આ વાતોનું ધ્યાન રાખશો તો ફ્રાઈસ બનશે એકદમ સોનેરી અને ક્રિસ્પી

ઘરે બનાવેલા ફ્રેન્ચ ફ્રાઈસ કેમ નરમ પડી જાય છે? જાણી લો રેસ્ટોરન્ટના શેફની આ ‘ડબલ ફ્રાય’ સિક્રેટ ટ્રિક

બાળકોથી લઈને મોટાઓ સુધી, કેફે કે રેસ્ટોરન્ટમાં મળતા ગરમાગરમ, સોનેરી અને ક્રિસ્પી ફ્રેન્ચ ફ્રાઈસ જોઈને દરેકના મોંમાં પાણી આવી જાય છે. પરંતુ જ્યારે આપણે આ જ ફ્રાઈસ ઘરમાં તે જ ઉત્સાહ સાથે બનાવીએ છીએ, ત્યારે મોટેભાગે નિરાશા જ હાથ લાગે છે. સ્વાદ તો ગમે તેમ કરીને આવી જાય છે, પણ જેવો ડંખ મારીએ કે તરત ખબર પડે છે કે બજાર જેવી ક્રિસ્પીનેસ ગાયબ છે અને ફ્રાઈસ એકદમ નરમ પડી ગયા છે. ગૃહિણીઓ અવારનવાર ફરિયાદ કરતી હોય છે કે તમામ પ્રયાસો છતાં ઘરે ફ્રાઈસ કેમ પોચા બને છે? હકીકતમાં, વાંક બટાકાનો નથી હોતો, પણ પ્રોફેશનલ શેફ દ્વારા વપરાતી કેટલીક નાની પણ અત્યંત મહત્વની કુકિંગ ટેકનિકનો છે.

ઘરના રાંધણકળાને વધુ પ્રોફેશનલ અને સ્વાદિષ્ટ બનાવવા માટે સોશિયલ મીડિયા અને શેફ સર્કલમાંથી કેટલીક અદ્ભુત કુકિંગ ટિપ્સ સામે આવી છે. સાંજના સમયે ચા સાથે કે વીકેન્ડ પાર્ટીમાં ફ્રેન્ચ ફ્રાઈસ સૌથી વધુ ખવાતી વાનગી છે. મોટાભાગના લોકો બજારમાંથી મોંઘા ફ્રોઝન પેકેટ લાવીને તળતા હોય છે, કારણ કે ઘરે કાચા બટાકામાંથી બહાર જેવા ક્રિસ્પી ફ્રાઈસ બનતા નથી. પરંતુ અગ્રણી શેફનું કહેવું છે કે જો તમે બટાકાને કાપવાથી લઈને કડાઈમાં તળવા સુધીના વિજ્ઞાનને સમજી લો, તો તમે પણ દર વખતે એકદમ ક્રંચી અને સોનેરી ફ્રાઈસ પ્લેટમાં પીરસી શકશો.

૧. બટાકાની સાચી પસંદગી છે પહેલું સ્ટેપ

તમે ગમે તેટલી સારી રીતે બનાવો, પણ જો બટાકા ખોટા પસંદ કર્યા હશે તો ફ્રાઈસ સારા નહીં બને. ફ્રેન્ચ ફ્રાઈસ માટે હંમેશાં એવા મોટા બટાકા પસંદ કરો જેમાં સ્ટાર્ચનું પ્રમાણ વધુ હોય અને પાણીનો ભાગ ઓછો હોય (જેમ કે પહાડી કે જૂના બટાકા). મોટા બટાકા હોવાથી ફ્રાઈસ લાંબા અને એકસરખા કદના કટ થશે, જે દેખાવમાં પણ કેફે જેવા જ લાગશે.

૨. ઠંડા પાણીમાં પલાળવાનું મહત્વ

બટાકાને લાંબી સ્લાઈસમાં કાપ્યા પછી, તેને સામાન્ય પાણીના બદલે બરફ જેવા ઠંડા પાણીમાં ઓછામાં ઓછી ૩૦ મિનિટ માટે પલાળી રાખો. જો તમારી પાસે સમય હોય તો એકથી બે કલાક પલાળવું વધુ સારું રહેશે. આમ કરવાથી બટાકામાં રહેલો વધારાનો સ્ટાર્ચ (જે બટાકાને ચીકણા બનાવે છે) તે પાણીમાં ઓગળીને બહાર નીકળી જશે અને તળતી વખતે ફ્રાઈસ એકબીજા સાથે ચોંટશે નહીં.

૩. કિચન ટુવાલથી સંપૂર્ણ સુકવો

પાણીમાંથી બહાર કાઢ્યા પછી બટાકાને સીધા તેલમાં ક્યારેય નાખવા નહીં. તેને રસોડાના સાફ સુતરાઉ કપડા કે ટુવાલ પર પાથરીને ફેનની નીચે સંપૂર્ણપણે સૂકવી લો. જો બટાકાની સપાટી પર સહેજ પણ ભેજ કે પાણી રહી જશે, તો તેલમાં જતાની સાથે જ તે વરાળ (Steam) બની જશે, જેના કારણે બટાકા અંદરથી બફાઈ જશે અને બહારનું પડ ક્યારેય કડક નહીં થાય.

૪. શેફની સૌથી મોટી સિક્રેટ યુક્તિ: ‘ડબલ ફ્રાય’

કોઈપણ રેસ્ટોરન્ટમાં ફ્રાઈસને ક્યારેય એક જ વારમાં આખા તળવામાં આવતા નથી. શેફ તેને હંમેશાં બે વાર તળે છે. પ્રથમ વખત, તેલને મધ્યમ ગરમ કરો અને ફ્રાઈસને માત્ર ૪ થી ૫ મિનિટ માટે હાફ-કુક (અધકચરા) તળીને પ્લેટમાં બહાર કાઢી સંપૂર્ણ ઠંડા થવા દો. જ્યારે તે રૂમ ટેમ્પરેચર પર આવી જાય, ત્યારે તેલને એકદમ તેજ ગરમ (હાઇ હીટ) કરો અને ફ્રાઈસને ફરીથી માત્ર ૨ થી ૩ મિનિટ માટે તળો. આ બીજી વારની પ્રક્રિયા જ ફ્રાઈસને બહારથી સુપર ક્રિસ્પી અને ગોલ્ડન કલર આપે છે.

૫. કોર્નફ્લોર અને તેલનું પરફેક્ટ તાપમાન

જો તમારે બહાર કરતાં પણ વધુ ક્રંચીનેસ જોઈતી હોય, તો બટાકા સૂકાઈ ગયા પછી તળતા પહેલાં તેની ઉપર માત્ર એક નાની ચમચી કોર્નફ્લોર (મકાઈનો લોટ) અથવા ચોખાનો લોટ હળવા હાથે છાંટીને મિક્સ કરી લો. આ લોટ બટાકાના બાકી બચેલા ભેજને શોષી લેશે અને ઉપર એક સરસ કડક લેયર બનાવશે. તળતી વખતે કડાઈમાં એકસાથે બધી ફ્રાઈસ ન નાખો, થોડી-થોડી બેચમાં તળો જેથી તેલનું તાપમાન જળવાઈ રહે.

૬. મીઠું ક્યારે ઉમેરવું?

મોટાભાગના લોકો બટાકા કાપતી વખતે જ મીઠું નાખી દે છે, જે સૌથી મોટી ભૂલ છે. મીઠું પાણી છોડે છે, જેનાથી ફ્રાઈસ નરમ પડી જાય છે. ફ્રાઈસ જ્યારે બીજી વાર તળાઈને ગરમાગરમ કડાઈમાંથી બહાર નીકળે, તેના પર તરત જ મીઠું, મરી પાવડર કે પેરી-પેરી મસાલો છાંટવો. ગરમ તેલના કારણે મસાલા ફ્રાઈસ પર સરસ રીતે ચોંટી જશે અને કડકપણાને પણ કોઈ નુકસાન નહીં થાય. બસ, આ નાની વાતોની કાળજી રાખીને આજે જ ઘરે ટ્રાય કરો આ હોટેલ સ્ટાઈલ ફ્રેન્ચ ફ્રાઈસ.