15 થી 25 લાખમાં ઓરીને ઘરે બોલાવો! જાણો શું છે તેની આ અનોખી ‘સર્વિસ’
જો તમે છેલ્લા કેટલાક વર્ષોમાં ભારતમાં ઈન્સ્ટાગ્રામ સ્ક્રોલ કર્યું હોય, તો તમે ચોક્કસપણે ‘ઓરી’ એટલે કે ઓરહાન અવાત્રામણીને તો જોયો જ હશે. સેલેબ્સની દરેક મોટી પાર્ટીમાં હાજરી, સ્ટાર્સ સાથે વેકેશન અને તમારા ફીડ પર સતત જોવા મળતો આ ચહેરો આજે સોશિયલ મીડિયાનો એક મોટો ટ્રેન્ડ બની ગયો છે. ઓરી વિશે સૌથી વધુ ચર્ચા જે બાબતની થાય છે તે એ છે કે તેની પાસે કોઈ 9-થી-5ની નોકરી નથી, લિંક્ડઈનમાં કોઈ ડેઝિગ્નેશન નથી, તેમ છતાં તે આટલો પોપ્યુલર કેવી રીતે છે? લોકો જાણવા માંગે છે કે તે વાસ્તવમાં શું કરે છે અને આટલા પૈસા ક્યાંથી લાવે છે.
તાજેતરમાં, કાવ્યા કર્ણાટક દ્વારા હોસ્ટ કરવામાં આવેલા ‘Learn by KK Create’ પોડકાસ્ટમાં ઓરીએ આ રહસ્યો પરથી પડદો ઉઠાવ્યો છે. તેણે જણાવ્યું કે કેવી રીતે તેણે પોતાની પોપ્યુલરિટીને એક નફાકારક વ્યવસાયમાં બદલી નાખી છે. તેની આ વાત સાંભળીને લોકો ચોંકી ગયા છે.
‘મેં એક ડીલમાંથી 76 લાખ રૂપિયા કમાયા’
પોતાની કમાણી વિશે વાત કરતા ઓરીએ ખુલાસો કર્યો કે તેની આવકનો મોટો હિસ્સો બ્રાન્ડ કોલેબરેશન અને પેઇડ અપિયરન્સમાંથી આવે છે. તેણે પોડકાસ્ટમાં કહ્યું, “ગયા મહિને મેં માત્ર એક ડીલ, એક રીલ માટે 76 લાખ રૂપિયા કમાયા છે.” આ સાંભળીને ઘણા લોકો આશ્ચર્યચકિત થઈ ગયા હતા. ઇન્ફ્લુએન્સર માર્કેટિંગની દુનિયામાં બ્રાન્ડ્સ આટલી મોટી રકમ ખર્ચવા તૈયાર છે, તે આજના સમયના ડિજિટલ અર્થતંત્રનું ઉદાહરણ છે. આ નિવેદન વાયરલ થયા પછી સોશિયલ મીડિયા પર ચર્ચા જાગી છે – કેટલાકે ઓરીના બિઝનેસ સેન્સના વખાણ કર્યા, તો કેટલાક લોકો આ આંકડા જોઈને સ્તબ્ધ થઈ ગયા.
View this post on Instagram
‘તમે મને લંચ, ડિનર કે લગ્ન માટે ખરીદી શકો છો’
ઓરીનું બિઝનેસ મોડલ માત્ર સોશિયલ મીડિયા એન્ડોર્સમેન્ટ પૂરતું મર્યાદિત નથી. તેણે ખુલીને વાત કરી કે ક્લાયન્ટ્સ તેને ખાનગી કાર્યક્રમોમાં બોલાવવા માટે 15 લાખથી 25 લાખ રૂપિયા સુધીની ફી ચૂકવે છે. આ કાર્યક્રમોમાં જન્મદિવસની પાર્ટીઓ, લગ્ન પ્રસંગો કે અન્ય સામાજિક મેળાવડાઓનો સમાવેશ થાય છે.
પોતાની અનોખી અને રમુજી શૈલીમાં તેણે સમજાવ્યું, “15 થી 25 લાખ રૂપિયામાં તમે મને લંચ માટે ખરીદી શકો છો, ડિનર માટે ખરીદી શકો છો. હું તમારા લગ્નમાં આવીશ, બર્થડે પાર્ટીમાં આવીશ. હું એવી રીતે વાતો કરીશ જાણે આપણે બાળપણના મિત્રો છીએ, હું તમારી સાથે હેંગઆઉટ કરીશ, તમારા માતા-પિતા સાથે ડ્રિંક્સ લઈશ અને તમને ગમતા દરેક વ્યક્તિ સાથે ફોટા પડાવીશ. આ એક એવો અનુભવ છે જે તમે ખરીદી શકો છો.”
તે માત્ર હાજર રહેતો નથી, પરંતુ મહેમાનો સાથે ભળે છે, વાતો કરે છે અને તેનો પ્રખ્યાત સિગ્નેચર પોઝ પણ આપે છે. આજે આ પોઝ તેની ઓળખ બની ગયો છે.
પર્સનલ બ્રાન્ડિંગની શક્તિ
આજનું ક્રિએટર ઇકોનોમી ખૂબ જ બદલાઈ ગયું છે. ઓરી માને છે કે આજના સમયમાં ‘એટેન્શન’ (ધ્યાન ખેંચવું) પોતે જ એક કિંમતી વસ્તુ છે. લોકો હવે પરંપરાગત વસ્તુઓ વેચવાને બદલે પોતાનું વ્યક્તિત્વ, પોતાની બ્રાન્ડ વેચી રહ્યા છે. ઓરીનું બિઝનેસ મોડલ એ જ છે કે તે પોતાની સેલિબ્રિટી સ્ટેટસ અને સોશિયલ મીડિયાની પહોંચને એક સર્વિસ તરીકે ઓફર કરે છે.
પોતાના પોઝ વિશે વાત કરતા તેણે મજાકમાં કહ્યું, “હિન્દુસ્તાનમાં માત્ર બે લોકોના પોઝ પ્રખ્યાત છે, શાહરૂખ ખાન અને ઓરી. મને ખૂબ આનંદ છે કે હું તે લેવલ સુધી પહોંચ્યો છું.”
નાણાકીય વ્યવસ્થાપન: હજુ પણ મમ્મી-પપ્પાના હાથમાં
ઘણા લોકો જાણવા માંગતા હતા કે આટલા પૈસા કમાયા પછી તે તેનું ફાઈનાન્સ કેવી રીતે મેનેજ કરે છે? જ્યારે તેને પૂછવામાં આવ્યું કે તેના પૈસા કોણ સંભાળે છે, ત્યારે તેણે ખૂબ જ સરળતાથી જવાબ આપ્યો: “મારા મમ્મી અને પપ્પા!” જ્યારે તેને પૂછવામાં આવ્યું કે શું તે ભવિષ્યમાં પોતાનું ફાઈનાન્સ જાતે સંભાળવાની આશા રાખે છે, ત્યારે તેણે હસતા હસતા જવાબ આપ્યો, “હું ક્યારેય તેમાંથી મોટો થવાનો નથી.”
