મૅગ્નેશિયમ સપ્લિમેન્ટ્સને ટૉફીની જેમ ખાવાનો વાયરલ ટ્રેન્ડ કેટલો જોખમી?

શું તમે પણ સપ્લિમેન્ટ્સને કેન્ડી સમજીને ખાઓ છો? તબીબી સલાહ વિનાનું સેવન બની શકે છે ઝેર સમાન

આજના આધુનિક યુગમાં વિટામિન્સ અને મિનરલ્સના સપ્લિમેન્ટ્સનું નિયમિત સેવન કરવું લોકો માટે એક ફેશન કે લાઇફસ્ટાઇલ ટ્રેન્ડ બની ગયું છે. ખાસ કરીને સોશિયલ મીડિયા પર વાયરલ થઈ રહેલી રીલ્સ અને વીડિયોના પ્રભાવ હેઠળ આવીને યુવા પેઢી વિવિધ પ્રકારના હેલ્થ ટ્રેન્ડ્સને આંધળો અનુકરણ કરી રહી છે. હાલમાં સોશિયલ મીડિયા પર મૅગ્નેશિયમ જેલી અથવા રંગબેરંગી ગમીઝને સ્વાદિષ્ટ ટૉફી કે ચોકલેટની જેમ ખાવાનો ક્રેઝ ખૂબ જ ઝડપથી વધી રહ્યો છે.

અનેક અહેવાલો મુજબ, લોકો કોઈપણ તબીબી નિષ્ણાત કે ડૉક્ટરની સલાહ લીધા વિના માત્ર સ્ટ્રેસ (માનસિક તણાવ) દૂર કરવા, રાત્રે ગાઢ ઊંઘ મેળવવા કે સ્નાયુઓના દુખાવામાંથી રાહત મેળવવા માટે આ સપ્લિમેન્ટ્સનું સેવન કરી રહ્યા છે. પરંતુ આરોગ્ય ક્ષેત્રના નિષ્ણાતોનું કહેવું છે કે કોઈપણ મિનરલ કે વિટામિનને કેન્ડી સમજીને આડેધડ ખાવાની આ આદત શરીરને ગંભીર નુકસાન પહોંચાડી શકે છે.

હાઇપરમેગ્નેસીમિયા અને પાચનતંત્ર પર નકારાત્મક અસર

મૅગ્નેશિયમ માનવ શરીર માટે એક અત્યંત જરૂરી તત્વ છે, પરંતુ તેને એક ચોક્કસ મર્યાદામાં જ લેવું જોઈએ. જ્યારે સપ્લિમેન્ટ્સના રૂપમાં તેને મર્યાદાથી વધુ માત્રામાં શરીરમાં દાખલ કરવામાં આવે છે, ત્યારે રક્તમાં મૅગ્નેશિયમનું સ્તર ખતરનાક રીતે વધી જાય છે. તબીબી ભાષામાં આ સ્થિતિને ‘હાઇપરમેગ્નેસીમિયા’ (Hypermagnesemia) કહેવામાં આવે છે. નિષ્ણાતોના મતે, સામાન્ય સંજોગોમાં કોઈપણ વ્યક્તિએ દિવસ દરમિયાન ૩૫૦ મિલીગ્રામથી વધુ મૅગ્નેશિયમ ન લેવું જોઈએ, અન્યથા તે શરીરમાં ઝેર સમાન પરિણામો આપી શકે છે.

મૅગ્નેશિયમની સૌથી પહેલી અને સીધી અસર મનુષ્યના પાચનતંત્ર પર પડે છે. જ્યારે મૅગ્નેશિયમનું વધુ પડતું સેવન થાય છે, ત્યારે તે આંતરડામાં વધારાનું પાણી ખેંચે છે. આના પરિણામે વ્યક્તિને ગંભીર ઝાડા (ડાયરિયા), પેટમાં તીવ્ર મરડો આવવો અને ગેસ જેવી તકલીફોનો સામનો કરવો પડે છે.

બ્લડ પ્રેશરમાં ઘટાડો, હૃદય અને કિડની પર વધારાનું ભારણ

મૅગ્નેશિયમનો ઓવરડોઝ શરીરના અન્ય મહત્વપૂર્ણ અંગો માટે પણ અત્યંત જોખમી સાબિત થાય છે:

• બ્લડ પ્રેશરમાં અચાનક ઘટાડો: મૅગ્નેશિયમ વધારે પડતું લેવાથી શરીરની રક્તવાહિનીઓ અત્યંત શિથિલ (રિલેક્સ) થઈ જાય છે, જેના કારણે બ્લડ પ્રેશર અચાનક ઘટી જાય છે. આ પરિસ્થિતિ હૃદયની નર્વસ સિસ્ટમ પર પણ માઠી અસર કરે છે. આ ઉપરાંત ફેફસાંના સ્નાયુઓ વધુ પડતા શિથિલ થવાથી દર્દીને શ્વાસ લેવામાં પણ ભારે તકલીફ થઈ શકે છે.

• કિડની પર વધારાનું ભારણ: કિડનીનું મુખ્ય કાર્ય શરીરમાંથી વધારાના મિનરલ્સ અને ઝેરી તત્વોને બહાર કાઢવાનું છે. દરરોજ આડેધડ સપ્લિમેન્ટ્સ લેવાથી કિડની પર વધારાનો તણાવ પેદા થાય છે. ખાસ કરીને જે લોકોને પહેલેથી જ કિડની સંબંધિત કોઈ બીમારી કે સમસ્યા હોય, તેમના માટે આ ટ્રેન્ડ જીવલેણ સાબિત થઈ શકે છે.

દાંતનો સડો અને શુગર લેવલમાં વધારો

આ સપ્લિમેન્ટ ગમીઝ ખાવામાં સ્વાદિષ્ટ અને ટૉફી જેવી લાગે તે માટે ઉત્પાદક કંપનીઓ દ્વારા તેમાં આર્ટિફિશિયલ શુગર, ફ્લેવર્સ અને સ્વીટ સીરપનો મોટા પ્રમાણમાં ઉપયોગ કરવામાં આવે છે. દરરોજ આવી ગમીઝ ખાવાથી દાંતમાં સડો (કેવિટી) થવાનું જોખમ રહે છે. સાથે જ, આ વધારાની શુગર અને કેલરીને કારણે વજન વધવાની તથા લોહીમાં શુગરનું પ્રમાણ વધવાની શક્યતાઓ રહેલી છે.

કુદરતી સ્ત્રોત પસંદ કરો અને ડૉક્ટરની સલાહ લો

જો તમને યોગ્ય ઊંઘ ન આવતી હોય, માનસિક તણાવ રહેતો હોય કે અશક્તિ લાગતી હોય, તો તરત જ મેડિકલ સ્ટોર પરથી મૅગ્નેશિયમ કેપ્સ્યુલ કે ગમીઝ ખરીદવાને બદલે કુદરતી ખોરાક પર ધ્યાન આપવું જોઈએ. લીલા પાંદડાવાળા શાકભાજી, બદામ, કાજુ, તજ, અને વિવિધ બીજ (Seeds) મૅગ્નેશિયમના ઉત્તમ અને સુરક્ષિત કુદરતી સ્ત્રોત છે. કોઈપણ પ્રકારના સપ્લિમેન્ટ્સ શરૂ કરતા પહેલા હંમેશા નિષ્ણાત ડૉક્ટરની સલાહ લેવી ખૂબ જ અનિવાર્ય છે.