મે ૨૦૨૭ માં અહેવાલ બાદ પણ કેમ તરત નહીં વધે પગાર? જાણો પૂરી પ્રક્રિયા
કેન્દ્રીય કર્મચારીઓ અને પેન્શનરોમાં ૮મા પગાર પંચને લઈને ચર્ચાઓ અત્યંત તેજ બની રહી છે. દરેક કર્મચારી આગામી સમયમાં થનારા પોતાના પગાર વધારાના અંદાજો લગાવી રહ્યા છે. જોકે, વર્તમાન સમયમાં સૌથી મોટો પ્રશ્ન એ ઊભો થયો છે કે ૮મા પગાર પંચનો વાસ્તવિક અમલ ક્યારે થશે અને વધેલો પગાર કર્મચારીઓના બેંક ખાતામાં ક્યારથી જમા થવાનું શરૂ થશે?
કેટલાક કર્મચારીઓમાં એવી ગેરસમજ પ્રવર્તે છે કે પગાર પંચ મે ૨૦૨૭ સુધીમાં સરકારને પોતાનો આખરી અહેવાલ સુપરત કરશે અને તે જ મહિનાથી તેમના ખાતામાં વધેલો પગાર આવવા લાગશે. જો તમે પણ આવું વિચારી રહ્યા હોવ, તો આ ધારણા સંપૂર્ણપણે સાચી નથી.
મે ૨૦૨૭ નો મહિનો કેમ મહત્વપૂર્ણ છે?
૮મા પગાર પંચને પોતાની તમામ ભલામણો તૈયાર કરીને સરકાર સમક્ષ આખરી અહેવાલ રજૂ કરવા માટે ૧૮ મહિનાનો સમય આપવામાં આવ્યો છે, જે સમયમર્યાદા મે ૨૦૨૭ માં પૂર્ણ થાય છે. આ મહિનો કેન્દ્રીય કર્મચારીઓ અને પેન્શનરો માટે ચોક્કસપણે ખૂબ જ મહત્વપૂર્ણ છે, પરંતુ તેનો અર્થ એવો બિલકુલ નથી કે તે જ મહિનાથી પગાર વધારો સીધો લાગુ થઈ જશે.
સરકારે કમિશનને ૧૮ મહિનાની અંદર અહેવાલ આપવાનો નિર્દેશ આપ્યો છે. હવે આ નિર્ણય પંચ પર નિર્ભર કરે છે કે તેઓ આ અહેવાલ પૂરા ૧૮ મહિનામાં જમા કરાવે છે કે તે પહેલાં તૈયાર કરીને સુપરત કરે છે.
અહેવાલ સુપરત કર્યા બાદ પણ થશે વિલંબ
જો કમિશન મે ૨૦૨૭ અથવા તે પહેલાં પોતાનો રિપોર્ટ સરકારને સોંપી દે, તો પણ તે જ દિવસથી પગારમાં વધારો શક્ય બનતો નથી. ૮મું પગાર પંચ પોતાની ભલામણો એક સત્તાવાર રિપોર્ટ સ્વરૂપે સરકાર સમક્ષ મૂકશે. ત્યારબાદ કેન્દ્રીય મંત્રીમંડળ અને નાણાં મંત્રાલયના ઉચ્ચ અધિકારીઓ આ સમગ્ર રિપોર્ટની ઝીણવટભરી સમીક્ષા કરશે.
આ સમીક્ષા બેઠકો બાદ સરકાર ૮મા પગાર પંચ માટે આખરી ફિટમેન્ટ ફેક્ટર (Fitment Factor) પર અંતિમ નિર્ણય લેશે અને તેની સત્તાવાર જાહેરાત કરશે. કમિશન દ્વારા અહેવાલ સુપરત કરવાથી લઈને સરકાર દ્વારા તેની મંજૂરી અને જાહેરાત થવા વચ્ચે આશરે ૩ થી ૪ મહિનાનો સમય લાગી શકે છે, કારણ કે સરકાર જાહેર હિત અને સરકારી તિજોરી પર પડનારા બોજને ધ્યાન ધ્યાનમાં રાખીને નિર્ણય લેતી હોય છે.
પગારમાં કેટલો વધારો થઈ શકે અને ફિટમેન્ટ ફેક્ટરનું ગણિત
૮મા પગાર પંચ હેઠળ કર્મચારીઓના પગારમાં થનારો વધારો સંપૂર્ણપણે નક્કી થનારા ફિટમેન્ટ ફેક્ટર પર નિર્ભર રહેશે. ઉદાહરણ તરીકે, ૭મા પગાર પંચમાં ફિટમેન્ટ ફેક્ટર ૨.૫૭ ગણો રાખવામાં આવ્યો હતો, જેના પરિણામે કર્મચારીઓનો લઘુત્તમ મૂળ પગાર (Basic Pay) રૂ. ૭,૦૦૦ થી વધીને સીધો રૂ. ૧૮,૦૦૦ થયો હતો.
હાલમાં કર્મચારી સંગઠનો અને સંઘો ૮મા પગાર પંચમાં ફિટમેન્ટ ફેક્ટર વધારીને ૩.૬૮ ગણો કરવાની કડક માંગ કરી રહ્યા છે. જોકે, આર્થિક પરિસ્થિતિઓને જોતાં બજારના નિષ્ણાતો અને વર્તુળોનું માનવું છે કે સરકાર તેને આશરે ૨.૮૬ ગણો અથવા ૩.૦૦ ગણો નક્કી કરી શકે છે. જોકે આ મુદ્દે હજુ સુધી કેન્દ્ર સરકાર તરફથી કોઈ અંતિમ નિર્ણય લેવામાં આવ્યો નથી.
નોંધનીય છે કે તાજેતરમાં જ સરકારે સંસદમાં લોકસભા દરમિયાન સ્પષ્ટતા કરી હતી કે કમિશને હજુ સુધી તેનો આખરી અહેવાલ રજૂ કર્યો નથી અને ૮મા પગાર પંચના અમલીકરણની ચોક્કસ તારીખ અંગે સરકાર દ્વારા કોઈ સત્તાવાર જાહેરાત કરવામાં આવી નથી. તેથી કર્મચારીઓએ સત્તાવાર નોટિફિકેશન આવે ત્યાં સુધી રાહ જોવી પડશે.
