BSNLનો ગ્રાહકો માટે ધમાકા પ્લાન: ₹૨,૭૯૯ માં આખા વર્ષ માટે વારંવારના રિચાર્જમાંથી મુક્તિ, દરરોજ ૩GB ડેટા સાથે મળશે અઢળક લાભો
ખાનગી ટેલિકોમ કંપનીઓ દ્વારા રિચાર્જ પ્લાનના દરોમાં કરવામાં આવેલા વધારા વચ્ચે સરકારી ટેલિકોમ કંપની ભારત સંચાર નિગમ લિમિટેડ (BSNL) ગ્રાહકો માટે એકથી ચડિયાતા સસ્તા અને બજેટ-ફ્રેન્ડલી પ્લાન્સ રજૂ કરી રહી છે. દર મહિને પ્લાન રિન્યૂ કરવાની કે ઊંચા ખર્ચે સીમ કાર્ડ સક્રિય રાખવાની ઝંઝટમાંથી મુક્તિ આપવા માટે BSNL એ ૩૬૫ દિવસની વેલિડિટી ધરાવતો એક વિશેષ વાર્ષિક પ્રીપેડ પ્લાન લોન્ચ કર્યો છે. આ પ્લાનમાં અનલિમિટેડ વોઇસ કોલિંગ, ઉચ્ચ સ્પીડ ડેટા, ફ્રી SMS અને મનોરંજનના તમામ લાભો આવરી લેવામાં આવ્યા છે.
₹૨,૭૯૯ ના વાર્ષિક પ્લાનના મુખ્ય ફાયદા
બીએસએનએલ દ્વારા પોતાના સત્તાવાર ‘X’ (ટ્વિટર) હેન્ડલ પર શેર કરવામાં આવેલી વિગતો અનુસાર, આ લોકપ્રિય વાર્ષિક પ્રીપેડ પ્લાનની કિંમત ₹૨,૭૯૯ રાખવામાં આવી છે. આ પ્લાનની વેલિડિટી પૂરા ૩૬૫ દિવસ એટલે કે આખા એક વર્ષની છે.
આ પ્લાન હેઠળ ગ્રાહકોને સમગ્ર ભારતમાં કોઈપણ નેટવર્ક પર અનલિમિટેડ વોઇસ કોલિંગ અને મફત નેશનલ રોમિંગની સુવિધા મળે છે. ઇન્ટરનેટ વપરાશકર્તાઓ માટે આ પ્લાનમાં દરરોજ ૩GB હાઇ-સ્પીડ ડેટા પૂરો પાડવામાં આવે છે, જે રોજિંદા ઓનલાઇન કાર્યો, વિડિયો સ્ટ્રીમિંગ અને વર્ક-ફ્રોમ-હોમ માટે પૂરતો છે. આ ઉપરાંત, દરરોજ ૧૦૦ મફત એસએમએસ (SMS) નો લાભ પણ મળે છે.
ગ્રાહકોના મનોરંજનને ધ્યાનમાં રાખીને, કંપની આ પ્લાન સાથે ‘BiTV’ નું મફત સબ્સ્ક્રિપ્શન પણ આપી રહી છે, જેની મદદથી વપરાશકર્તાઓ કોઈપણ વધારાના ચાર્જ વગર પોતાના સ્માર્ટફોન પર ૩૫૦ થી વધુ લાઇવ ટીવી ચેનલ્સનો આનંદ માણી શકે છે.
સરકારી પ્રોત્સાહન અને વધી રહેલો યુઝર બેઝ
સરકાર પણ દેશમાં BSNL ના નેટવર્ક અને સેવાઓને મજબૂત બનાવવા માટે સતત પ્રયત્નશીલ છે. નાણામંત્રીએ કેન્દ્રીય બજેટમાં આ સરકારી ટેલિકોમ કંપની માટે ₹૨૮,૪૭૩ કરોડની માતબર રકમ ફાળવી છે, જેનાથી નેટવર્ક ઇન્ફ્રાસ્ટ્રક્ચરને ઝડપથી આધુનિક બનાવવામાં આવી રહ્યું છે.
ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) ના તાજેતરના અહેવાલ મુજબ, ખાનગી કંપનીઓના મોંઘા પ્લાન્સથી કંટાળીને લાખો ગ્રાહકો BSNL તરફ વળી રહ્યા છે. માર્ચ મહિનામાં જ BSNL એ હજારો નવા યુઝર્સ પોતાના નેટવર્ક સાથે જોડ્યા હતા. આ સાથે જ કંપનીનો કુલ સક્રિય યુઝર બેઝ વધીને ૯૨.૯ મિલિયન (આશરે ૯.૨ કરોડ) સુધી પહોંચી ગયો છે.
5G સેવાઓની તૈયારીઓ અંતિમ તબક્કામાં
BSNL એ ગયા વર્ષે દેશભરમાં પોતાની ૪G સેવાઓ સફળતાપૂર્વક લોન્ચ કરી હતી અને હવે કંપની પોતાના ગ્રાહકોને ૫G નેટવર્ક આપવા માટે ઝડપથી આગળ વધી રહી છે. કંપની ચાલુ વર્ષ દરમિયાન દિલ્હી અને મુંબઈ જેવા દેશના મુખ્ય મહાનગરોમાં પોતાની ૫G સેવાઓ વિધિવત રીતે શરૂ કરવા માટે પૂર્ણ તૈયારીઓ કરી રહી છે. લાંબા ગાળાની વેલિડિટી અને સસ્તા દરોને કારણે BSNL નો આ વાર્ષિક પ્લાન અત્યારે ભારતીય ટેલિકોમ માર્કેટમાં ભારે આકર્ષણનું કેન્દ્ર બન્યો છે.
