વડા પાવ અને સેન્ડવીચને પણ ભૂલાવી દેશે! આ ચોમાસામાં ટ્રાય કરો ચીઝી ઠેચા પાવનો નવો ટ્વિસ્ટ
ચોમાસાની ભીની-ભીની ઋતુમાં જ્યારે બહારે કાળા વાદળો ઘેરાયા હોય અને ધીમી ધારે વરસાદ વરસતો હોય, ત્યારે ઘરમાં ગરમાગરમ અને ચટાકેદાર નાસ્તો ખાવાની મજા જ કંઈ અલગ હોય છે. મહારાષ્ટ્રીયન સ્ટ્રીટ ફૂડની શાન ગણાતો ‘ઠેચા પાવ’ આ ચોમાસામાં તમારી સાંજની ચાના સ્વાદને ચાર ગણો વધારી દેશે. લીલા મરચાં, લસણ અને શેકેલી મગફળીમાંથી બનતા તીખા અને મસાલેદાર ઠેચાનો ચટકારો કોઈપણ ફૂડ લવરના સ્વાદના તંતુઓને જગાડી દેવા માટે પૂરતો છે.
વરસાદી મોસમમાં જો તમને કંઈક નવું, તીખું અને એકદમ દેશી ફ્લેવરવાળું ખાવાનું મન થઈ રહ્યું હોય, તો ‘ઠેચા પાવ’ તમારા માટે પરફેક્ટ ઓપ્શન છે. મહારાષ્ટ્રની ટ્રેડિશનલ લસણ અને મરચાંની ચટણી જેને ‘ઠેચા’ કહેવામાં આવે છે, તેનો ઉપયોગ કરીને બનતો આ પાવનો નાસ્તો નાની-મોટી ભૂખ માટે અને ખાસ કરીને સાંજના ચાના ટાઈમ માટે અદ્ભુત છે. ચીઝ અને બટાકાના સ્ટફિંગ સાથે જ્યારે આ મસાલેદાર ઠેચાનું કોમ્બિનેશન મળે છે, ત્યારે બજારના મોંઘા વડાપાવ કે સેન્ડવીચ પણ તેની સામે ફિક્કા લાગે છે.
ઠેચા પાવ માટે જરૂરી સામગ્રી
આ ચટાકેદાર ડિશ બનાવવા માટે ૮ થી ૧૦ હળવા તીખા લીલા મરચાં, ૧૦ થી ૧૨ લસણની કળીઓ, અડધો કપ કાચી મગફળી, ૧ ચમચી જીરું, અડધો કપ તાજા લીલા ધાણા, સ્વાદ મુજબ મીઠું, ૨ થી ૩ ચમચી તેલ અને બટર લેવાનું રહેશે.
સ્ટફિંગ અને કોટિંગ માટે ૨ બાફેલા બટાકા, ૨ થી ૩ ચમચી બારીક સમારેલું કેપ્સિકમ, બારીક સમારેલી ડુંગળી અને ટામેટા, છીણેલું પ્રોસેસ અથવા મોઝરેલા ચીઝ, ચિલી ફ્લેક્સ અને મસાલા પાવ (બ્રેડ રોલ્સ) ની જરૂર પડશે.
પરફેક્ટ ઠેચા અને પાવ તૈયાર કરવાની રીત
સૌપ્રથમ એક પેનમાં મગફળીને ધીમા તાપે સૂકી શેકી લો અને તેની છાલ ઉતારી અલગ રાખો. હવે એક કડાઈ કે પેનમાં ૨ ચમચી તેલ ગરમ કરો. તેમાં સમારેલા લીલા મરચાં અને લસણની કળીઓ ઉમેરીને ૨ મિનિટ માટે સાંતળી લો. ત્યારબાદ તેમાં જીરું, બરછટ સમારેલા તાજા ધાણા, શેકેલી મગફળી અને સ્વાદ અનુસાર મીઠું ઉમેરીને બરાબર મિક્સ કરો. આ મિશ્રણ સહેજ ઠંડુ થાય એટલે મિક્સરમાં અથવા ખાંડણી-દસ્તામાં બરછટ (અધકચરું) પીસી લો. ધ્યાન રાખવું કે આ ઠેચા મસાલાની પેસ્ટ એકદમ લીસી ન થવી જોઈએ.
હવે પાવનું સ્ટફિંગ તૈયાર કરવા માટે એક બાઉલમાં બાફેલા બટાકાને છીણી લો. તેમાં ૨ ચમચી તૈયાર કરેલો ઠેચા મસાલા ઉમેરો. સાથે બારીક સમારેલા કેપ્સિકમ, ડુંગળી અને ટામેટા ઉમેરીને બરાબર મિક્સ કરી લો.
ત્યારબાદ તવા પર થોડું બટર કે માખણ ગરમ કરો. તેમાં ૧ ચમચી તૈયાર કરેલો ઠેચા મસાલા ઉમેરી સહેજ સાંતળો. હવે પાવને વચ્ચેથી કાપીને તવા પર રહેલા મસાલા અને માખણમાં બંને બાજુથી સરસ કોટ કરીને થોડા શેકી લો.
હવે પાવની વચ્ચે બટાકા અને ઠેચાનું મિશ્રણ ભરો, ઉપરથી પુષ્કળ પ્રમાણમાં છીણેલું ચીઝ, તાજા ધાણા અને ચિલી ફ્લેક્સ ભભરાવો. પાવની ઉપરની અને નીચેની સપાટી પર પણ થોડો મગફળી-ઠેચાનો મસાલો લગાવો. આ તૈયાર સેન્ડવીચ-પાવને તવા પર માખણ મૂકીને બંને બાજુથી ચીઝ ઓગળે અને પાવ સહેજ ક્રિસ્પી થાય ત્યાં સુધી શેકી લો.
ગરમાગરમ પીરસો અને માણો
તૈયાર થયેલા ગરમાગરમ સ્પાઈસી ઠેચા પાવને પ્લેટમાં કાઢી ઉપરથી વધારાનું ચીઝ અને ધાણા ભભરાવીને સર્વ કરો. ચોમાસાની સાંજે ગરમાગરમ આદુ કે મસાલા ચા સાથે આ તીખો અને ચટાકેદાર નાસ્તો પરિવારના દરેક સભ્યને ખૂબ જ પસંદ આવશે. આ વાનગી બનાવવામાં જેટલી ઝડપી છે, સ્વાદમાં એટલી જ લાજવાબ છે.
