ગુજરાતમાં કોરોના વાયરસની મહામારીના પ્રકોપ વચ્ચે લોકડાઉન 4.0નો અમલ ગુજરાતમાં આજથી શરૂ કરવામાં આવ્યો છે. ગઇકાલે રાજ્યના મુખ્યમંત્રી વિજય રૂપાણીએ અમદાવાદ સિવાયના તમામ જિલ્લામાં ST બસ સેવા શરૂ કરવાના આદેશ આપ્યા છે ત્યારે આજરોજ ગાંધીનગર ખાતે મળેલી એક મહત્વની બેઠકમાં રાજ્યમાં બસ સેવા શરૂ કરવાને લઇને મોટો નિર્ણય લેવામાં આવ્યો છે.
ઉલ્લેખનીય છે કે, આગામી ગુરૂવારની મધ્યરાત્રિથી રાજ્યમાં ST બસના પૈડા ફરી દોડતા થશે. ગાંધીનગર ખાતે યોજાયેલી એક મહત્વની બેઠકમાં કન્ટેનમેન્ટ ઝોન સિવાયના તમામ વિસ્તારમાં ST બસ શરૂ કરવાનો નિર્ણય લેવામાં આવ્યો છે.
આપને જણાવી દઇએ કે,4827 રૂટ પર હાલ બસ સેવા શરૂ કરવામાં આવશે. ત્યારે આ તમામ રૂટ શરૂ કરવાને લઇને તાત્કાલિક અસરથી 24 ડિવિઝનના વિભાગીય નિયામકોને આ અંગેની જવાબદારી સોંપવામાં આવી છે.
નોંધનીય છે કે, ગઇકાલે પ્રજાજોગ સંબોધનમાં મુખ્યમંત્રીએ જણાવ્યું કે, અમદાવાદના કોરોના વાયરસના સૌથી વધારે કેસ હોવાથી અમદાવાદમાં એસ.ટી બસને પ્રવેશવા કે બહાર જવા દેવામાં આવશે નહીં.
આપને જણાવી દઇએ કે, રાજ્યમાં વિવિધ વિસ્તારમાં AMTS અથવા BRTS સેવા હાલ શરૂ કરવામાં આવશે નહીં તેવી વાત ગઇકાલે રાજ્યના મુખ્યમંત્રી વિજય રૂપાણીએ પોતાના પ્રજાજોગ સંબોધનમાં કરી હતી.
લોકડાઉન 4માં રાજ્ય સરકારે કેટલીક છૂટછાટ આપી છે. જેમાં અન્ય જિલ્લામાં જવા માટે પાસને લઇના નાયબ મુખ્યમંત્રી નીતિન પટેલે જાહેરાત કરતા કહ્યું કે હવે એક જિલ્લામાંથી બીજા જિલ્લામાં જવા માટે પરવાનગી નહીં જોઈએ. નોન કન્ટેનમેન્ટ ઝોનમાંથી જવું હશે તો પાસની જરૂર નહીં રહે. ગુજરાતના એક જિલ્લામાંથી બીજા જિલ્લામાં જવા માટે પાસની જરૂર નહીં પડે હવે પાસ વગર એકમાંથી બીજા જિલ્લામાં જઈ શકાશે.
