સ્માર્ટ હોમ હબ HomeView થી લઈને નવા ગેજેટ્સ સુધી, આજની ઇવેન્ટમાં શું હશે ખાસ?
ટેક જગતની દિગ્ગજ કંપની એપલ (Apple) ના ચાહકો અને ટેક પ્રેમીઓ માટે આજનો દિવસ ખૂબ જ ખાસ છે. કંપની આજે તેના વિશેષ ‘Welcome Home’ ઇવેન્ટનું આયોજન કરવા જઈ રહી છે, જે સંપૂર્ણપણે સ્માર્ટ હોમ ઇકોસિસ્ટમ અને હોમ ડિવાઇસીસ પર કેન્દ્રિત રહેવાની છે. આ ઇવેન્ટમાં એપલ તેના કેટલાક નવા અને આધુનિક સ્માર્ટ હોમ પ્રોડક્ટ્સથી પડદો હટાવી શકે છે. ટેક વર્લ્ડમાં સૌથી વધુ ચર્ચા કંપનીના બિલકુલ નવા સ્માર્ટ ડિસ્પ્લે ‘HomeView’ ને લઈને થઈ રહી છે. આ ઉપરાંત HomePod mini અને Apple TV 4K ના નવા અને અપડેટેડ વેરિઅન્ટ્સ પણ રજૂ થવાની સંભાવના છે. જો કે, એપલે હજુ સુધી આ પ્રોડક્ટ્સના ફીચર્સ, કિંમત કે ઉપલબ્ધતા અંગે કોઈ સત્તાવાર નિવેદન નથી આપ્યું. ચાલો જાણીએ કે આ ઇવેન્ટ તમે ક્યારે અને ક્યાં જોઈ શકો છો.
કેટલા વાગ્યે શરૂ થશે Apple Welcome Home ઇવેન્ટ?
એપલનો આ સ્પેશિયલ ઇવેન્ટ આજ, 13 ઓક્ટોબર 2026 ના રોજ યોજાઈ રહ્યો છે. મીડિયા રિપોર્ટ્સ અને લીક્સ અનુસાર, આ કાર્યક્રમ ભારતીય સમયાનુસાર (IST) સાંજે 6:30 વાગ્યે શરૂ થઈ શકે છે. આ ઇવેન્ટમાં ઓનલાઇન પ્રેઝન્ટેશનની સાથે-સાથ ન્યૂયોર્કમાં મીડિયા માટે એક ખાસ ઓન-ગ્રાઉન્ડ કાર્યક્રમ પણ રાખવામાં આવ્યો છે.
જો તમે આ ઇવેન્ટને લાઇવ જોવા માંગતા હો, તો તેને એપલની સત્તાવાર યુટ્યુબ ચેનલ (YouTube), એપલ ઇવેન્ટ્સ (Apple Events) ની વેબસાઇટ અને Apple TV એપ પર સરળતાથી લાઇવ સ્ટ્રીમ કરી શકો છો.
શું હશે આ ઇવેન્ટમાં સૌથી ખાસ?
આ આખા ઇવેન્ટનું મુખ્ય આકર્ષણ HomeView સ્માર્ટ હોમ હબ હોઈ શકે છે. લીક્સ મુજબ, આ ડિવાઇસમાં આશરે 6 ઇંચની ચોરસ (Square) સ્ક્રીન આપવામાં આવી શકે છે અને તે શક્તિશાળી A18 ચિપસેટ પર કામ કરશે. તેને ખાસ કરીને ઘરના તમામ સ્માર્ટ ડિવાઇસીસને એક જ જગ્યાએથી કંટ્રોલ કરવા માટે તૈયાર કરવામાં આવી રહ્યું છે.
આ સ્માર્ટ ડિસ્પ્લેની મદદથી યુઝર્સ તેમના કેલેન્ડર, મેસેજ, ફોટોઝ, નોટ્સ, રિમાઇન્ડર અને હવામાન જેવી માહિતી એક નજરમાં જોઈ શકશે. આ ઉપરાંત, તેમાં વિડિયો કૉલિંગ માટે FaceTime નો સપોર્ટ મળવાની પણ આશા છે. આ ડિવાઇસમાં ટચ સ્ક્રીનની સાથે-સાથે સિરી (Siri) દ્વારા વૉઇસ કમાન્ડ પર વધુ ધ્યાન કેન્દ્રિત કરવામાં આવશે, જેથી તેનો ઉપયોગ કરવો ખૂબ જ સરળ બને. જો કે, રિપોર્ટ્સનું માનીએ તો તેમાં અલગથી એપ્સ ડાઉનલોડ કરવા માટે App Store નો સપોર્ટ નહીં મળે.
HomePod mini અને Apple TV 4Kમાં શું બદલાવ થશે?
સ્માર્ટ ડિસ્પ્લે ઉપરાંત એપલ તેના લોકપ્રિય ઓડિયો ડિવાઇસ HomePod mini નું નવું વર્ઝન પણ લાવી શકે છે, જેમાં લેટેસ્ટ S10 ચિપ મળવાની આશા છે. તેને પિંક, ગ્રીન, બ્લૂ, વાઇટ અને મિડનાઇટ જેવા આકર્ષક કલર્સમાં રજૂ કરવામાં આવી શકે છે.
બીજી બાજુ, Apple TV 4K ના નવા મોડેલમાં વધુ સ્પીડ અને બહેતર પર્ફોર્મન્સ માટે A19 ચિપ આપવામાં આવી શકે છે. એવી પણ ચર્ચાઓ છે કે કંપની નવા Apple TV માં એવા ઇન-બિલ્ટ માઇક્રોફોનની ટેસ્ટિંગ કરી રહી છે, જેનાથી યુઝર્સ રિમોટ ઉઠાવ્યા વગર સીધા રૂમમાંથી જ સિરી (Siri) સાથે વાત કરી શકશે. આ ઉપરાંત, નવા Siri Remote માં એક નાનો સ્પીકર આપવાની પણ શક્યતા છે, જેનાથી રિમોટ ક્યાંક ખોવાઈ જવા પર તેને શોધવું ખૂબ જ સરળ બની જશે.
સ્માર્ટ હોમ કેટેગરીમાં એપલની આ નવી પહેલ એમેઝોન અને ગૂગલ જેવી કંપનીઓને સખત સ્પર્ધા આપી શકે છે.
