બોલિવૂડ એક્ટર વિદ્યુત જામવાલ અને ફેશન ડિઝાઈનર નંદિતા મેહતાની અત્યારે પોતાના લગ્નના કારણે ચર્ચામાં છે. હવે સમાચાર આવી રહ્યા છે કે વિદ્યુત અને નંદિતા આ મહિને લંડનમાં લગ્ન કરી શકે છે. રિપોર્ટ્સના અનુસાર, નંદિતા છેલ્લા ઘણા દિવસથી લંડનમાં છે. હવે ટૂંક સમયમાં વિદ્યુત પણ લંડન રવાના થશે. તેના પછી બંને ત્યાં લગ્ન કરશે.
અગાઉ કેટલાક રિપોર્ટ્સમાં જણાવવામાં આવ્યું હતું કે, વિદ્યુત અને નંદિતા બંને પહેલાથી જ લગ્નના બંધનમાં બંધાઈ ચૂક્યા છે. આ સિક્રેટ લગ્નમાં તેમના પરિવારના સભ્યો અને નજીકના મિત્રો સામેલ થયા હતા. આ પહેલા બંનેએ સગાઈ પણ સિક્રેટ રીતે કરી હતી અને તેના વિશે તેમણે કોઈને જાણ નહોતી કરી. બાદમાં સમાચાર આવ્યા હતા કે બંનેની સગાઈ થઈ ગઈ છે. આવી જ રીતે હવે કપલ 15 દિવસમાં એ જાહેરાત કરી શકે છે કે બંને લગ્નના બંધનમાં બંધાઈ ગયા છે.
વિદ્યુત જામવાલ અને નંદિતા મેહતાનીએ ગયા વર્ષે પોતાની તસવીરો સોશિયલ મીડિયા પર શેર કરી રિલેશનશિપની જાણકારી આપી બધાને આશ્ચર્યચકિત કરી દીધા હતા. તેના પછી પ્રેમની નિશાની આગરાના તાજમહેલની સામે વિદ્યુતે નંદિતાની સાથે પોતાની તસવીર શેર કરી સગાઈની જાણકારી આપી હતી.
વિદ્યુત જામવાલ અને નંદિતા મેહતાનીએ લગભગ 5-6 મહિના ડેટ કર્યા પછી સગાઈ કરી હતી. બંને હંમેશાં સોશિયલ મીડિયા પર સુંદર તસવીરો શેર કરતા રહે છે. થોડા દિવસ પહેલા જ નંદિતા મેહતાનીએ ઈન્સ્ટાગ્રામ પર વિદ્યુત જામવાલની સાથે સુંદર તસવીર શેર કરી લખ્યું હતું કે, ‘હું હંમેશાં તારી સાથે છું.’
વિદ્યુત જામવાલના વર્કફ્રન્ટની વાત કરીએ તો તાજેતરમાં રિલીઝ થયેલી ફિલ્મ ‘ખુદા હાફિઝ 2’ના કારણે ચર્ચામાં છે. આ ફિલ્મ બોક્સ ઓફિસ પર કંઈ ખાસ કમાલ નથી કરી શકી પરંતુ ફિલ્મમાં વિદ્યુતના એક્શનના વખાણ થઈ રહ્યા છે. તે સિવાય વિદ્યુત ‘આઈબી 71’ અને ‘શેર સિંહ રાણા’ જેવા પ્રોજેક્ટમાં વ્યસ્ત છે.
નંદિતા મેહતાનીના પહેલા લગ્ન કરિશ્મા કપૂરના પૂર્વ પતિ સંજય કપૂરની સાથે થયા હતા. બાદમાં બંનેના છૂટાછેડા થઈ ગયા, જેના પછી સંજય કપૂરે કરિશ્મા સાથે લગ્ન કર્યા હતા. તેના પછી નંદિતાનું અફેર ડીનો મોરિયા સાથે હતું. થોડા દિવસ અફેર પછી બંનેનું બ્રેકઅપ થઈ ગયું. તેમજ વિદ્યુત જામવાલની વાત કરીએ તો તે 2 વર્ષ સુધી મોના સિંહની સાથે રિલેશનશિપમાં હતો. તેના પછી બંનેનું બ્રેકઅપ થઈ ગયું અને મોનાએ ડિસેમ્બર 2019માં બિઝનેસમેન શ્યામ ગોપાલન સાથે લગ્ન કરી લીધા.
