પાકેલા કેળામાંથી બનાવો ટેસ્ટી બરફી: મેંદા કે ખાંડ વગર તૈયાર થશે આ મીઠાઈ, નોંધી લો રેસીપી
ઘણીવાર ઘરમાં લાવેલા કેળા વધુ પડતા પાકી જાય ત્યારે તેને કોઈ ખાવા તૈયાર હોતું નથી. જો તમારી પાસે પણ આવા કેળા પડ્યા હોય તો તેને ફેંકી દેવાને બદલે તમે તેમાંથી પૌષ્ટિક અને સ્વાદિષ્ટ બરફી બનાવી શકો છો. આ મીઠાઈની સૌથી ખાસ વાત એ છે કે તેમાં મેંદા કે ખાંડનો ઉપયોગ કરવામાં આવતો નથી, જે તેને સ્વાસ્થ્ય માટે પણ ઉત્તમ બનાવે છે. બાળકોથી લઈને વડીલો સુધી દરેકને આ મીઠાઈ ખૂબ ભાવશે.
કેળાની બરફી માટેની સામગ્રી
સ્વાદિષ્ટ બરફી તૈયાર કરવા માટે નીચે મુજબની સામગ્રી એકઠી કરી લો
- પાકેલા કેળા: 3 નંગ
- ગોળ: 1 કપ
- ઘી: અડધો કપ
- ઘઉંનો લોટ: અડધો કપ
- સોજી: અડધા કપથી થોડી ઓછી
- કેસર પાવડર: 1 ચમચી
- ઈલાયચી પાવડર: 1 ચમચી
- મિક્સ ડ્રાયફ્રૂટ્સ: અડધો કપ (ઝીણા સમારેલા)
- વધારાનું ઘી: 2 ચમચી
કેવી રીતે બનાવશો કેળાની બરફી?
સ્ટેપ 1: કેળાની પ્યુરી તૈયાર કરો
સૌ પ્રથમ ત્રણ પાકેલા કેળા લો, તેની છાલ ઉતારી લો. તેને મિક્સર જારમાં નાખીને એકદમ સ્મૂધ પેસ્ટ બનાવી લો. ધ્યાન રાખવું કે તેમાં કેળાના ટુકડા ન રહી જાય.
સ્ટેપ 2: ગોળની ચાસણી બનાવો
ગેસ પર એક કડાઈમાં એક કપ ગોળ અને એક કપ પાણી નાખો. ગોળ ઓગળી જાય અને મિશ્રણ થોડું ઘટ્ટ થઈને ચાસણી જેવું બને ત્યાં સુધી તેને પકાવો. ચાસણી તૈયાર થાય એટલે તેને સાઈડ પર રાખી દો.
સ્ટેપ 3: લોટ અને સોજીને શેકો
બીજા એક પેનમાં અડધો કપ ઘી ગરમ કરો. તેમાં ઘઉંનો લોટ અને સોજી ઉમેરો. તેને ધીમા તાપે સતત હલાવતા રહીને બ્રાઉન રંગના થાય ત્યાં સુધી સારી રીતે શેકો.
સ્ટેપ 4: કેળાનું મિશ્રણ ઉમેરો
જ્યારે લોટ અને સોજી સરસ શેકાઈ જાય અને સુગંધ આવવા લાગે, ત્યારે તેમાં કેળાની પ્યુરી ઉમેરો. ફરીથી લો ફ્લેમ પર આ મિશ્રણને બરાબર પકાવો.
સ્ટેપ 5: ચાસણી અને કેસર ઉમેરો
મિશ્રણ બરાબર મિક્સ થઈ જાય એટલે તેમાં તૈયાર કરેલી ગોળની ચાસણી અને કેસર પાવડર ઉમેરો. બધું એકરસ ન થાય ત્યાં સુધી હલાવતા રહો.
સ્ટેપ 6: ડ્રાયફ્રૂટ્સ અને ફ્લેવર
મિશ્રણ ઘટ્ટ થવા લાગે ત્યારે તેમાં વધારાની બે ચમચી ઘી, ઈલાયચી પાવડર અને ઝીણા સમારેલા ડ્રાયફ્રૂટ્સ ઉમેરો. મિશ્રણ પેન છોડવા લાગે ત્યાં સુધી તેને મિક્સ કરો.
સ્ટેપ 7: બરફી સેટ કરો
તૈયાર મિશ્રણને હળવું ઠંડું થવા દો. હવે એક કન્ટેનર અથવા થાળીમાં ઘી લગાવો અને તેમાં આ મિશ્રણ પાથરીને સરખી રીતે સેટ કરો.
સ્ટેપ 8: કટિંગ અને સર્વિંગ
આ મિશ્રણને બે થી ત્રણ કલાક માટે ફ્રિજમાં સેટ થવા મૂકી દો. બરાબર સેટ થઈ જાય એટલે તેને બહાર કાઢી છરીની મદદથી મનગમતા ચોરસ કે ડાયમંડ શેપમાં કાપી લો.
