કોર્ન કબાબને કિચન ટૉવેલ પર કાઢી લો જેથી વધારાનું તેલ સોષાઈ જાય. તેને ફુદીનાની તીખી ચટણી અને ટોમેટો કેચઅપ સાથે પીરસો. ઉપરથી થોડો ચાટ મસાલો ભભરાવવાથી તેનો સ્વાદ વધુ ખીલી ઉઠશે.
હેલ્ધી ટિપ: જો તમે તળેલું ખાવાનું ટાળવા માંગતા હોવ, તો આ કબાબને નોન-સ્ટિક પેન પર થોડું તેલ મૂકીને ‘શેલો ફ્રાય’ પણ કરી શકો છો અથવા એર ફ્રાયરમાં પણ બનાવી શકો છો.
