શું UPI પેમેન્ટ વખતે અજાણ્યા લોકો પાસે જાય છે તમારો નંબર? જાણો કેવી રીતે તમારી પ્રાઈવસી સુરક્ષિત રાખવી

શું તમે પણ UPI IDમાં મોબાઈલ નંબર વાપરો છો? સાયબર ફ્રોડથી બચવા આજે જ કરો આ જરૂરી ફેરફાર

આજના સમયમાં આપણે ચાની કિટલીથી લઈને મોટા શોપિંગ મોલ સુધી દરેક જગ્યાએ યુપીઆઈ (UPI) દ્વારા પેમેન્ટ કરીએ છીએ. દિવસમાં 10, 15 કે તેથી વધુ વખત આપણે સ્કેન કરીને અથવા નંબર દ્વારા પૈસા મોકલીએ છીએ. પરંતુ શું તમે ક્યારેય વિચાર્યું છે કે દર વખતે પેમેન્ટ કરતી વખતે તમે તમારો મોબાઈલ નંબર કોઈ અજાણી વ્યક્તિ સાથે શેર કરી રહ્યા છો?

જ્યારે પણ તમે કોઈને UPI દ્વારા પૈસા મોકલો છો, ત્યારે તમારી UPI ID માં તમારો મોબાઈલ નંબર દેખાય છે (જેમ કે 1234567890@apl અથવા 1234567890@ybl). આ નંબરનો દુરુપયોગ થવાની શક્યતા હંમેશા રહેલી છે. જો તમે ઈચ્છો છો કે તમારી સુવિધા પણ જળવાઈ રહે અને સુરક્ષા પણ, તો આ લેખ તમારા માટે છે. હવે તમે તમારો મોબાઈલ નંબર જાહેર કર્યા વગર પણ UPI પેમેન્ટ કરી શકો છો.

UPIમાં મોબાઈલ નંબર કેમ છુપાવવો જોઈએ?

મોટાભાગના લોકોનો બેંકમાં રજિસ્ટર્ડ મોબાઈલ નંબર જ તેમની UPI ID હોય છે. આ નંબર અજાણ્યા લોકો પાસે જવાથી:

1. પ્રાઈવસી જોખમાય છે: અજાણ્યા લોકો તમને કોલ કે મેસેજ કરીને પરેશાન કરી શકે છે.

2. માર્કેટિંગ કોલ્સ: તમારો ડેટા માર્કેટિંગ કંપનીઓ પાસે પહોંચી શકે છે.

3. સાયબર ફ્રોડ: ઠગ લોકો તમારા નંબરનો ઉપયોગ કરીને તમારી સાથે છેતરપિંડી કરવાનો પ્રયાસ કરી શકે છે.

Google Pay પરથી મોબાઈલ નંબર કેવી રીતે દૂર કરવો? (સ્ટેપ-બાય-સ્ટેપ)

જો તમે Google Pay વાપરો છો, તો નીચેના સ્ટેપ્સ ફોલો કરીને તમે તમારી UPI ID બદલી શકો છો:

1. એપ ઓપન કરો: સૌથી પહેલા તમારા સ્માર્ટફોનમાં Google Pay એપ ખોલો.

2. પ્રોફાઈલ આઈકન: હોમ સ્ક્રીન પર ઉપરની તરફ જમણી બાજુએ તમારા પ્રોફાઈલ આઈકન પર ટેપ કરો.

3. બેંક એકાઉન્ટ: અહીં તમને ‘Bank Account’ નો વિકલ્પ દેખાશે, તેના પર ક્લિક કરો.

4. પ્રાથમિક બેંક પસંદ કરો: જો તમારી પાસે એકથી વધુ બેંક એકાઉન્ટ લિંક હોય, તો જે Primary Bank Account હોય તેના પર ક્લિક કરો.

5. મેનેજ યુપીઆઈ નંબર: હવે તમને ‘Manage UPI Numbers’ નો વિકલ્પ જોવા મળશે, તેના પર ટેપ કરો.

6. નવી આઈડી બનાવો: અહીં તમે તમારા મોબાઈલ નંબરવાળી આઈડીને હટાવીને કોઈ પણ Random (રેન્ડમ) અક્ષરો કે શબ્દો વાળી નવી UPI ID બનાવી શકો છો. એકવાર નવી આઈડી એક્ટિવેટ થઈ જાય પછી પેમેન્ટ વખતે તમારો મોબાઈલ નંબર દેખાશે નહીં.

PhonePe અને અન્ય એપ્સમાં શું કરવું?

Google Pay ની જેમ જ તમે PhonePe માં પણ સેટિંગ્સમાં જઈને તમારી UPI ID એડિટ કરી શકો છો. ત્યાં તમે તમારા મોબાઈલ નંબરને બદલે તમારી પસંદગીનું કોઈ નામ કે યુનિક આઈડી સેટ કરી શકો છો. પેમેન્ટ તો તમારા બેંક એકાઉન્ટમાંથી જ થશે, પરંતુ સામેવાળી વ્યક્તિને માત્ર તમારી નવી આઈડી (દા.ત. mysecurepay@ybl) જોવા મળશે.

ડિજિટલ સુરક્ષા તમારા હાથમાં

મિત્રો, ટેકનોલોજી આપણું કામ સરળ બનાવે છે, પણ તેની સાથે થોડી સાવચેતી પણ જરૂરી છે. યુપીઆઈ આઈડી બદલવી એ માત્ર 2 મિનિટનું કામ છે, પરંતુ તે તમને ભવિષ્યની ઘણી મુશ્કેલીઓથી બચાવી શકે છે. ખાસ કરીને બહેનો અને દીકરીઓ માટે આ ફીચર ખૂબ જ ઉપયોગી છે જેથી તેમનો નંબર અજાણ્યા લોકો સુધી ન પહોંચે.

ડિજિટલ ટ્રાન્ઝેક્શન કરો, પણ સ્માર્ટ બનીને. તમારો મોબાઈલ નંબર તમારી અંગત માહિતી છે, તેને સુરક્ષિત રાખવી એ જ સમજદારી છે.